Aasianni inunnut annertuumik innarluutilinnut ulloq unnuarlu paaqqinniffimmik pilersitsisoqassanngilaq

Aasianni inunnut annertuumik innarluutilinnut ulloq unnuarlu paaqqinniffimmik pilersitsisoqarnissaanik, Stine Egede (IA) siunnersuuteqarpoq.

Siunnersuutilli itigartinneqarnissaa Naalakkersuisunit innersuussutigineqarpoq.

Naak Aasiaat nunataata maninnera kaamisartakkanik qamutinik atuisunut piukkunnarluinnar aluartoq Kommune Qeqertalik kommuneni kisiartaalluni ulloq unnuarlu paaqqinnittarfimmik peqannginnerarlugu, Stine Egedep (IA) tunngavilersuutigalugu allappoq.

- Kialuunniit meerallip periarfissaqarfigisariaqarpaa meeqqap ineriartornera malinnaavigissallugu, kiisalu meeqqap ilaquttaminik malinnaavigineqarnissani periarfissarisariaqarpaa. Aamma annertuumik innarluutillip, Stine Egede siunnersuummini tunngavilersuilluni allappoq.

Sulisussaaleqineq

Siunnersuut Naalakkersuisunit tingulluarneqarpoq.

Innarluutilinnut suliassaqarfik pingaartinneqartoq Naalakkersuisut erseqqissaassutigaa, taamaattoq ulloq unnuarlu paaqqinnittarfinni pioreersuni aqqanilinni sulisunik nikerartoqarnerujussua pissutigalugu allamik pilersitsinianngikkallarput.

- Inunnut innarluutilinnut ulloq unnuarlu paaqqinniffimmik Aasianni pilersitsinikkut paaqqinniffinni pioreersuni sulisunik immikkut ittunik ilinniagaqarsimasunik sulisussarsiorneq ajornakusoortunngoriaannaavoq. Suliatigut piginnaasat pitsaavallaanngitsumik siammarterneqassappata tamanna inunnut innarluutilinnut tussaaq, Peqqissutsimut, Isumaginninnermut Inatsisinullu atuutitsinermut Naalakkersuisoq, Martha Abelsen (S) akissuteqarluni allappoq.

Naalakkersuisuli innarluutilinnut suliassaqarfimmi ukkatarinnissapput, taamaasiornikkut ulloq unnuarlu paaqqinnittarfinni sulisut piginnaasaat qaffasinnerpaanissaat qulakkeerneqassaaq.

Piginnaanngorsaaneq

Tamanna Sødisbakkemik, inersimasunut timimikkut tarnimikkullu malunnaateqarluartumik piginnaasakillisimasunut immikkut perorsaaviusup, paarlaasseqatigiinnermik isumaqatigiissuteqarfigineratigut pissaaq. Paarlaasseqatigiinnissamik isumaqatigiissuteqarnikkut sulisut piginnaasaat ineriartortinneqassasut, akissuteqaammi allassimavoq.

- Tamakkununnga ulloq unnuarlu paaqqinniffiit sumiiffiit apeqqutaatinnagit pisariaqartitsinerit tunngavigalugit pilersinneqartassasut pitsaanerussasoq Naalakkersuisut isumaqarput, Martha Abelsen nangilluni allappoq.

Siunnersuut marlunngornermi ulloq 2. april siullermeerneqasssaaq, taamaakkaluartoq Naalakkersuisunit itigartinneqassamaarpoq.