Aasianni ujajaasoqarnerata kingorna ujaasineq
Tallimanngornerup unnuaani arnaq ujajaaffigineqarpoq, saassussinermut ilisimwaannittut politiit maanna ujaasipput.
Ulloq 2. november tallimanngornerup unnuaani nal. 05.00-ip missaani Aasianni arnaq aqqusinermi Atuarfittaamut, Ilinniarnertuunngorniarfiup qanittuani ujajaaffigineqarpoq. Kalaallit Nunaanni Politiit ujaasinerminni taama ilisimatitsipput.
- Arnaq tunuminiit ajanneqarpoq uppillunilu, tassanilu pinerluttup taartunik atisallip mobiltelefonia aningaasivialu tiguai, politiit allapput.
Arnap angut ima nassuiaatigaa:
- Angut, 180 cm-it angissusilik, nalinginnaasumik timeqarpoq, qernertumik nasartalimmik jakkeqarluni kiisalu taartunik qarleqarluni.
Angut saassussereerluni majuartarfikkut qummukarpoq kollegiep 14-ip tungaanukarluni, politiit taama ilisimatitsipput.
- Pinerluttoq qimaanermini politiit ajoqusersimassangatippaat, piffiup eqqaani aammik nassaartoqarnera pissutigalugu, politiit taama nalunaaruteqarput.
Politiit takunnissimasinnaasunik ujaarlerput. Takunnissimaguit, imaluunniit paasissutissanik pingaarutilinnik peqaruit, Aasianni Politiinut tlf. 70 14 24-mut saaffiginneqquneqarputit.