Skip to main content

Aatsitassanut Ataatsimiititaliaq uranimik piiaanermik paasisassarsiortoq

Aatsitassanut Ataatsimiititaliaq Finlandimut aatsitassanik ilaatigut uranimik piiaanermit misilittakkanik paasisassarsiorluni angalasimavoq

Finlandimi misilittakkat erseqqilluinnartumik takutippaat piiaanissamik akuersissuteqartoqannginnera pissutsit tamaasa qulaajaqqaarnagit suliniutinut akuersissuteqarneq akisoorujussuusinnaasoq. Taama Inatsisartuni Aatsitassanut Ataatsimiititaliaq Finlandimi piiaaffimmut Talvivaaramut takuniaareerluni inerniliivoq. Aatsitassarsiorfik taanna aniasoortoqareernerata kingorna matuneqarpoq maannalu annikillisamik ingerlanneqarluni.

Aatsitassanut Ataatsimiititaliamut ilaasortat paasissutissani ilanngunneqartuni takukkit.

Inatsisartut Aatsitassanut Ataatsimiititaliaat sapaatip-akunnerani qaangiuttumi Finlandimut paasisassarsiorluni angalavoq, ilaatigut Talvivaarami aatsitassanik piiaavimmut, ilaatigut imermik akuutissanik assigiinngitsunik akulimmik aniasoortoqarnerata kingorna, 2012-imi novembarimi matusariaqarsimasumut atatillugu misilittakkanik kingunerisimasaanillu tusarusulluni. Ingerlatseqatigiiffik Talvivaaramik ingerlatsisoq maanna akiliisinnaajunnaarsimavoq, aatsitassanilli qallorneqarsimasunik tunisassiorneq annikillisamik saliinerup ingerlanerani pisortanit ingerlanneqaannarluni.

Aatsitassanik qalluivimmi annerusumik nikkel, kanngussak zinkilu tunisassiarineqarput, qallorneqartorlu uranitaqalaarmat aamma taanna tunisassiarineqarsinnaasutut eqqarsaatigineqarluni. Taama ataatsimiititaliaq tusagassiorfinnut nalunaarummi Inatsisartunit tamanut saqqummiunneqartumi paasissutissiivoq.

Aatsitassanut Ataatsimiititaliap Talvivaarami sulianut atatillugu Finlandimi oqartussat assigiinngitsut, avatangiisinik illersuiniaqatigiiffit attuumassutillit, sumiiffimmi nakkutilliinermut oqartussat aatsitassarsiorfimmilu sulisut oqaloqatigaat.

Aatsitassanut Ataatsimiititaliaq isumaqatigiissoq inerniliivoq, aatsitassanik qalluisoqassatillugu periaatsit atorneqartut killiliussallu ingerlaavartumik nalilersorneqartarnissaat – nalilersoqqinneqartarnissaallu – pisariaqartoq.

Taamaattumik ataatsimiititaliamut aatsitassanik piiaavimmut taamaattumut qanimut alakkaaneq isummarsiorfiulluarlunilu ilinniarfiulluarpoq. Ataatsimiititaliaq angerlassaaq ilisimasarnerulersimalluni, taamatullu aamma taamatut aniasoortaqarnerata malitsigisinnaasai takusinnaalersimallugit, tusagassiorfinnut nalunaarummi atuarneqarsinnaavoq.

Ataatsimiititaliap aamma pingaartippaa, aniasoornerup toqqaannartumik kinguneranik Finlandimi oqartussat nassuerutiginnissimanerat susassaqartut tamarmik akornanni pitsaanerusumik oqaloqatigiittarnissaq pisariaqartoq, tamannalu tunngavigalugu piujuartitsinermik tunngavilimmik aatsitassarsiorneq pillugu attaveqaqatigiittarfimmik pilersitsisoqarsimanera, maanna ataavartussanngortinneqarsimasumik. Aniasoornerup kingorna attaveqaqatigiittarfiup aatsitassarsiorneq eqqarsaatigalugu inatsisiliornerit tamaasa iluarsisariaqarnersut misissuataarsimavai pingaartissimallugulu aatsitassarsiornermik ingerlatallit, avatangiisinik illersuiniaqatigiiffiit takornariartitsisarnermillu ingerlatallit akornanni oqaloqatigiinnerulernissap pilersinneqarnissaa. Attaveqaqatigiittarfiup pineqartup pilersinneqarnerata kingorna pingaaruteqarpoq aamma oqaatigissallugu naak tamatigut isumaqatigiittoqartanngikkaluartoq oqaloqatigiittarnerit ingerlaannarnissaat annertusarneqarnissaallu kissaatigineqarmat, ataatsimiititaliaq tusagassiorfinnut nalunaarummi paasissutissiivoq.

Angalaneq iluatsillugu ataatsimiititaliap taamatuttaaq Danmarkimi DCE Risølu naapippai. Ataatsimiinnerni taakkunani annerusumik sammineqarput atortussiassat radiup qinngualanerinik aniatitsisartut, taakku sumut atorneqartarneri avatangiisinullu sunniutigisinnaasaat. Nunatsinni aatsitassarsiornermut uuliasornermullu atatillugu najoqqutassiat nutaat oqallisiginissaannut aamma periarfissaqarsimavoq.

Aatsitassanut Ataatsimiititaliap Nordsøfonden ataasinngornermi aamma ataatsimeeqatigissavaa.

Aatsitassanut Ataatsimiititaliap isumaqatigiissup tusagassiorfinnut nalunaarummi qujassutigaa Finlandimi oqartussat danskillu aallartitaqarfiat ikiuulluarsimammata angalaneq sukumiisumik tamatigoortumillu pissarsivioqqullugu – aamma naak piffissaq angalaviusoq alakkakkani sulinngiffeqarfiugaluartoq.

Aatsitassanut Ataatsimiititaliap Finlandimut Danmarkimullu paasisassarsiorluni angalaneranit assilisat matuma ataani takukkit.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER