Aatsitassanut Naalakkersuisoq: Nukissamik ataavartumik maanna siunniussissaagut

Naalakkersuisut nassuerutigaat nunatta uuliasiornermut gassisiornermullu periusissiaata ingerlateqqinnissaanut piffissaq minnerunngitsumillu soqutiginninneq eqqarsaatigalugit tunngavissaqanngitsoq. – Nunarput maannamut nunatta killeqarfiata iluani uuliaqarneranik misissuineq pilerinarsarniarlugu aningaasarpassuarnik atuisimavoq, tamatumali peqatigisaanik nunarsuarmi 2050 nallertinnagu nukissiuutinik avatangiisinut mingutsitsinnginnerusunik atuilernissaq sulissutigineqarluni.

Nunarput nunap killeqarfiata iluani uuliaqarneranik misissuineq soqutiginarsarniarlugu annertuumik iliuuseqarsimavoq, kisianni nunat tamalaat akornanni uuliasioqatigiiffissuarnit soqutiginnittoqarsimanngilaq, aamma Naalakkersuisut isumaqarput uuliasiornermut gassisiornermullu periusissiap atorunnaarsinnissaanik aalajangiineq piffissaq eqqarsaatigalugu nunatta nukissiuuteqarnikkut periarfissaasa ikummatissaniit nukissiuutinut ataavarnerusunut avatangiisinullu mingutsitsinnginnerusunut sammitinneqalernissaanut aallaavissaalluartoq, aviisi Sermitsiaq allappoq.

- Avatangiisinut akisussaassulimmik politikkimik takutitsinissaq Naalakkersuisunut pingaarutilerujussuuvoq, nunatsinniinnaanngitsoq aamma nunarsuarmi. Isumaqarpugut Kalaallit Nunaat, allanit annermik silap pissusianut avatangiisinullu qajassuussisumik nukissiuuteqarnermut politikkimik siuttuulluni sorsuutiginnittariaqartoq sorsuutiginnissasorlu, taamaalilllunilu suliassaqarfimmi ersarissunik piviusorsiortunillu anguniagaqarnikkut iluaqutissat nalilerujussuit pissarsiarinissaannut periarfissat pilersillugit, isumaqarpugullu periusissiap iperarnissaanut piffissaq eqqortuusoq, nalunngilarpummi periusissiaq aaqqiissutinik tigussaasunik kinguneqarnavianngitsoq, tamatumali akerlianik silap pissusianik avatangiisinilu ajornartoornermik qanoq pimoorussutiginitsinnik qularsaarutaasinnaasoq, Naaja H. Nathanielsen erseqqissaavoq nangillunilu:

- Uuliasiornermut periusissiaq ullumikkut atuuttoq (2020-2024) akileraartarnikkut pissutsit pilerinassuseqarluartut, paasissutissat akeqanngitsut nittarsaassinermillu suliniut annertusisaq akuleriissillugit qillerininissamut soqutiginninnermik nutaanngortitsinissamik isiginninniarfiusimavoq, kisianni suliniuteqarneq qanorluunniit annertutigisimagaluarpat, tamanna pissarsissutaasimanngilaq, nunat tamalaat akornanni uuliasioqatigiiffissuit soqutiginninnginnermikkut takutissimavaat, peqarfinnit ingerlatanik iluanaarutaasunik piorsaanissaq qanorluunniit pisoqaraluarpat ajornakusoortorujussuussasoq, ilaatigut taama Naaja Nathanielsen aviisimut Sermitsiamut oqarpoq.

Allaaserisaq tamaat uani aviisi Sermitsiaq-mi atuaruk:

Powered by Labrador CMS