Aatsitassarsioqatigiiffiup kulturimut aningaasaateqarfimmut neriorsuutini eqquutsinngilaa
Aatsitassarsioqatigiiffik Greenland Ruby, Qeqertarsuatsiaani innuttaasunut iluaqutaasussanik pisussaaffimminik naammassinninngilaq.
- Taamaattoqarsinnaanngilaq.
Kommuneqarfik Sermersuumi kommunalbestyrelsimi ilaasortaq, Peter Davidsen, Siumumeersoq taama oqarpoq.
Aatsitassarsiortitseqatigiiffiup Greenland Rubyp pisussaaffimmik naammassinninnginnerata kingorna taama oqariartuuteqarpoq, tassa ukiumut Qeqertarsuatsiaani innuttaasunut 250.000 koruuninik akiliisoqartartussaagaluarpoq, Aappaluttumi piiaaffiup atorunnaarnissaata tungaanut.
IBA-mut isumaqatigiissut
Marlunngornermi 16. juni 2014 ulloq oqaluttuarisaanermut ilannguppoq.
Tassani aatsitassarsiortitseqatigiiffiusimasoq True North Gems Greenland, Namninersorlutik Oqartussat aamma Kommuneqarfik Sermersooq IBA-mut isumaqatigiissusiorput. Taanna innuttaasunut iluaqutaasussaavoq.
Isumaqatigiissummik pituttuisumik True North Gems Greenland atsiornermigut rubinisiornermik suliniummut atatillugu pitsaaqutit annertusarniarlugit ajoqutaasullu annikinnerutinniarlugit neriorsuuteqarpoq.
Aatsitassarsioqatigiiffik ilaatigut kulturimut innuttaasunullu aningaasaateqarfimmut aningaasanik aalajangersimasunik akiliuteqartarnissamut pisussaaffilerpoq. Isumaqatigiissut naapertorlugu True North Gems Greenland ukiumut 100.000 koruuninik 2014-imi aamma 2015-imi akiliuteqartussaagaluarpoq. Ukiunilu tulliuttuni aningaasat qaffanneqartussaallutik.
2016-imit aatsitassarsiorfiup atorunnaarsinneqarnissaata tungaanut ukiut tamaasa 250.000 koruuninik akiliuteqartarnissamut ingerlatseqatigiiffik atsiorpoq. Tamannali pinngilaq.
Amigartoortuarneq
2016-imi ukiakkut aatsitassarsioqatigiiffik True North Gems Greenland akiliisinnaajunnaarpoq. Ingerlatseqatigiiffik siulersuisunit akiliisinnaajunnaartoq nalunaarutigineqarpoq. Tamatuma kinguninngua akiliisinnaajunnaartup pigisaasa aamma LNS Greenland A/S-ip akornanni tigusinissamut isumaqatigiissusiortoqarpoq, Greenland Ruby ilanngullugu.
Tassanilu IBA-mut isumaqatigiissummi ajutoortoqarpoq.
Ingerlatseqatigiiffiup rubinisiorfik kisiat tigunngilaa – pisussaaffiit aamma ilanngunneqarput. Kisainni Greenland Rubyp 2016-mili tigummagu, kulturimut innuttaasunullu aningaasaateqarfimmut aningaasanik akiliuteqartoqarsimanngilaq.
Kommuni taama ilisimatitsivoq.
Akiliuteqartoqannginneranut – kommunip oqarnera naapertorlugu – amigartooruteqartuarneq utoqqatsissutigineqartarpoq. Kisianni Peter Davidsenip tamanna naammaginngilaa. Oqartussat, Namminersorlutik Oqartussat aamma akisussaasut sinnerisa, pituttortumik isumaqatigiissummi pisussaaffiit malinneqarnissaat akisussaaffigigaat, taanna isumaqarpoq.
Nunaqarfiup oqaluttuarisaanera
Neriorsuutigineqartut tutsuiginartuussappata, rubinisiorfiup innuttaasunut iluaqutaanissaa qulakkeerneqartariaqarpoq, Peter Davidsen tusagassiuutinut nalunaarummi taama ilisimatitsivoq.
Qeqertarsuatsiaani utoqqarnit Peter Davidsen nunaqarfiup oqaluttuarisaaneranik paasisaqarsimavoq. Nunaqarfik upperisamut kulturimullu tunngatillugu tunniussassaqarluartoq, taanna isumaqarpoq.
Peter Davidsenip taamaattumik kulturimut innuttaasunullu aningaasaateqarfimmut piaartumik aningaasaliisoqarnissaa piumasaraa.
Qeqertarsuatsiaani utoqqartaasut ilisimasaat oqaluttuassaallu kingusinaartigata qulakkeerniarlugit atuakkiornermut kulturikkullu nunaqarfimmi pikialaartitsinissamut atorneqarniassammata. Qeqertarsuatsiaani utoqqaat ilisimasaasa atuakkamik saqqummersitsinikkut kiisalu nunaqarfinni kulturikkut aaqqissuussinikkut qulakkeerneqartariaqartut, taanna oqariartuuteqarpoq.
Greenland Rubyp aningaasaateqarnermut aningaasaliinerannik tamanna pisariaqartitsivoq.
Sermitsiaq.AG tamanna pillugu Greenland Rubymit oqaaseqartitsiniarsarivoq.