Aatsitassarsiorfinnut ikiorsiissutissat inissinneqartut

Kalaallit Nunaanni aatsitassarsiortut misissuinissamut pisussaaffitik 2020-mi malittariaqanngilaat.

Aatsitassarsiorfik nunami maani sumiiffimi aalajangersimasumi aatsitassanik ujaasinissamut akuerineqaraangami pisussaaffilerneqartarpoq.

Ingerlatseqatigiiffiimmi sumiiffimmi ujaasinissaminnut ukiut tamaasa aningaasanik atuissallutik neriorsuisarput, ingerlatseqatigiiffiullu piumasaqaat naammassisinnaanngippagu akuersissut utertinneqartussaavoq.

Pisussaaffik taanna ingerlatseqatigiiffiit ujaasinissamut akuersissutaatillit tassa maanna malittariaaruppaat:

- Naalakkersuisut 2020-mi aatsitassarsiorfiit pisussaaffiisa tamarmik, akuersissutit ilanngullugit iluarsiiffigineqarnissaat akuerisimavaat, Namminersorlutik Oqartussat allapput.

- Namminersorlutik Oqartussat 2020-mi misissuinermi pisussaaffeqartitsinnginnermikkut suliffeqarfiit Kalaallit Nunaanni suliaqartut, unammillernartumik atugaqaratik suliaminnik ingerlatsiinnarnissaannik ikiorniarpaat, ilanngullugu allassimavoq.

Ingerlatseqatigiiffiit ikiorserneqartut

Aningaasaqarnermut Naalakkersuisup Vittus Qujaukitsup sapaatip akunnerani kingullermi tusagassiortunik katersortitsinermi oqaatigaa, aatsitassarsiornermi pisussaaffiit annikillisinneqarsinnaasut.

Naalakkersuisullu taamtut iliuuseqarnermikkut aatsitassarsiorfiit coronamik ajornartortsiortinneqartut ikiorserniarpaat. Sermitsiaq.AG-p martsip qaammataata qiteqqunnerani oqaluttuaraa, aatsitassanut akigititat aatsitassarsiorfinnullu piginneqatigiissutit nalingi appariarujussuarsimasut, tamannalu nunami aatsitassarsiornermut sunniuteqarsinnaasoq.

Misissuinerup naleqassusia Kalaallit Nunaannit annaaneqartussat nalileruminaapput, Aatsitassanut Naalakkersuisoqarfimmi pisortaq Jørgen T. Hammeken-Holm oqaluttuarpoq.

Ukioq manna suliassat annikitsutut isikkoqaraluartut ukiuni aggersuni pisussat eqqarsaatigalugit isumalluarpoq:

- Torontomi aatsitassarsiornermut tunngatillugu ataatsimeeqqammerpugut - kikkut tamarmik aatsitassarsiornissaq eqqarsaatigalugu pitsaalluinnartunik naatsorsuuteqarput. Manna tusarparput taamatut ajornartorsiuteqartoqartarnera sungiussimaneqartoq, nukittunerullutillu aallarteqqittartut, pisortaq oqarpoq nagillunilu:

- Suliffeqarfiuvoq nikerartorujussuarmik angusaqarfiusartoq, piffissarlu ungasinnerusoq eqqarsaatigalugu suliffiusartoq. Ingerlatseqatigiiffinnut oqaatigaarput: Aaappagu aggeqqigitsi, ukioq manna piumasaqaateqanngilagut, Jørgen T. Hammeken-Holm nassuiaavoq.

Akiligassat 10 mio. koruuniusut kinguartinneqarsinnaanerat eqqarsaatigineqartoq

Ingerlatseqatigiiffiit ikiorseqqinniarlugit Naalakkersuisut marlunnik suliniuteqarput, tassani pineqarput oqatussanit sullinneqarnermi akileeqqusisoqassanngitsoq imaluunniit akiliutissat kinguartinneqassanersut, kiisalu piiaanissamut akuersissuteqarnermi isumannaallisaanissamut piumasaqaatit sakkukillineqassanersut.

Hammeken-Holmip nalilerpaa, ingerlatseqatigiiffiit ukioq manna 10 millioner koruunit missaannik oqartussanit sullinneqarnerminnut akiliuteqassasut. Ingerlatseqatigiiffiit akiligassaat kinguartinneqassanersut imaluunniit atorunnaartivinneqassanersut kingusinnerpaamik apriilip qaammataani Naalakkersuisut aalajangiissasut naatsorsuutigineqarpoq.

Taama pisoqassappat Inatsisartut Aningaasaqarnemut Akileraartarnermullu Ataatsimiititaliaat ilanngunneqassaaaq.

Powered by Labrador CMS