Aasianni angut savimmik kapineqarsimasoq
Aasiannik savimmik kapisisoqarsimanera, Nuummi imigassartorsimalluni biilertut angerlarsimaffinnilu eqqissiviilliornerit politiinit sapaatip-akunnerata naanerata aallartinnerani ulapputigineqarujussuarsimapput.
Aasianni angut tallimanngornerup arfininngornerullu akornanni unnuakkut savimmik kapineqarnermigut ajoqusingaatsiarpoq. Angulli ajoqusersimagaluarluni peqqissutsimigut patajaatsumik inissisimasoq, Kalaallit Nunaanni Politiini pigaartut pisortaat, Mads Lynge, oqaluttuarpoq.
Politiit paasiniaanerat naapertorlugu aappariit – angut arnarlu – savimmik kapisisoqarnerani akuusimapput.
Angut savimmik kapineqarsimavoq, nulialu kapisisimasutut pasineqarluni. Arnaq arfininngornermi kingusinnerusukkut inatsisit tunngaviusut naapertorlugit killisiorneqassaaq.
Pigaartut pisortaat pisimasoq pillugu annertunerusumik oqaaseqarusunngilaq paasiniaaneq suli ingerlanneqarmat.
Akileraarutinit utertoorutit pissutaasimagunartut
Politiinullu unnuaq ulapinnartorujussuusimasoq, pigaartut pisortaat oqaluttuarpoq:
- Maani Nuummi sinerissamilu ippassaq unnukkulli ulapittorujussuuvugut. Kalaallit Nunaat tamakkerlugu imigassamut attuumassutilinnik suliarpassuaqarsimavugut, pigaartut pisortaat oqaluttuarpoq.
Politiinut nalunaarutiginninnerit tassaasimanerarpai nakuusernerit, angerlarsimaffinni eqqissiviilliornerit inuillu aalakoorpallaartut.
Politiinit Nuummi inuit marluk imigassartorsimallutik biilersimasutut aamma unnerluutigineqarput.
- Akileraarutinik utertoortoqartillugu ulapittorujussuusarnerput ajoraluartumik nutaajunngilaq, Mads Lynge oqarppoq.
Akileraartarnermut Aqutsisoqarfik 2019-imi akileraarutit sippuutaannik 187 millioner koruuniusunik tallimanngornermi utertitsivoq.