Aasianni ernisarfiup ammaqqinneqarnissaanut Naalakkersuisut sulinertik suli ingerlappaat
Aningaasanut inatsisissatut siunnersuummi Aasianni ernisarfiup ammateqqinneqalernissaa aappaagumut pingaarnersiuinermi inissinneqarpoq. Ammaqqinneqassappalli nunarsuaq tamakkerlugu peqqinnissamut suliniaqatigiiffiup ernisarfinnut maleruaqqusai malinneqartussaasut, Anna Wangenheim erseqqissaavoq.
Aningaasanut inatsisissatut 2021-mut siunnersuummi allassimavoq, Aasianni ernisussiorfiup ingerlaannarnissaanut pingaarnersiuinermut ilaatinneqassasoq.
- Peqqinnissaq pillugu isumalioqatigiissitap nalunaarusiaata siunissami ataavartumik aaqqissuussaanermut kaammattuutinik imaqartup saqqummernissaata tungaanut Aasiaat ernisussiorfittut inissisimaannarnissaanut pingaarnersiorneqassavoq, aningaasanut inatsisissatut siunnersuummi, Aningaasaqarnermut Naalakkersuisup, Vittus Qujaukitsup ataasinngornermi augustip 31-ani saqqummiussaani allassimavoq.
Peqqissutsimut Naalakkersuisoq, Anna Wangenheim uppernarsaavoq Aasiaat ernisussiorfittut ammaqqinneqarnissaanut pingaarnersiuisoqartoq, ammaaqqittoqqassappalli erninermi sulisut upalungaarsimasut naammattut sulisorineqartariaqartut.
Ammaaqqinnermimi sillimaniarnikkut maleruagassat sakkukillisinneqassanngillat:
- Soorunami orniginarpoq naartusup ilaquttani angerlarsimaffinnilu ungasippallaarnagu erninissaat, kisianni meeraq inunngortussaq anaanaasorlu sillimaniarneq pillugu, peqqissusaallu qulakkeerneqarnissaat salliutinneqartariaqarpoq. Taamaassappat ernisussiornermi upalungaarsimasut naammattut sulisorineqartariaqarput, Anna Wangenheim Sermitsiaq.AG-mit apersorneqarnermini oqarpoq.
Sulisunik amigaateqartut
Ernisussiortup saniatigut, ernisoqartillugu upalungaarsimasuni nakorsaq pilaasinnaasoq, peqqissaasoq sinitsitsisinnaasoq aamma aaviisartoq pisariaqartinneqarput.
Aasiaat ernisarfittut junip aallaqqaataani 2019-imi matugallarneqarpoq, ernisoqartillugu upalungaarsimasut sulisorineqartut amigalernerat pissutigalugu. Matusigallarneq ukiumik ataatsimik sivisussuseqartussaagaluaq, maanna ukioq ataaseq qaammatillu pingasut qaangiutereeraluartut, suli ammarsimanngilaq.
Ernisarfiup matugallarneqarnera pillugu nalilersuineq, ernisarfiup matugallarneranit qaammatit qulit qaangiuppata suliarineqartussaasoq, coronavirus pissutigalugu suli naammassineqarsimanngilaq. Nalilersuinerli ukioq manna naatinnagu naammassineqassangatinneqarpoq.
Peqqinnissaq pillugu isumalioqatigiissitaq Naalakkersuisunut Inatsisartunullu suliaminik 2022-imi ukiup kuartiani siullermi saqqummiussisussatut naatsorsuutigineqarpoq.
Aasianni ernisarfiup matunnginnerani ukiumut 60-it missaannik ernisoqartarpoq.