Aatsitassarsioqatigiiffik naammagittaalliuutimini ajorsartoq

Aatsitassarsioqatigiiffik Greenland Minerals Aatsitassanik Suliassaqarfinnut Avatangiisinut Aqutsisoqarfimmut Kuannersuarni suliniut pillugu VVM-imik nassuiaammut atatillugu ukioq manna apriilimi sakkortuumik isornartorsiuivoq. Isornartorsiuineq sutigut tamatigut tunngavissaqanngitsoq, suliassaqarfimmi oqartussanit qullerpaanit aalajangiinermi takutinneqarpoq

John Mair, administrerende direktør, CEO, Greenland Minerals and Energy
Greenland Minerals pisortaa, John Mair, Aatsitassanik Suliassaqarfinnut Avatangiisinut Aqutsisoqarfimmut naammagittaalliuutimini taperserneqanngilaq.

Naalakkersuisut oqartussatut qullerpaatut naammagittaalliuummik suliarinnittuupput, aalajangiinerlu allaffissornikkut oqartussaqarfimmut allamut ingerlateqqinneqarsinnaanngilaq.

Aalajangiinermi ima allassimasoqarpoq:

- Naalakkersuisut inerniliipput, Greenland Mineralsip (GML) naammagittaalliuutaa 4. april 2019-imeersoq tunngavissaqanngitsoq, GML-ilu paasissutissanik Aatsitassanik Suliassaqarfinnut Avatangiisinut Aqutsisoqarfimmut isornartorsiuinissamut pisinnaatitsisunik saqqummiussaqarsimanngitsoq.

- Naalakkersuisut GML peqquaat, aalajangiinerni aqutsisoqarfiup aalajangiussaani peqqussutit Aatsitassanik Suliassaqarfinnut Avatangiisinut Aqutsisoqarfimmit aalajangersarneqartut maleqqullugit.

Pisariusoq pisariunngitsorluunniit?

GML-ip apeqqusersimavaa, ”aatsitassarsiornermik suliniutip pisariusorujussuartut isigineqarsinnaanera, avatangiisitigullu aarlerinaatit tamatumannga kalluarneqarnerat. GML inerniliivoq. pingaartumik oqaaseqatit GML-imut siunnersortinit Arcadisimit aamma ERM-imit pisut innersuussutigalugit, suliniut pisariikannersuusoq akerleriissutissaanngitsorlu, aamma Avatangiisinut Aqutsisoqarfik pisuutinneqartoq VVM-imik nassuiaammut paasissutissiinissamut tunngavissanik ingasaassanik piumasaqaateqarsimasutut, tassunga ilanngullugit pujoralaat qinngornerillu pillugit paasissutissanik katersinermut tunngasut. GML-ip ilanngullugu isoraa, Avatangiisinut Aqutsisoqarfiup paasissutissanik sukumiinerusumik qinnuteqarsimanera uteqqiinernik pisariaqanngitsunik imaqarnerusutut suliamillu ingerlatsinermik sivitsorsaaginnarnerusutut GML-imullu annertuunik aningaasartuuteqassutaasussatut”.

Paasissutissanik takunnissinnaatitaaneq

John Mairimut Greenland Mineralsimeersumut allakkani arfinilinnik qupperneqartuni, Sermitsiaq.AG-p takunnissinnaatitaaneq tunngavigalugu pissarsiarisimasaani, ilaatigut ima allassimasoqarpoq:

- GML VVM-imik nassuiaatip akuersissutigineqarnissaanik qinnuteqaatip suliarineqarnerata tamarmiusup ukiunik arlalinnik sivisussuseqarsimaneranut akisussaaffiup ilarujussuanik tigusisariaqarpoq, GML peqqussutigineqartunik malinnissimanngimmat. GML imaluunniit GML-ip siunnersortai naliliinermut Kalaallit Nunaanni oqartussanit piginnaasaqarluartunit aalajangersarneqarsimasumut taarsiullugu suut pisariaqarnerannik naliliisussaatitaanngillat.

Atortussiassat radiup qinngorneranik akoqartut

Avatangiisinut Aqutsisoqarfik isumaqarpoq, ”piumasaqaatinik naleqquttunik annertusiartortunillu piumasaqaateqarsimalluni, GML-ip Narsap ungasinngisaani tatsimut sinnikunik tailingsinik toqqorterinissamik pilersaaruteqarnera pingaartumillu atortussiassat radiup qinngorneranik akoqartut piiarneqartussaanerat eqqarsaatigalugit”

- Naalakkersuisut maluginiarpaat, GML siunnersortaalu isummersimasut, radiup qinngornera uranimit thoriumimillu qallorneqartunit pisoq annikitsuinnaasoq suliniummullu immikkut pisariunerulersitsinngitsoq. Taama isiginninneq Naalakkersuisunit ernummatigineqarpoq oqaaserineqartunullu GML-ip VVM-imik misissuinerit pillugit suliassat allassimaffiat pillugu tusarniaanermi akissutigisaanut naapertuuttuunani, GML-ip pisortaanut allakkani allassimasoqarpoq, taakkunanilu innersuussutigineqarluni, Naalakkersuisut maleruagassanik nunat tamalaat akornanni atomimik nukissiuuteqarnermut aqutsisoqarfimmit Det Internationale Atomenergiagenturimit aalajangersarneqarsimasunik malinninnissamut pisussaafffeqartut.

John Mairimut allakkat atsiorneqarsimapput Naalakkersuisut siulittaasuannit Kim Kielsenimit aamma Pinngortitamut Avatangiisinullu naalakkersuisoqarfiup pisortaanit Mette Skarregaard Pedersenimit.

Powered by Labrador CMS