Aasiaat: Innuttaasut akiuussutissalertikkiartoraluarnertik iluatsissimanngilaat

Nuummisulli Aasianni innuttaasut akiuussutissalertikkiartornertik iluatsissimanngilaat. Innuttaasut naapertorlugit, pingasunngormat inuit hunnorujunik amerlanerusut tulleriaattunut ilaajunnaaginnarsimapput, peqqinnissaqarfiup akiuussutissaatai nungummat.

Qqertarsuup Tunuani napparsimmaveqarfimmi pisortaagallartup Mark Grønnep oqaluttuaraa, ullormi inuit aappassaanik kapitinnissaannut qaaqqusinerup saniatigut siullermik kapitittussanik qaaqqusisoqarmat ajornartorsiut pilersimasoq.

- Innuttaasut 600-t missaanniittut aappassaanik kapitinnissaannut siullertut qaaqqusimavavut. Paasisimavarpulli innuttaasut ilaat illoqarfimmiinngitsut, taamaammallu aalajangersimalluta 18-ileereersimasut kapitinnissaannut qaaqquniarlugit, nakorsaq oqarpoq.

Takkuttorpassuusimasut

Mark Grønne naapertorlugu, Aasianni inuit 18-ileereersimasut 1000-it missaanniittut, siullermik suli kapitissimanngitsut matumani pineqarput.

- Tupaallaatigisatsinnik inuppassuit siullermik suli kapitissimanngitsut takkussuussimapput, taamaammallu illoqarfimmi akiuussutissat nungummata inuit ilaat itigartittariaqarsimavavut, taanna oqarpoq.

Nakorsap akiuussutissalersuinermut najuussimannginnini pissutigalugu inuit qassit pineqarnersut oqaatigisinnaannginnerarpaa. Innuttaasulli ataatsip ilisimatitsissutigaa, akiuussutissat 53-iinnanngorsimasut nalunaaqutaq 16:41 nalunaarutigineqarmat, innuttaasut 100-t missaanniittut ingerlaqqiinnartariaqarsimasut.

- Sulisut ulloq naalersoq tulleriiaattunut qiviaramik inuppassuit suli tulleriaassimapput, taamaalineranilu akiuussutissat 53-iinnanngorsimallutik. Inuit 53-it immikkoorteriarlugit sinneri angerlartinneqarsimasut Mark Grønnep uppernarsarpaa.

Pingasunngormat inuit 354-it akiuussutissalerneqarsimapput.

Inuusuttut pingasunngorpat akiuussutissalersorlugit aallartinneqassasoq

Aasianni 12-15-inik ukiullit pingasunngorpat siullermik Modernamik kapitinnissaamut qaaqquneqassapput, nakorsallu Mark Grønnep neriorsuutigaa, innuttaasut sinneri aamma akiuussutissalerneqassaqqaartut.

- Ippassaq akiuussutissalerneqanngitsoortut piaartumik periarfisseqqinneqassapput, ullormili sorlermi tamanna pissanersoq suli aalajangiunneqanngilaq. Naatsorsuutigaara septembarip aallartinnerani tamanna piumaartoq.

Mark Grønnep erseqqissaassutigaa, Aasianni innuttaasut piffissami kingullermi illoqarfimmi tuniluuttoqarmat imminnut paarilluarsimasut.

- Illoqarfimmi innuttaasut allanut qanillinaveersaarnissamik eqqiluisaarluarnissamillu, kiisalu qanermut assiaquteqarnissamik il.il. inassuteqaatinik ataqqinnissimanerat peqqinnissaqarfimmit tulluussimaarutigineqarpoq. Tamanna illoqarfimmi tuniluunnermut killilersimaarinneqataasimavoq, taanna oqarpoq.