Skip to main content

Aatsitassarsiorfissuaq innaallagissamik pilersorneqarnissamut isumaqatigiissuteqartoq

Aatsitassarsiutileqatigiiffik Tanbreez Kujataani Killavaat Alannguanni aatsitassarfiorfimmik pilersitsiniartoq innaallagissamik pilersorneqarnissaq pillugu Nukissiorfinnut isumaqatigiissuteqarsimavoq.

Innaallagiaqanngippat aatsitassarsiortoqarsinnaanngilaq.

Tamanna pissutigalugu Tanbreez Nukissiorfiillu Kujataani aatsitassanik qaqutigoortunik piiaanissaq pillugu suleqatigiinnissamik isumaqatigiissuteqarsimapput.

- Naatsorsuutigineqarpoq piiaaneq aallartippat Nukissiorfiit Tanbreezimut erngup nukinganit pisumik innaallagissamik pilersuisuussasut. Nukissiorfiit Tanbreezimut innaallagissamik pilersuilernissaat sioqqullugu, Tanbreez atassuserneqarnissamut pisariaqartinneqartumillu attaveqaasiornissamut aningaasaliissuteqarnissamut pisussaaffeqarpoq. Tanbreez pilersaarutaasumik pilersaarutaanngitsumilluunniit innaallagiaq qamissappat, nammineq innaallagialersornissamut sillimmateqassaaq, ingerlatseqatigiiffik tusagassiorfinnut nalunaaruteqarluni ilisimatitsivoq.

CO2 annikitsumik aniatinneqassasoq

Greg Barnesip Tanbreezimeersup erseqqissaatigaa, isumaqatigiissummik atsioqatigiissimanerup qulakkiissagaa, aatsitassarsiornermi CO2-p annertunerusumik aniatinneqannginnissaa.

- Qaqutigoortunik aatsitassarsiornermi CO2-p annertuumik aniatinneqartarnera ilisimaneqarpoq, tamannalu CO2-mik aniatitsisarneq annikinnerulersinniarlugu aatsitassat qaqutigoortut atorneqartarnerat eqqarsaatigalugu eqqarsarnarsinnaavoq, Greg Barnes oqarpoq.

Suleqatigiilersut isumaqatigiissutigaat, kingusinnerusukkut Nukissiorfiit nutaamik isumaqatigiissusiorfigineqassasut, tassa ”ukiumut piiaaneq annertusineqassappat, Nukissiorfiit tunniussinnaasaannit atuinerulertoqartussaammat”.

Nalinginnaasumik akigititaq

Isumaqatigiissummi atuarneqarsinnaavoq, aatsitassarsiutileqatigiiffik innaallagissamik pilersorneqarnermut akigititamikt nalinginnaasumik akiliuteqartassasoq, taanna ullumikkut kWh-mut 1,65 koruuneqarpoq. Tanbreezip pisariaqartinneqartumik atassuserneqarnissaq attaveqaasersuinerlu akilissavai.

Piiaaneq aallartinneqarpat,Nukissiorfiit erngup nukinganik 30 GWh-p missaanik pilersuisinnaassapput, tassani nukimmik pisariaqartitsinermi annerpaamik 7,5 MW tunniunneqarsinnaalluni.

- Suleqatigiilersut isumaqatigiissutigisimavaat, Tanbreezip ukiumut piiaanini annertusitippagu Nukissiorfiit erngup nukinganik nukissiorfiliussasut, tassa erngup nukinganik innaallagiaq pisariaqartinneqartoq tunniunneqarsinnaatinniarlugu. Erngup nukinganik nukissiorfissamik nutaamik sanaartonissaq alliliinissarluunniit Namminersorlutik Oqartussanit akuerineqarlunilu aningaasaliiffigineqarnissaa pisariaqassaaq, isumaqatigiissummi allassimavoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER