Aatsitassanut inatsisip qasukkaamisinnissaa amerlanerussuteqartut piumasaraat
Pinngortitap avatangiisillu illersorneqarnissaat pillugu aammali minnerunngitsumik aatsitassarsiorfiit nunatsinnut aningaasaleerusunnerisa qaffassarneqarnissaat pillugu aatsitassanut inatsimmi nunatsinni suliareqqiinissamik piumasaqaatit qasukkartinneqarnissaat Inuit Ataqatigiit sinnerlugit Inatsisartuni ilaasortap, Peter Olsen-ip piumasaraa.
Qularutigisassaagunanngilaq, aatsitassanik piiaanissamut akuersissutinik qinnuteqaateqartoqartillugu qinnuteqaatinik suliarinninnermi Naalakkersuisut ataatsikkut ujatsiuteqarlutillu unngersaqartartut, tassa peqqissaarussilluinnartartut, tassami manna tikillugu qinnuteqaateqartoqaraangat pisortat qinnuteqaatinik suliarinninnerannut atatillugu Naalakkersuisut naatsorsuutigisarpaat suliareqqiinerit nunatsinni ingerlanneqartassasut. Taamatut piumasaqaateqarnikkut qulakkeerniarneqartarpoq aatsitassarsiorfiit suliffissanik nutaanik pilersitsillutillu sulisuisa akileraarutitigut nunatta karsianut tunniuttagai aqqutigalugit nunarput annerpaamik pissarsitinneqassasoq. Taamaattorli maannamut pissutissalimmik ilimanarsivoq taamak sakkortutigisumik piumasaqaateqarneq aamma aatsitassarsiorfiutileqatigiit nunatsinni aningaasaleerusunnerannut annikillisaataasoq.
Aviisi Sermitsiaq taama allaaserisaqarpoq.
Ilaatigut tamanna tunngavigalugu Peter Olsen (IA) apeqquteqaat aallaavigalugu oqallinnissamik siunnersuuteqarpoq atsitassanut Inatsimmi aatsitassarsiorluni ingerlatseqatigiiffiit nunatsinni qallorneqartut suliareqqeqqaarlugit nunanut allanut anninneqarsinnaanerannik piumasaqarsinnaatitaaneq atuutiinnassanersoq.
- Nunatta aningaasarsiornera qajannaatsumik patajaatsumilllu ingerlaqqissappat, taava pisariaqartipparput aalisarnerup saniatigut, inuussutissarsiutunik nutaanik allanik pilersitsisoqarnissaa, Peter Olsen tunngavilersuivoq nangillunilu:
Periarfissallu ilagiinnarpaat aatsitassarsiorneq. Taamaattumik aatsitassarsiornerup inuussutissarsiutissatut nutaatut nunatsinni ineriartortitsittuarnissaa, aatsitassarsiorumasunullu nunatta pilerinarsarlugulu pisariillisartuarnissaa allaqqunneqarsinnaanngilaq.
- Uanili apeqquteqaat aallaavigalugu oqallisissiami oqariartuutiginiara unaavoq, aatsitassanut inatsimmi aatsitassap qallorneqartup nunatsinni suliareqqeqqaarlugu nunanut allanut aallaruttarnissaanik piumasaqarsinnaatitaarnerup apeqquserneqarnissaa. Aatsitassat qallorneqarsinnaasut uani pineqartut tassaapput; aatsitassat qaqutigoortut, aatsitassallu aallat pinngortitamullu ulorianaateqarsinnaasut.
Taamaalilluni Peter Olsen siunnersuutini aqqutigalugu aatsitassanut inatsimmi piumasaqaatit allanngortinneqarnissaannik ujartuivoq. Taanna isumaqarpoq piumasaqaatinik qasukkaallatsitsineq pinngortitamut avatangiisinullu iluaqutaaginnarani aammali taamatut allannguisoqarneratigut piiaasinnaanissaminnut qinnuteqaateqartut eqaannerusumik pilertornerusumillu sullinneqarsinnaalissasut.
Tamanna pillugu Sermitsiami paasisaqarnerugit – uani ataani aviisimut isissutissarsigit: