Aatsitassanut inatsisip pingajussaaneerneqarnerani paatsiveerusimaarneq – naalakkersuisumut tatiginninngittoqartoq

Naalakkersuisoq Aqqaluaq B. Egede (IA) aatsitassanut inatsisip nutaap suliarineqarnerani Inatsisartunik aamma inuussutissarsiortunik peqataatitsilluanngilaq, partiit illuatungiliuttut pingasut taama isumaqarput.

Aatsitassanut inatsimmut nutaamut siunnersuut annertooq politikkikkut annertuumik isumaqatigiinngissutigineqarpoq.

Pingasunngornermi nal. 12.15 missaani inatsisissatut siunnersuutip suliarineqarnera aammaarluni unitsikkallarneqartariaqarpoq, Atassut aatsitassanut inatsisinillu atuutsitsinermut naalakkersuisumut, Aqqaluaq B. Egedemut (IA) tatiginnikkunnaarnermik taasititsiniarmat.

Partiit illuatungiliuttut pingasut Naleraq, Atassut aamma Demokraatit tatiginnikkunnaarnermik taasititsisuupput.

Suliarinninneq pitsaanngitsoq

Aatsitassanut inatsimmut nutaamut inatsisissatut siunnersuutip suliarineqarnera partiit ullumikkut tatiginnikkunnaarnermik taasititsiniartut naammagisimaarinninngilluinnarput.

Politikerit ilaasat siunnersuummut allannguutissat ullormut ataatsimiinnissap aallartilernerani aatsaat tigusimammatigit, ilaatigut isornartorsiorneqarpoq.

- Naalakkersuisoq inuussutissarsiortunut Inatsisartunullu tusarnaanngilaq. Aatsitassanik suliaqarnerup nunatsinnut isertitaqarnerulersitsinissaanik ataatsimut anguniaqarnitsinnut tamanna akornusiivoq, Atassutip siulittaasua Aqqalu C. Jerimiassen oqarpoq.

IA-meersup Peter Olsenip Naalakkersuisunit tunuarnerata aqaguani paatsiveerusimaarneq pivoq – tamanna tatiginnikkunnaarnermik taasititsinerup kingorna aamma pivoq.

Múte B. Egede aatsitassanut inatsisinillu atuutsitsinermut suliassaqaarfimmut nutaamik naalakkersuisumik pissarsiortariaqassanersoq, minutsit arlaqanngitsut qaangiuppata aalajangerneqassaaq.

Aqqaluaq B. Egede IA-mi siulittaasumut tulliuvoq, tunuartariaqalissappallu partiimut ajorsarneq annertussaaq. Ataatsimiinneq 12.45 aallarteqqinneqassaaq.

Ataatsimiititaliamit suliarineqaqqinnissaanut taasititsineq

Inatsisissatut siunnersuutip pingajussaaneerneqarnera, Inatsisartuni siulittaasup Kim Kielsenip arlaleriarluni naqissuserpaa, politikerillu aallaqqaataaniik oqallittariaqannginnerarlugit.

Kielsen tassunga atatillugu siunnersuutip ataatsimiititaliamit suliareqqinneqassanersoq taasititsissutigaa.

Taasinernik 5-15-inik itigartinneqarpoq.

Powered by Labrador CMS