Aasianni angallat kivikoq pillugu innuttaasut naammagittaqqissinnaajunnaarput
Angallatip aalisariutip kivikup piginnittuusumit peerneqarnissaa Kommune Qeqertalimmit piumasarineqareeraluartoq, tamanna ukioq manna pisinnaassanersoq qularnaatsumik ilisimaneqanngilaq. Tamannalu innuttaasunik atsiortitsinikut akuersaarsinnaanngilaat.
1998-imi Aasiaat ilisarnaatigilingaanik nutaarsuarmik suluusalinnut mittarfittaarmat, taamanikkut kommunalbestyrelsiup tanngassimaaqalutik Aasiaat Avannaata Isaariaanik taagulerpaat.
Aviisi Sermitsiaq taama allappoq.
Ukiulli kingulliit ingerlanerini Aasiaat allamik, tassalu angallammik aalisariummik talittarfimmi kivinikumik nutaanngeqisumik aserfallassimaqisumillu ilisarnaatitaarput, taannalu innuttaasunit pigineqarumanngilluinnarpoq piaarnerpaamillu peerneqarnissaa piumasarineqarpoq. Angallat kivinikoq Hotel Aasiaat Sømandshjemmip, avataaniit tikeraanit takornarissaniillu ornigarneqarluartartup eqqannguaniippoq.
Taamaattumillu Kommune Qeqertalimmi borgmesteri, Ane Hansen, Inuit Ataqatigiit, angallatip qaqinneqarnissaa peerneqarnissaalu pillugu suliamik aallartitsivoq. Taamannalli kingusitsigisumik kommunip iliuuseqarniarsarinera akuersaarneqarsinnaanngilluinnartoq, 2016-imili nammineq piumassutsini aallaavigalugu angallatsip qaqinneqarnissaa peerneqarnissaalu pillugu innuttaasunik atsiortitsinikoq, Erne Lange Olsen, isumaqarpoq.
Taassuma taamanikkulli commune Namminersorlutillu Oqartussat allakkatsigut suliaq pillugu attavigisarpai.
Aviisimi Sermitsiami atuarnerusinnaavutit. Aviisi uani pissarsiariuk: