Kalaallit Røde Korsiat
Aasianni kajumissutsimik sulineq soqutigineqangaatsiartoq
Kalaallit Røde Korsiat-Inua Aasianni inuusuttut kajumissusillit pikkorissarteqqammerpai
Aasianni inuusuttut kajumissutsiminnik inuusuttoqatiminnut sullisserusuttut.
Kalaallit Røde Korsiat inuusuttunut suliniut pikkorissartitsimmat, inuussutut katillugit 32-t peqataapput.
- Soqutiginnittuni inuusunnerpaavoq 15-inik ukiulik, utoqqaanersarillugulu 66-inik ukiulik. Peqataasut ukiui agguaqatigiisillugit
23,6-inik ukioqarput, KRK-Inua tusagassiuutinut nalunaarummi allappoq.
Pikkorissaaneq Aasianni Sømandshjemmet'imi tallimanngornermiit Sapaat ilanngullugu ingerlanneqarpoq.
- Aasianni inuusuttut taama amerlatigisut inuusuttoqatiminnut kajumissutsiminnik sullisserusunnerat assut tuppallernarpoq, neriuppugullu Aasianni sammisaqartitsisarnerit aallartippata Aasiammiut immersueqataalluarlutillu aaqqissueqataasarumaartut.” – Taama oqarpoq Erni Kristiansen KRK-INUA-mi Inuusuttut Siunnersuisuat.
Inuusuttunut sammisaqartitsinerit Aasianni klubbimi sapaatikkut ingerlanneqartassapput.