Aatsaavissuaq: ilisimatusarfimmi ilisimatuumik professorinngortitsisoqartoq
Ilisimatusarfiup nammineq ilisimatuuanik professorinngortitsisoqarpoq.
Inuiaqatigiinnik, Aningaasaqarnermik Tusagassiornermillu Ilisimatusarfimmi pisortaq Gestur Hovgaard professorinngortinneqarsimavoq.
Professori
Ilisimatuut akornanni atorfik qaffasinnerpaaq. Professorit ilisimatusarnerup ilinniartitsinerullu saniatigut ilisimatusartunut ilisimatusarfimmiluunniit immikkoortortaqarfimmi aqutsisututu atorfeqartarput. Professorip aqutsisutut ilisimatusartut – ilisimatusarfimmiluunniit immikkoortortaqarfiup – ingerlanneqarnissaat akisussaaffigisarpai. Pissarsiffik Videnskab.dk
- Gestur Hovgaardimik professoritut atorfinitsitsineq Ilisimatusarfimmi eqqaamaneqartuassaaq ilisimatuumik Ilisimatusarfimmiuusumik professorinngortitsineq siullerpaajummat, Ilisimatusarfik Facebookimini allappoq.
Ataatsimiititaliat isumaqatigiillutik naliliisuusut Gesturip professoritut atorfeqalernissaanik Ilinniagartuut Siunnersuisoqatigiiffiannut inassutiginnittut tassaapput professori Torill Nyseth Norges Arktiske Universitetimeersoq, professori Ivar Jonsson Østfold University College-imeersoq professorilu Peter Berliner Ilisimatusarfimmeersoq.
Gestur Hovgaard Savalimmiuneersuuvoq, 2017-imilu tusagassiortunngornianut, isumaginnittunngornianut, inuussutissarsiornermi aningaasaqarnermik ilinniagaqartunut inuiaqatigiilerinermillu ilinniagaqartunut akisussaasutut atorfinitsinneqarsimalluni.
Savalimmiuni ilisimatusarfiup siulersuisuini ilisimatuunullu siunnersuisartuni ilaasortaasimavoq.