Aasianni rockertoqartussanngorpoq

Nipiaa Rock Festival 15-issaa Aasianni ingerlanneqassaaq, taannalu ullumi aallartissalluni.

Aasiaat timersortarfiani festivali ingerlanneqassaaq, nipilersoqatigiillu arfineq marluk tusarnaartitsissapput akunnerup naanerani. Piareersarnerit maannakkut ingerlanneqaleruttorput.

- Festivalimik aaqqissuisarnerput assut sungiussimavarput, tassami piareersarnerput pitsaanerusinnaanngilaq, aaqqissuisoq Peter Olsen oqarpoq.

Hans Jukku Noahsen, Tulleriit, Disco Bay Blues aamma Taaq ullumi tallimanngornermi tusarnaartitsissapput, aqagulu arfininngornermi Rockstones, Ulf Fleischer aamma Paarisa Band kiisalu H.E.J tusarnaartitsissallutik.

Aaqqissueqataagunnaartoq
Aasianni tusarnaartitsinermik aaqqissuisoq Peter Olsen ukioq manna kingullermik aaqqissueqataavoq. Festivalertitsisarneq 1999-mili aaqqissueqataaffigisarpaa.

- Inuusuttut aaqqissuisalertussanngorput. Aaqqissueqataasarunnaarnissara uppernanngingajappoq. Kisianni piffissaq pissutaalluni aaqqissueqataasarunnaalerpunga, Peter Olsen oqarpoq. Taanna ilaatigut aamma Inuit Ataqatigiit tunuliaqutaralugit Inatsisartuni ilaasortaavoq

Nunatsinni nipilersortartuuneq Sermitsiaq.AG-mit septembarimi sammisaritinneqarpoq. Nipilersortartut atugassarititaat inuunerallu ilaatigut allaaserineqartassapput. Nipilersortartut ilisimaneqanngitsut pillugit aamma allaaserinnittoqartassaaq. Allaaserineqartut uani atuakkit

Allaaserineqarsinnaasunik siunnersuuteqaruit Facebookikkut imaluunniit redaktion@sermitsiaq.gl-imut allagit