Aasiaat: Ilinniartitsisoq assiliisarfittaarpoq
Assiliisarfimmik allaffissornikkut atortussaarniarfiutingisumik ilinniartitsisoq assiliisartutut ilinniangaqarsimanngikkaluarluni Aasianni sisamanngormat ammaavoq.
Jørgen Brandt Klemensen, 41-nik ukiulik, Aasiaat Foto & Kontorforsyning-imik piginnittunngortoq Aasiannut ilaquttanilu 2011-mi nuunnermi kingorna Majoriami ilinniartitsisutut atorfeqalersoq, oqaluttuarpoq assiliineq isikkaneq marlunnilli ukioqarluni illortaaminit ilitsersuunneqarami soqutigisaqalersimallugu.
Kingornalu assiliineq soqutigisuaannarsimallugu ullumikkut oqarsinnaanngorpoq sinnattuni piviusunngortissimalerlugu.
- 2011-mi Aasiannut nuunnitta kingorna paasinarsivoq illoqarfimmi assiliisarfimmik pisariaqartitsisoqartoq, Jørgen Brandt Klemensen oqaluttuarpoq.
Assilitikkusuttoqartuaannarpoq
Joorut illoqarfimmi ilisimaneqarpoq ilaqutariinnut kusanartumik assiliisartoq. Assersuutingalugu aasakkut Avannaani Ilinniarnertuunngorniarfimmi nasartaartiteraangasa ilinniarnertuunngortut angajoqqaavilu tammajuittussaminnik kusanartumik assilisinnissartik kissaatigisarpaat. Suliassarlu taanna Joorup suliarilluarsinnaasarsimangaa takussutissaqarpoq ukiut tamaasa assilitiffingitikkusuttuaannarneranut.
- Illuutitaarput una, Suulunnguup Aqquserna nr. 48, assiliisarfittut allaffissornermullu atortussaarniarfittut atungassarput, maj-imi pisiarivarput, iluatalu iluarsartuunnera ullumikkorpiaq aattaat atorsinnaanngorlugu suliarinera naammassivarput. Illup pisiarinissaa piviusunngorsinnaasimavoq Greenland Business-imiit siunnersorneqarnikkut ilaquttallu tapersersuinerisigut, Jørgen Brandt Klemensen oqaluttuarpoq.
Joorup ilaatingut mobiltelefonit coveriinik pisiniartup nammineq aalajangingaanik assitalersuisarnissani printerillu pilikkatassaanik niiveruteqarnissani eqqaavaa.