Aasianni INI-p inissiaataasa ilaat iikkap kumaqalersimasut
Iikkap kumaat suminngaanneerpiarsimanersut suli ilisimaneqanngilaq. Aasianni INI-p allaffeqarfia akiuiniarnissamut atortunik pissarsereersimavoq.
- Uagutsinni aamma iikkap kumaanik nassaarpugut. Quilertanarpoq nalunagu uagutsinni peqartoqartoq, qanorli akiorniarnissaa ilisimaqqissaanngilarput, Aasianni INI A/S-imi inissiamik attartortoq, kinaassutsiminik isertuusserusuttoq oqaluttuarpoq.
Inissiamik attartortuusup uumasuaqqat inissiaminiittut suunersut qanittumi aatsaat paasivaa. Inissiami attartortuusoq oqaluttuarpoq uumasuaqqat taakku qangali takusarsimallugit, uumasuaqqalli isugutaap uumasuararigai naatsorsuutigiinnartarsimallugu.
- Pisattatta amerlanerpaartaat annissussagigut ilisimatinneqaannarpugut. Inissiaq aamma eqqiassavarput. Taakkuli saniatigut iikkap kumaat qanoq akiorniarneqassanersut ersarissumik ilitsersorneqanngilagut, oqarpoq. Pisortat inissiaataanni attartortuunini pillugu imminut illersorumalluni inissiamik attartortoq kinaassutsiminik isertuusserusulluni kissaateqarsimavoq.
INI ilisimasaqalereersimavoq
INI A/S-p ingerlatsinermi pisortaa Henrik Rafn uppernarsaavoq iikkap kumai pillugit INI A/S-imut saaffiginnittoqareersimasoq.
Saaffiginnissutit aallaavigalugit INI A/S aalajangerpoq inissiaqarfik blokki taassumalu quia misissorneqassasut.
- Maannakkumuugallartorli iikkap kumaqarneranik suli nassaartoqanngilaq. Taamaammat maannakkumuugallartoq naatsorsuutigiinnarsinnaavarput quimi taamaallaat nassaartoqarsimasoq, Aasianni INI A/S-imi ingerlatsinermi pisortaq Sermitsiaq.AG-mut allakkatigut akissuteqarpoq.
Kinaassutsiminik isertuussilluni Sermitsiaq.AG-mik oqaloqateqartoq oqaluttuarpoq nammineq ilaquttanilu inissiaqarfinni blokkini ineqarsimallutik. Illoqarfiulli immikkoortortaata ilaanut allamut piffissaq sivitsoreersoq nuussimalluni. Inissiamilu inigilikkamini aamma iikkap kumaqartoq maanna paasisimavaa.
INI A/S iikkap kumaanik ajornartorsiut annertusissappat akiuiniaqataanissaminut piareersimavoq.
- Iikkap kumaanik inissiani arlalinni nassaartoqassappat akiuiniarnissamut sakkussatsinnik pissarsereerpugut, pisariaqalissappat aallarteriaannaaniassagatta, Henrik Rafn allappoq.
Henrik Rafnili ilisimatitsivoq Aasianni INI A/S-imi ajornartorsiut aatsaat nutaajusoq.
- Ilisimasagut naapertorlugit iikkap kumai allaneersuusarput, inissianiittuusaratillu. Ajornartorsiut uagutsinnut soorunami nutaajuvoq, taamaammat paasissutissanik nutaanik ujartuivugut piaartumik saliisinnaaniassagatta, siunissamilu ajornartorsiutiginnginniassagatsigit, Henrik Rafn Sermitsiaq.AG-mut allakkatigut akissuteqarpoq.
Taassuma erseqqissaatigaa Aasianni allaffimmi sulisut tamarmik ilinniartinneqarsimasut qanoq iliussanersut iikkap kumaanik nassaassagaluarunik. Ineqartullu iikkap kumaanik ajornartorsiuteqarlutik pasitsaassaqarunik INI A/S-imut saaffiginneqquneqarput.
- Attaveqarfigissavaatigut, iikkap kumaanillu nassaassagutta akiuiniaqataassaagut, ingerlatsinermi pisortaq nassuiaavoq.
Sermitsiaq.AG ippassaq allaaserisaqarpoq Aasianni illu alla aamma iikkap kumaqalersimasoq.