Skip to main content

Aasianni angallat kiveqqasoq qaqinneqartoq

Polar Aassik ikuallalluni kivinerata kingorna angallatit kivisimasut qaqinneqarnissaat oqallisigineqalerput, Qeqertarsuummi Tunuani innuttaasut tikkuussipput angallatinik kivinikunik allanik aamma peqartoqartoq. Aasianni maanna pisoqalerpoq.

Angallat kiveqqasoq Aasianni ullumikkut ilisarnaataalersimasoq Aasianni talittarfimmut maanna qaqinneqalerpoq.

Inatsisartuni ilaasortap Kristian Jeremiassenip paragraf 37 naapertorlugu apeqqutaanut akissummi atuarneqarsinnaavoq, angallammik piginnittoq angallammik qaqitsinissamut akisussaasuusoq.

- Aasianni angallat kiveqqasoq illoqarfimmi takussunarsimaqisoq maanna qaqinneqalernera pissusissamisoortutut isigivara. Piffissarlu taama sivisutingisariaqanngikkaluarpoq, peerneqarnissaa pillugu kommunalbestyrelsemut marloriarlunga apuussisarsimavunga. Periarfissaqalerama Inatsisartunut ilaasortanngorlunga Naalakkersuisunut apuussisariaqarnikuuvunga, Kristian Jeremiassen Sermitsiaq.AG-mut oqarpoq.

Angallat Aasianni innuttaasunit peerneqaqqullugu siornatigut piumasarineqartarsimavoq. Innuttasut atsiornerinik 2016-imi katersisoqarmat innuttaasut 204-t atsioqataapput, kinguneqartoqaranili. 

Peqqussuteqartoqarsimasoq

Akissuteqaammi pineqartumi aamma atuarneqarsinnaavoq, Kommuni Qeqertalik immakkut angallatit angallatikkullu pillugit aalajangersakkat naapertorlugit, anngallatip peerneqarnissaanut juulip arfineq-pingajuani sapaatip akunneranik arfineq-pingasunik piffissaliilluni peqqussuteqarsimasoq.

Inatsisartuni ilaasortap Kristian Jeremiassenip (IA), Aasianni angallammut kiveqqasumut kilisaammullu Aassimmut martsip qaammataani Qasigiannguit eqqaanni ikuallattumut kikkut akisussaasuunersut pillugu piffissami kingullermi paasiniaasarsimasup, suliami susoqalernera nuannaarutigaa.

Kilisaat ikuallattoq kivisimasoq

Kilisaat Polar Aassik martsimi Qasigiannguit eqqaanni ikuallalluni kivimmat angallatit kiveqqasut oqaluuserineqaqqilersimapput.

Tassunga atatillugu Kristian Jeremiassenip angallatit kivisimasut imaanit qaqinneqarnissaat piumasarisimavaa, sumiiffinnut mingutsitsinnginnissaat anguniarlugu.

Kristian Jeremiassenip oqaatigaa, Polar Aassiup qaqinneqartariaqarneranik suli isumaqarluni, tamatumalu iluatsinneqarnissaanut suli uteriiserniarluni.

Allaaserisap qulaani qaqitsinermit assit takukkit.

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER