aatsitassat
Aatsitassanit isertitat kinguaariinnut tulliuttunut pitsaanerusumik qulakkeerneqassapput
Inatsisissatut siunnersuutip aatsitassarsiornermi aningaasaateqarfiup malittarisassai sukannernerulersissavaa, taamaalilluni erniat kisimik atorneqarsinnaassallutik.
Aatsitassat rubinit, aatsitassat qaqutigoortut imaluunniit zinki piiaraanni, taava meeqqagut ernuttagullu aatsitassanik tamakkuninnga piiaasinnaannginnerat isertuussassaanngilaq.
Iluaqutigisinnaaniassammatigit aatsitassarsiornermi aningaasaateqarfimmik pilersitsisoqarpoq, Namminersorlutik Oqartussat aatsitassat isertitaat tassunga akiliutigineqartussanngorlugit. Taamaalilluni aatsitassat nalingi paariinnarneqassapput, aatsitassat piiarneqareerlutillu tunineqareeraluartut.
Iluanaarutit kisimik atorneqarsinnaasut
Tamannali iluatsissappat, erniat imaluunniit aningaasaateqarfiup iluanaarutai kisimik atorneqartariaqassapput. Aningaasat akiliutigineqartut ilanngartuleraanni, taava kinguaariit tulliuttut pissarsiaqanngitsoortinneqassapput.
Tamannalu manna tikillugu aamma tunngaviusumik atuuppoq, tassa ungasissoq eqqarsaatigalugu nunap aningaasaqarnikkut ineriartornera aningaasaateqarfiup qulakkiissagaa, kisianni aningaasat ikineqartut atorneqannginnissaat erseqqissumik oqaasertalerneqarnissaa maluginiarneqarsimanngilaq.
Immikkut pisoqarsinnaasoq
Tamanna maanna allanngortinneqassaaq. Aningaasaateqarfiup iluanaarutai kisimik, tassa erniat atorneqarsinnaasut, inatsisissatut siunnersuummi naqissuserneqarpoq. Taamaalilluni malittarisassat norskit uuliasiornermik aningaasaateqarfianut assingulerlutik.
- Siunnersuutip immikkut siunertarivaa siunissami kinguaariit soqutigisaasa illersorneqarnissaat, tassa aningaasaateqarfiup aningaasaataasa pissutsini immikkut ittuni taamaallaat tunniunneqarsinnaanngorlugit, kiisalu taamaaliornikkut aningaasaateqarfiup aningaasaatai ataatsimut isigalugu ileqqaarneqassasut nungukkiartuaarnagit. Taamaattumik pingaarnerpaavoq aningaasaateqarfiup piviusumik nalingata piffissap ingerlanerani ataannarnissaa, inatsimmut oqaaseqaatini nalinginnaasuni tamanna allaqqavoq.
Tassami suli immikkut pisoqarsinnaavoq, aningaasaateqarfimmit aningaasat atorneqarsinnaallutik. Taamaalilluni Danmarkimit naalagaaffimmit tapiissutit ikilineqassappata, akiligassavinniit atuisoqarsinnaalluni.
Inatsisissatut siunnersuut ukiaanerani ataatsimiinnermi oktobarip pingajuanni suliarineqassaaq. Inatsisartunit aalajangiiffissatut siunnersuutip Naalakkersuisut inatsisissatut siunnersuutiliornissamik taanna suliakkiissutaavoq.
Lovforslaget behandles på efterårssamlingen 3. oktober. Det var et beslutningsforslag far Inatsisartut, der pålagde Naalakkersuisut at udarbejde lovforslaget.