Aatsitassanut inatsit nutaaq tatiginnikkunnaarnermik taasititsisoqarnerata, kinguartitsisoqarnerata aamma sakkortuumik oqallittoqarnerata kingorna akuerineqarpoq

Ataatsimiinnermi ullormi kingullermi aatsitassanut inatsit pingajussaaneerneqarpoq, tassalu akuerineqarluni. Inatsisartuni suliarineqarnera illuatungiliuttunit isornartorsiorneqarpoq, taakku aatsitassarsiornermik suliaqartunut aningaasaliinissanut inatsisip sunniuteqarnissaanut ernumassuteqarput.

Aatsitassanut naalakkersuisup, Aqqalu B. Egede ernumassutissaqarnermut isumaqataanngilaq.

Inatsisissatut siunnersuut tunngaviusumik isumaqarpoq, pissutsit ullumikkut aatsitassanut inatsimmik aaqqissugaasut, inatsisinit pingasunit aaqqinneqartalissasut: Pissutsinut aatsitassarsiornermik nalinginnaasumik ingerlatsinermut tunngasunut immikkut aatsitassanut inatsit. Annikitsumik aatsitassarsiornermut annikitsumik aatsitassarsiornermut akuersissutinut aamma saffiugassanik atuinermut najukkamilu sanaartornermut attaveqaasersuutinullu suliniutinut immikkut inatsit.

Inatsisissatut siunnersuut Inatsisartuni assortuussutaavoq.

Aappassaaneerneqarnera unitsikkallarneqartoq

Sapaatip akunnerata siuliani aappassaanerinnittoqarnerani inatsisissatut siunnersuut Inuussutissarsiornermut Aatsitassanullu Ataatsimiititaliamut suliareqqinneqartussanngortinneqarpoq, taamaattumillu aappassaaneerneqarnera aatsaat marlunngornermi naammassineqarluni.

Inatsisissatut siunnersuummi ataatsimiititaliaq allannguutissanik arlalinnik piffissaq kingulleq atorlugu suliaqarpoq. Tamatuma Naalakkersuisut piffissamit tatineqalersippai, ilaatigullu Atassummi siulittaasoq Aqqalu C. Jerimiassenip oqarnera naapertorlugu, inaarutaasumik inatsisissatut siunnersuut pingajussaaneerneqarnissaata aallartinnissaa sioqqutilaarlugu Inatsisartut tiguaat.

Tamatuma saniatigut partiit illuatungiliuttut pingasut Naleraq, Demokraatit aamma Atassut, inatsisip nutaap aatsitassarsiortitseqatigiiffiit nunatsinni aningaasaliinissaannut ajornakusoornerulersitsinissaanik isornartorsiuipput. Tassunga atatillugu partiit Aqqaluaq B. Egedemut tatiginnikkunnaarnermik taasititsipput.

- Suliaq tukattoq pitsaasumik kinguneqarsinnaanngilaq, inuiaqatigiillu suliarinerluta maanna akilertussanngorpaat, Demokraatineersoq Jens-Frederik Nielsen ilaatigut taama oqarpoq.

Tatiginnikkunnaarnermik taasititsinerli amerlanerussuteqartunit 16-nit tallimat akerleralugit itigartinneqarpoq, taakku naalakkersuisumut tatiginnillutik nalunaaruteqarput, taassumalu siunnersuummik suliaqarnini oqaluttarfimmit illersorpaa:

- Aatsitassarsiornermik suliaqartut inatsimmik suliaqarnermi ilaatinneqaannavinnikuupput, inatsisissatullu siunnersuutip pitsaassusaata qulakkeernissaanut tunuarsimaanngilanga. Oqaatsikka attappakka, Aqqaluaq B. Egede oqarpoq.

Inatsisartuni siulittaasoq kaammattuiniarsarisoq

Illuatungiliuttut tatiginnikkunnaarnermik taasititsinikkut naalakkersuisoqatigiit ataqatigiinnerannik misileraapput, taakkualu tassani angusipput.

Pingajussaaneerinninnermi Inatsisartut siulittaasuat Kim Kilesen arlaleriarluni aamma oqariartuuteqarpoq, tassanilu politikerit uteqattaaralutik oqallinneq aallaqqaataaniik oqallisigeqattaassanngikkaat kaammattuivoq, tassami pingajussaaneerneqarmat.

Inatsisissatut siunnersuut ataatsimiititaliamut suliassanngorteqqinneqassasoq illuatungiliuttut siunnersuuteqarput, Kielsenilu taasititsivoq.

Tassanilu naalakkersuisoqatigiinni minnerusumik isumaqatigiinngitsoqarnera paasinarsivoq, Siumumi ilaasortaq akuersinani imaluunniit itigartitsinani taasinngimmat. Najaaraq Møller pineqarpoq, taanna Siumut Nuummi aamma ilaasortaavoq. Najukkami immikkoortortaqarfik aatsitassanut inatsisissamik suliaqarnerup ingerlanneqarneranut Facebookikkut akerliunerminik allagaqarnikuuvoq. Immikkoortortaqarfik suliap ingerlanerani peqataatinneqarnerusariaqarluni isumaqarpoq.

Akunnerit arlallit qaangiuttut unikkallarfiusartut, tatiginnikkunnaarnermik taasititsinerup aamma tamatuminnga itigartitsisoqarnerata kingorna, aatsitassanut inatsit nutaaq 16-nit akuerineqarluni tallimanillu itigartinneqarluni akuerineqarpoq.