Aatsitassanut naalakkersuisoqarfimmi pisortaq: Akuersissut uranimut tunngassuteqanngilaq
Bluejay Mining aatsitassanik nalinginnaasunik, kuultimik uranimillu Kujataani misissueqqaarnissamut akuersissutaateqalersimallutik nalunaaruteqarsimapput. Aatsitassanilli qinngornernik ulorianartortaqartunik misissueqqaarnissamut akuersissutaateqarneq eqqortuunngitsoq, aatsitassanut naalakkersuisoqarfik ilisimatitsivoq.
Bluejay Mining Kujataani Thunderstone Pojekt pillugu misissueqqaarnissamut martsip 18-ani 2020-mi akuersissutinik marlunnik tunineqarpoq.
- Nuannaarutigalugu nalunaarutigisinnaavarput Kujataani aatsitassarsiornissamut misissueqqaarnissamut akuersissutinik marlunnik, katillugit 2.025 km2-isut annertussuseqartunik, tunineqaratta. Thunderstone Projektimi aatsitassanik nalinginnaasunik, kuultinik uranimillu misissueqqaassaagut, Bluejay Mining linkedin-imini nittartakkaminilu allappoq.
- Uppernarsarsinnaavarput Bluejay Mining plc. suliffeqarfiutini Disko Exploration Ltd. aqqutigalugu Kujataani Ikerassassuup eqqaani misissueqqaarnissamut akuersisussutaateqalermata, aatsitassanut naalakkersuisoqarfimmi pisortaq, Jørgen Hammeken-Holm uppernarsaavoq.
Suliffeqarfilli uranisiornissamut misissueqqaarnissamut akuersissutaateqanngitsoq, naalakkersuisoqarfiup pisortaa nassuiaavoq.
- Suulluunniit aatsitassat pinngoqqaatillu misissueqqaarnerminni misissorsinnaavaat. Killilersuutaasutuaq tassaavoq suliffeqarfik aatsitassanik qinngornernik ulorianartortalinnik misissuinissamut akuersissutaateqanngimmat, soorlu urani taamaattoq, Jørgen Hammeken-Holm Sermitsiaq.AG-mut nassuiaavoq.
Oqaloqatigineqassapput
Naalakkersuisoqarfiup pisortaata Jørgen Hammeken-Holmip suliffeqarfiup saqqummiussaani kukkusumik nalunaaruteqartoqarnera ajuusaarutigaa.
- Aatsitassanut naalakkersuisoqarfiup aatsitassanut aqutsisoqarfik aqqutigalugu suliffeqarfik aprilip 23-at 2020 ilisimatippaa, suliffeqarfiup nittartakkamini paatsoornarsinnaasumik ilisimatitsisimasoq.
- Oqaloqatiginiaqqittariaqassavagut, avammut nalunaaruteqarnermi paatsoornarsinnaasumik ilisimatitsineq pisinnaannginnatsigu, naalakkersuisoqarfiup pisortaa oqarpoq.
Bluejay Mining London AIM marketimi aamma Frankfurtimi niueqatigiittarfinni ilaatigut allattorsimavoq.