Aatsitassanik Uninngatitsivissaq arlalinnik piumasaqaateqarfigineqartoq
Nuup avannaata tungaani aatsitassanik uninngatitsivissaq Sanarfinermut Avatangiisinullu Ingerlatsivimmit arlalinnik piumasaqaateqarfigineqarpoq, ataatsimiititami politikkerinut inassuteqaammi piumasaqaatit ullumi isummerfigineqassapput.
Kommuneqarfik Sermersuumi Sanarfinermut Avatangiisinullu Ingerlatsiviup Aqqartartut suliffeqarfiata Maliup Nuummi Pinerluuteqarsimasunut inissiisarfiup avannaata tungaani aatsitassanik uninngatitsiviliorniarnera tunngaviatigut ajorinngilaa. Pilersaarutaavoq talittarfiliornissaq, tassani immamit atortussat suliarineqarineqartassapput, immikkoortiterneqartarlutik, aserorterneqartarlutik toqqorneqartassallutillu.
Pilersaarut kommunimi ataatsimoorussamik inuussutissarsiuteqarfimmik kiisalu Illoqarfiit Pingaarnersaat pillugu Periusissiami kommunip siunniussaanut pilersaarut naleqquttuusoq, ingerlatsivimmi pisortap Hans Henrik Winther Johannsenip nalilerpaa, arlalinnilli piumasaqaateqarluni.
Nunaminertat annertuut
Sanaartorfissanut pingasunut 1.200, 1.600 aamma 2.000 kvadratmeteriusunut suliniut agguarneqarsimavoq.
- Ingerlatsivimmit qinnuteqarfiusup annertussusaanut tunngatillugu sukumiisumik nassuiaatit, sanaartorfissamullu atugassani ilanngunneqarsimasut assitalersukkat sooq taama angissuseqarnerannut nassuiaat amigaatigineqarput. Pilersaarummut paasissutissani titartakkat takussutissaasut ersarissumik takutippaat nunaminertat annertuut pineqartut. Tamanna qularunnaartitsisumik takussutissiinngilaq annertussusissaanut tunngatillugu misissuisoqarsimasoq taakkulu immikkoortumi inuussutissarsiortunut allanut akornutaasinnaapput, suliassamik saqqummiussissummi allassimavoq.
Ingerlatsivimmilli ernumassutigineqarpoq, ”inuussutissarsiuteqartunut allanut annertuumik inissaqartitsisoqannginnera” aamma maqaasineqarput ”mmikkoortumi sukisaarsaartarfiit attatiinnarnissaannut aaqqiissutaasinnaasut eqqarsaatigineqarsimannginnerat”.
Piumasaqaatit
Tamanna tunngavigalugu ingerlatsivimmit makku piumasaqaatigineqarput:
Pilersaarummik piginnittoq pisortat immikkoortumi sanaartofigissarsimasaanni suliaqarfissani nammineq akilernissaanut pisussaaffilerneqassaaq. Tassunga atatillugu 4-5- inik inuussutissarsiornermi nunaminertanik pilersitsisoqarnissaa pilersaarutaavoq.
Immikkoortumi inissiaqassanngilaq allanilluunniit unnuisarfeqassanngilaq.
Immikkoortumi pisuttunut ujakkaartunullu angalaarfigineqaannarsinnaanissaa sulissutigineqartariaqarpoq.
Inissamik pisariaqartitsineq sukumiinerusumik nassuiaatigineqassaaq.
Pilersaarutip ineriartortinnissaanut siunnersuutinut tunngatillugu piffissamut killiliussassanik piumasaqaateqartoqassaaq.
Politkkerit pilersaarutip immikkoortua siulleq akuerissappassuk aqqartartunut nunaminertamut inniminniissut ukiuni marlunni atuuttussaq tunniunneqassaaq, soqutiginnittorlu nammineq immikkoortumut sukumiisumik aalajangersagartalimmik kommunimut pilersaarummut tapiliussassatut siunnersuusiussaaq, kommunip piumasaqaataanut naapertuuttunik. Tamatuma kingorna nunaminertaq sanaartorfiusussaq akuersissuteqarfigitinnagu pilersaarummut tapiliussaq VVM-ilu pillugu nalunaarusiaq tusarniaassutigineqassapput.
Ataatsimiititaq ullumi ataasinngornermi nal. 17.00 ataatsimiissaaq, tassani suliaq suliarineqassalluni.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...