Skip to main content

Aatsitassarsiorfiup akerleriissutaaqisup naalakkesuisoqarfimmi pisortaasimasoq pisortaanertut atorfinitsikkaa

Greenland Mineralsip Kuannersuarni aatsitassanik qaqutigoortunik piiaanissamut aatsitassarsiorfimmik ammaaniarnermini, naalakkersuisoqarfimmi pisortaasimasoq Jørn Skov Nielsen, Kalaallit Nunaanni inuussutissarsiornerup siuarsaaffigineqarneranut ukiorpassuarni sunniuteqarluarsimasoq pisortaanertut atorfinitsissimavaa.

Inuussutissarsornermut Naalakkersuisoqarfimmi atorfilittatut pissaaneqarsimaqisoq, qaammatit qulit matuma siornatigut atorfimminit maajip naanerani aallartittussamik soraarniuteqarsimavoq, Jørn Skov Nielsenillu sunik suliaqalissanersoq taamalini assigiinngitsutigut eqqarsaasersuutigineqartarsimavoq. 

Greenland Mineralsimi pisortap John Mairip tusagassiorfinnut nalunaaruteqarnermi ilisimatitsissutigaa, Jørn Skov Nielsen Kalaallit Nunaanni aatsitassanik qaqutigoortunik aatsitassarsiorfissap, uranitaqarnera pissutigalugu oqallisaaqisup inriartortinneqarnerani qitiusumik inissisimassasoq.

Atorfinitsitsineq pingaarutilik

Australiamiut aatsitassarsiorfiutaata tusagassiorfinnut nalunaaruteqarnermi isertuutinngilaat, inummik Kalaalit Nunaanni inuussutissarsiornermik ilisimasaqarluarnermi saniatigut politikkikkut suliaqarnermik misilittagaqarluartumik atorfinitsitsineq nuannaarutigineqartoq.

Jørn Skov Nielsenip suliassarissavai, aatsitassarsiorfiup akuersissutinik pisariaqartinneqartunik pissarsisarnissaq aamma Kalaalit Nunaanni Danmarkimilu malittarisassanut atuuttunut aatsitassarsiorfiup naleqqussarneqartarnissaa. Tamatuma saniatigut Europamut atatillugu periusissianik aningaasarsiornermillu inerisaaneq akisussaaffigissavai.

- Qaqutigoorluinnartuuvoq inummik taamaka misilittagaqartigisumik atorfinitsitsisinnaaneq, ineriartortitsinitta iluatsilluartumik anguneqarnissaanut pingaaruteqarluinnartumik sunniuteqarsinnaasumik. Jørn Skov Nielsenip suleqatigiinnut ilanngukkusussimanerata takutippaa, Kuannersuarni suliniutitsinnut pitsaalluinnartumik tunngavissiisimasugut, Kalaallit Nunaanni pitsaalluinnartumik suliniuteqarnitsinni ilinniartitsilluarsimasugut aamma ineriartortitsinissamut periarfissagissaartugut, Australiami qullersaqarfimmit Perthimiit John Mair tusagassiorfinnut nalunaaruteqarpoq.

Suliniut immikkuullarissoq

Jørn Skov Nielsen cand.polit.-imik ilinniagaqarpoq, nutaanillu unammilligassaqalernerminut qilanaarluni, tusagassiorfinnut nalunaarummi allassimavoq.

- Suliffissuaqarnermi suliniutaavoq immikkuullarissoq, nunarsuarmi aatsitassanik qaqutigoortumik piiaanermi siuttunngorsinnaanermut ilippanaatilik, nukissiuuteqarnermik pitsanngorsaasinnaasoq ataavartumillu nukinnik pilersuinermik annertusisitsisinnaasoq aamma nunarsuarmi gassinik silaannarmik kissatsitsisartunik aniatitsinermik annikilliliisinnaasoq. Suliniut aamma Kalaallit Nunaanni inuussutissarsiorermik, suliffeqarnermik ilisimasanillu annertusaanermik ataavartumik ineriartortitsinissamut, piffissaq ungasinnerusoq eqqarsaatigalugu periarfissaqarluarpoq, Jørn Skov Nielsen uran pillugu ajornartorsiutaasoq ataatsimilluunniit oqaaseqarfiginagu oqarpoq.

Naatsorsuutigineqarpoq aatsitassarsiorniarnermut tunngatillugu VVM pillugu tusarniaaneq qanittukkut aallartinneqassasoq.

Aatsitassarsiorniarneq pillugu ilisimasat:

Kuannersuaq illoqarfiup Narsap eqqannguaniippoq.

Aatsitassarsiorfiussaaq, akuutissanik suliaqarfiussaaq akuiaaveqarlunilu.

Akuutissanik suliaqarfimmi aatsitassat qaqutigoortut oxidit (REO), zinkit fluoritsillu 20-25%-ii tunisassiarineqartassapput.

Akuiaavimmi aatsitassat qaqutigoortut ilaat akuissuseqartut uranitalillu tunisassiassatut suliarineqartassapput.

Aatsitassat qaqutigoortut suliniuteqarnermi isertitassat 80 %-ii sinnerlugit isaatitsissutaassapput, urani, zinki fluoritsilu suliniutip oqimaaqatigiissineqarneranut tapertaassallutik.

Greenland Minerals aningaasaliissuteqarsimasunit arlalinnit pigineqarpoq, Shenghe Resources Holding Co LTD Kinameersoq 10,5 procentimik piginneqataassuteqarnermigut piginnittunit annersaalluni.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER