Aasianni coronavirusimik tunillaassuuttoqarpasinngilaq

Aasianni suli upalungaarsimasoqaraannallassaaq. Innuttaasulli Aasianniittut aamma Nuummiittut coronavirusimik tunillatsissimasumut ilaqutaasumullu qanillivallaarsimasut, maanna angerlarsimaannarallarnissamik peqquneqarunnaareerput.

Tunillatsissimasinnaasut misissorneqaramik, tunillatsissimanngitsut aamma paasineqarpoq.

Nakorsaaneq Henrik L. Hansen Sermitsiaq.AG-mut ilisimatitsivoq.

- Aasianni Nuummiluunniit covid-19-imik tunillaassortoqarneranik takussutissaqartoqanngilaq, nakorsaaneq ilisimatitsivoq.

Aasianni innuttaasoq ataaseq tikinnerminit coronavirusimut misissorteqqinnermini tunillatsissimalluni oktoberip 21-ani paasivaa. Tunillatsissimasup tikinnerminit mattusimagallarnissaq malinnagu pulaartoqartarsimavoq, qanigisaasorlu Nuummut Inatsisartuni aningaasaqarnermut ataatsimiititaliaq ataatsimiigiaqatigineqarmat peqataalluni.

Sakkortusisamik suli eqqumaffigineqarpoq

Aasiannili innuttaasut suli qasukkaallassanngikkallarput. Tunillatsissimasoqarsinnaanera nakorsaanerup itigartivissinnaanngilaa.

- Tunillatsittoqarsimannginnera itigartivinneqarsinnaanngikkallarpoq. Taamaammat Aasianni sakkortusisamik maluginiaasoqartariaqarpoq, napparsimanermillu ersiuteqartut peqqinnissaqarfimmut sianerlutik saaffiginnittariaqarlutik, oqarpoq.

Taassuma ilanngullugu ilisimatitsissutigaa Kalaallit Nunaanni innuttaasut tamarmik covid-19-imut tunillatsissimasinnaanermut ersiuteqarnerlutik maluginiartariaqaraat. Danmarkimi Islandimilu kiisalu nunarsuup sinnerani coronavirus sakkortuumik tunillaassorpoq. Kalaallit Nunaannilu tunillatsissimasumik nassaartoqaratarsinnaanera qaninneruvoq.

- Angerlarsimaannarnissamik malittarisassat tamanit atuutsinneqarnissaat pisariaqarluinnarpoq. Napparsimasut ersiuteqartut, Covid-19-imik tunillatsissimanerlutik paasiniarlugu misissortittariaqarput, Henrik L. Hansen oqarpoq.