Aatsitassarsioqatigiiffimmit nassuiaat nutaaq: Aningaasanut qinnuteqaatinik nuannaarutigalugu suliarinnikkumasoq

Greenland Ruby karsip matuneqarsimaneranik paatsortoqarsimassappat ajuusaarpoq.

Greenland Rubymit tusagassiuutitigut nalunaarummi taama allassimasoqarpoq.

Taama nalunaaruteqartoqarpoq Sermitsiaq.AG-mi allaaserisarpaalussuit Greenland Rubyp piorsarsimassutsikkut isumaginninnikkullu aningaasaateqarfimmut akiliuteqartarsimannginneranik qulaarisut malitsigisaannik.

Aningaasaateqarfik taanna Qeqertarsuatsiaani innuttaasunut iluaqutaaniartussaasimagaluarpoq.

Maannalu Greenland Ruby paasissutissiivoq aningaasanik qinnuteqaatinik tigusaqartoqarsimanngitsoq.

- Aningaasanut qinnuteqaatit, suleqatigiinnissamut isumaqatigiissummi siunertarineqartunut naammassinnissimappata, nuannaarutigalugu suliarerusuppavut, tusagassiuutitigut nalunaarummi allassimasoqarpoq.

Aningaasaateqarfimmut akiliisanngitsut

Kommuneqarfik Sermersooq siusinnerusukkut paasissutissiivoq, Greenland Ruby aningaasaateqarfimmut aningaasanik akiliisarsimanngitsoq.

Taamaattorli Greenland Rubymi pisortaq, Peter Madsen, isumaqarpoq, ingerlatseqatigiiffik aningaasaateqarfimmut aningaasanik amerlavallaanngitsunik akiliuteqarsimasoq – 50.000 aamma 70.000 koruunit akornanniittunik – kisiannili Sermitsiaq.AG-mut uppernarsaatinik suli saqqummiussisimanani. Taakkuali Greenland Rubymit akiliutigineqartussaagaluartunit, 1,5 million koruunit missaanniittunit, ikinnerungaatsiarput.

Taamaattumik aningaasaateqarfimmit aningaasanik akiliuteqarfigineqartarsimanngitsumit aningaasanik qinnuteqarneq Qeqertarsuatsiaani innuttaasut sumik pissarsissutigisimassagaluarneraat ersernerluppoq.

Sermitsiaq.AG paasisaqarnerujumalluni Greenland Rubymut saaffiginnissimavoq.

Qinnuteqaatinik utaqqisut

Paatsoortoqarsimassappat, sooq taava Greenland Ruby aatsaat maanna tamatuminnga erseqqissaassuteqarpa, tassa Sermitsiaq.AG-p pisortamik Peter Madsenimik oqaloqateqarneranit Greenland Rubyllu akiliuteqartarsimannginneranik allaaserisap siulliup allanneqarneranit qaammatit marlungajaat qaangiuttullu?

- Taamaappoq paatsoortoqarsimammat aatsaat maanna akissuteqartoqarluni.

Karsi matoqqasimassanngippat, taava aningaasanik qassinik imaqarpa?

- Aningaasanik tunniussisinnaalersinnata qinnuteqaatinik suliarineqartussanik utaqqivugut. IBA-mik isumaqatigiissummi allassimasoqarpoq, aningaasanik tunniussisinnaalersinnata suliniutinut qinnuteqaatinik nassiussisoqartoqartassasoq. Maanna Qeqertarsuatsiaat Greenland Ruby A/S-imut qinnuteqaammik suliaqarnissamut apeqqutaalerpoq.

Aningaasanik qinnuteqartoqarniariarpat Greenland Rubyp aningaasaateqarfimmut aningaasanik qanoq amerlatigisunik akiligassaqarnera pillugu Qeqertarsuatsiaani innuttaasut ilisimatinneqassappat?

- Aap, soorlu IBA-mik isumaqatigiissummi taama allassimasoqartoq. Nunaqarfimmi Qeqertarsuatsiaani innuttaasunit qinnuteqaatinik utaqqivugut. Qinnuteqaatinik tigusaqarutta tamakkua suliarineqassapput.

Aningaasaateqarfimmut aningaasanik akiliisoqartarsimanngimmat qinnuteqaataasinnaasunut aningaasanik tunniussinissaq Greenland Rubymit qanoq eqqarsaatigineqarpat?

- Aningaasanik tunniussuineq pissaaq komitep qinnuteqaataasinnaasunik, IBA-mik isumaqatigiissummi maanna atuuttumi peqqussutit malillugit nalilersorneqarsimasunik, akuersissutiginnittarnera ilutigalugu.