Suliffimmik misiliineq

Aatsitassalerinermik ilinniartut Islandimi suliffimmik misiliilersut

Aatsitassalerinermik Ilinniarfimmi ilinniartut marluk ÍSTAK-imi praktikkerfissarsipput

Kalaallit Islandimi ilinnialertut aappaat, 25-inik ukiulik Jørgen Petersen

Oktobarip aallaqqaataani 25-inik ukiulimmut Jørgen Petersenimut Narsameersumut aamma 26-nik ukiulimmut Jan Olsenimut Nanortalimmeersumut ilinniarneq aallartissaaq, taakku Islandimut sulififimmik misiliiartorlutik aallassapput, Sisimiuni Aatsitassalerinermik Ilinniarfik ilisimatitsivoq.

Aatsitassalerinermik Ilinniarfimmi tunngaviusumik ukiuni marlunni aatsitassalerisutut ilinniarnertik naammasseqqammerpaat.

Assit takukkit: Aatsitassanik Ilinniarfimmi ulloq oqaluttuarisaanermut malunnaatilik

Piaaffeqanngitsoq
Taakku piiaaffimmi ilinniartuuniaraluarput, kisianni ukioq manna pisinnaasimanngilaq. Suliffinnik misiliiffissanik amigaateqartoqarpoq, taamaammat Aatsitassalerinermik Ilinniarfik allatut eqqarsarpoq, nunamullu sanilerisamut Islandimut kalaallinut sulilluni ilinniarfissaqarnersoq aperivoq.

Bjarki Thor Iversenip, ÌSTAK-imi sulisoqarnermut pisortap pitsaasumik akivoq, Aatsitassalerinermut Ilinniarfiullu ilinniartunut misiliutaanut aqutsisunngorluni.

ÍSTAK-ip ilinniarfik aamma kalaallit sulisussat tapersersorusuppai, immikkullu isumaqatigiissut piffissami sivikitsumi iluarsivaa.

Atuaruk: Aatsitassalerinermik Ilinniarfimmeersut suliffimmik misiliisinnaanngortut

Sanaartorfinni sulineq
Islandimukarneq nunarsuarmi suliffeqarfissuarmi sanaartornermik suliaqartumi pisinnaasanik nutaanik ilikkagaqarnissamut periarfissaavoq: ÍSTAK Mossfellsbærimi qullersaqarfeqarpoq.

Jan Olsen aamma Jørgen Petersen marluullutik maskiinarujussuarnik sulineq qillerinerlu nuannaraat. ÌSTAK-imilu tamanna misilittagaqarfigilernissaannut annertuumik periarfissaqarput.

Suliffimmik misiliineq qaammatinik arfinilinnik sivisussuseqarpoq, oktobarillu aallaqqaataani aallartissaaq. Taakkulu suliffimmik misiliisut Kalaallit Nunaannitut sulinermi atugassarititaasut unammillernartut peqqarniitsullu, soorlu nuna qeriuaannartoq, aput anorilu misilittagaqarfigilissavaat.

Powered by Labrador CMS