Aasianni Qasigiannguanilu erngup nukinganik nukissiorfissaq amigartooruteqartoq

Erngup nukinganik nukissiorfissaq Aasiannut Qasigiannguanullu siunissami pilersuissappat isertitassat aningaasartuutissallu pillugit apeqqutissarpassuaqartoqassaaq.

Qasigiannguimmi eqqaanni erngup nukinganik nukissiorfiliornissaq imaaliinnaq imminut akilersinnaanavianngilaq. Naalakkersuisulli anguniagaraat, nunap sapinngisamik nukissiorfinnik mingutsitsinnginnerpaasunik pilersorneqarnissaa. Suliassalli naammassineqarnissaa anguniarlugu Kangerluarsunnguami erngup nukinganik nukissiorfik, Nuummut pilersuisoq allililerlugu nukissiorfissamut atassuserneqartariaqassaaq. Suliassaq tamarmi taamaalilluni sinneqartoorfiulissaaq.

Naalakkersuisut erngup nukinganik nukissiorfiup allilerneqarnissaanik siunnersuutertik marlunngormat Inatsisartunut saqqummiuppaat.

- Qasigiannguani aamma Aasianni erngup nukinganik pilersuinermut nukissiorfissamut naliusoq 217 mio. koruuninik maannakkut amigartoorfiusussaavoq. Tassa imaappoq, ikummatissaq nunap iluaniittoq aallaavigalugu maannakkut nukissiuutinik pilersuinermut taarsiullugu, erngup nukinganit nukissiuuteqarluni pilersuineq, maannakkut aningaasartaanni inuiaqatigiinnut 217 mio. koruuninik ajornerulersitsissaaq. Kisiannili Nuummi allilerineq 465 mio. koruuninik maannakkut naliusumi ilorraap tungaanut sammissalluni, Inuussutissarsiornermut, Nukissiuuteqarnermut Ilisimatusarnermullu Naalakkersuisoq, Jens Svane (S), siunnersuummik saqqummiussigami oqarpoq.

- Tamanna tunngavigalugu suliassat ataasiakkaat marluk taakkua ataatsimoortinneqarsinnaapput, taamaattumillu aningaasaliinertut ataatsimoortutut isigineqarsinnaallutik, nangilluni oqarpoq.

Taamaalilluni suliassaq tamarmi 248 millioner koruuninik iluanaarfiussaaq.

Aamma erngup nukinganik nukissiorfissaq silap pissusaanut iluaqutaassaaq. Tassa taakkua ataatsimoorlutik ukiut 22-t ingerlaneranni ikummatissaq nunap iluaneersoq 545 millioner literi atorunnaarsissammassuk, CO2-mik 1,4 milloner tonsinik annikinnerusumik aniatitsinermut naapertuuttoq.

Borgmesteri qilanaalereersoq

Naalakkersuisut kingusinnerpaamik aappagu ukiakkut ataatsimiinnermi, Aasiaat Qasigiannguillu erngup nukinganik nukissiorfissaannik sanaartornissaq kiisalu Kangerluarsunnguami erngup nukinganik nukissiorfiup allilerneqarnissaa pillugit siunnersuummik saqqummiussissapput.

Kommune Qeqertalimmi borgmesteri, Ane Hansen (IA), nukissiorfissamut qilanaalereerpoq, Qasigiannguillu eqqaanni nukissiorfissaq iluatitsiffiulluarumaartoq isumaqarluni.

- Kommune Qeqertalimmi periarfissaq nutaaq atorluarsinnaasarput qilanaaraarput, tusagassiorfinnut nalunaaruteqarnermini oqarpoq.

Borgmesteri isumaqarpoq, periarfissap taassuma Kommune Qeqertalimmi ersarinnerusumik pilersaarusiorsinnaalernissaq aqqutissiuukkaa, maannamiit illuliortiternerit erngup nukinganik kallerup innerup pilersitaanik kiassaasersorneqarsinnaasut pillugit pilersaarusiorsinnaaleramik.