Aasianni coronavirusimik napparsimasoqarnera paasineqartoq
Aasianni coronavirusimut misissorneqartoq ataaseq napparsimasoq, nunatta nakorsaanera arfininngornermi ilisimatinneqarpoq. Taamaasilluni nunarput coronaqanngivittutut taaneqarsinnaajunnaarpoq.
Nunatsinni ulluni 50-ini nutaamik napparsimasoqanngereersorlu, coronavirusimik napparsimasoqaleqqissimasoq arfininngormat paasineqarpoq.
Napparsimasoq Nuummiinngilaq, Aasianniillunili. Aasianni innuttaasoq Danmarkimeereernermini covid-19-imik napparsimalersimasoq paasineqarpoq.
Tunillatsissimasoq ilaqutaalu maanna mattusimapput, tunillaassortoqarnissaanullu aarlerinaat annikitsuaraalluni.
Napparsimasoq siornatigut paasineqareersimasoq
Sivisuumik Danmarkimi napparsimareerluni innuttaasoq ullut arlallit matuma siorna Aasiannut angerlarpoq. Pineqartoq napparsimanermini aamma Covid-19-eqarsimavoq, kisianni aallannginnermini arlaleriarluni tunillatsissimanngitsutut misissortissimalluni.
Angerlareerluni mississorteqqikkami innuttaasoq Covid-19-imik tunillatseqqissimasutut uppernarsarneqarpoq. Nunanit tamalaaniit inuit Covid-19-imik tunillatsissimallutik napparsimareerlutik virusinik imaluunniit gen-ip atortuinik virusineersunik iggissamikkut sivisuumik peqarsinnaasarnerat, taamaalillutillu tunillatseqqissinnaasarnerat ilisimaneqarpoq.
- Tunillatsissimasoq matumani tunillatsikkunnaareerluni virusi atunngikkaluartoq pissutaalluni tunillatseqqissimassasoq ilimanarluinnarpoq. Kisianni tunillaassuussinnaanermut aarlerinaat pinngitsoorsinnaanngilarput. Taamaammat suliami matumani soorunami sunut tamanut piareeqqaniarsarivugut, nakorsaaneq Henrik L. Hansen oqarpoq.
Napparsimasoq qanigisaalu mianersornissaq tunngavigalugu aneqqusaanngillat allanillu iliuuseqaqqinnissaq pisariaqarnani, Namminersorlutik Oqartussat tusagassiutiuutinut nalunaaruteqarlutik allapput.
Nuna tamakkerlugu 1878-it coronavirusimut misissortissimapput, taakkunannga 70-it Kommune Qeqertalimmiillutik. Nuummi siullermik napparsimasoqarneranik martsip 16-ani paasisaqartoqaqqaarpoq, maannalu napparsimasoq tunillatsissimasut aqqaneq-aappassaraat.
Peqqinnissaqarfimmit siunnersuutit malinneqarnissaat pingaaruteqarluinnartoq
Kalaallit Nunaannut angalasut amerliartortillugit nappaatip tuniluunnissaanut ulorianartut amerliartortussaapput. Taamaammat nunatsinni pinngitsortaqarata nakorsaanerup peqqinnissakkut siunnersuinerinut malinninnissarput suli pingaartorujussuuvoq, Namminersorlutik Oqartussat ilisimatitsipput.
- Minnerpaamik 2 meterinik ungasissuseqarit
- Asakulaneq sprititerikulanerlu
- Qanit talinnik asserlugu quersortarit tangajortarlutillu
- Qisernaveersaarit
- Eqqiaaneq silaannarissarnerlu eqqumaffigikkit
Danmarkiminngaanniit tikittut tamarmik sapaatit akunneri marluk angerlarsimaannassapput, Covid-19-imullu ersiuteqarnermi ingerlaannaq oqarasuaatikkut peqqinnissaqarfimmut saaffiginnittoqassaaq.
Angalasut tamarmik tikinnerminniit ullut tallimassaani Covid-19-imut peqqissaavimmi qaninnerpaami imaluunniit nunap immikkoortuani napparsimmavimmi misissortissapput.