Aasiaat
Aasianni aallaasersorileraluarpaat
Aasiaat illoqarfiata kangiatungaa politiit sisamanngornermi unnukkut asserpaat aallasersortoqalerneranik pasitsaassisoqarmat
Angut Aasianni politiinit sisamanngornermi unnukkut tigusarineqarpoq unioqqutitsilluni aallaasersorniartutut pasineqarluni. Erngiinnarli paasineqarpoq kukkusumik nalunaarutiginnittoqarsimasoq. Taamaattoq politiit suliaq ilungersunartutut tiguaat Aasiaallu kangiat tamaat assersuleraluarlugu.
- Angut arlaannik unioqqutitsisimanngilaq. Unnerluussisoqaralunilu eqqartuussivimmut sassartitsisoqassanngilaq maannalu iperagaalerpoq, Aasianni politiit pisortaat Arne Sandgreen Reimer Sermitsiaq.AG-mut oqarpoq.
Sinilersimavoq
Politiit suliaq aallartippat inuit marluk imminnut maliusaannarlutik sisamanngornermi unnukkut politiinut nalunaarmata aallaasersortoqalersoq. Taamaammat suliaq ilungersunartutut politiit tiguaat Aasiaallu kangia tungaa unnukkut nalunaaquta1 19.30-ip missaanniit 22.30-ip tungaanut assersorlugu.
- Isumaqatigiissaaniartartoq Qaasuitsup politiivinit Ilulissaniit suliamut ilanngutsinneqarpoq. Angulli Aasianniittoq sinilersimavoq taamaattumillu attaviginiarnera sivisusimalluni. Tigusarineqarnerali eqqissisimasumik pivoq Aasiaallu kangiatungaata assersorneqarnera nalunaaqutaq 22.30-ip missaani kipitinneqarpoq, Arne Sandgreen Reimer oqarpoq.