Aasiaat

Aasiaat Mittarfiata tallinissaa ajornannginneruvoq

Immaqa silatusaarnerussaaq Aasiaat Mittarfiata Avannaani timmisartorsuarnut mittarfinngortinneqarpat, Ilulissat Mittarfiat pinnagu, IA-mit Inatsisartunut ilaasortaq Peter Olsen isumaqarpoq

Inuit Ataqatigiit tunuliaqutaralugit Inatsisartunut ilaasortap Peter Olsenip eqqaasitsissutigaa Avannaani mittarfissualiornissaq Ilulissaninngarnit Aasianni akikinnerussasoq

Inatsisartut ukiakkut ataatsimiinneranni, tallimanngornermi septembarip 25-anni aallartittussami, oqaluuserisassat pingaarutillit ilagaat Nuummi Ilulissanilu mittarfiit tallineqarnissaat. Tamatumani Ilulissat Mittarfiata 1.799 meterinut tallineqarnissaa taaneqartarsimavoq.

Inatsisartunulli ilaasortaq Peter Osen isumaqarpoq Ilulissat mittarfiata tallineqarnissaa sanaartornermi aningaasaliissuteqarfigissallugu pitsaanerpaajunngitsoq. Aningaasat ikinnerujussuit atorneqarsinnaapput Aasiaat mittarfiata taama takitigisumut tallineqarpat, politikeri IA-meersoq oqarpoq.

Ilulissani mittarfiup tallineqarnera akisuvallaassaqaaq

– Ilulissani mittarfiup 1.799 meterinut tallineqarnissaa minnerpaamik 500 mill.kr.- nik akeqartussaavoq. Illuatungaatigulli Aasianni mittarfik tallineqarpat assartuinikkut umiarsualiveqarnikkullu periarfissat pitsassuupput, taanna tusagassiorfinnut nalunaarummi allappoq.

– Aasiaat umiarsuliviat avannaani umiarsualivinni anginersaavoq nioqqutissianik avammut tuniniaanermut eqqussuinermullu periarfissalik, umiarsualivialu mittarfillu allineqarnissaminnut periarfissarissaarnerupput.

Aasiaat qanga taaneqartarsimavoq ´Avannaanut isaaffittut´, pissutigalugu umiarsualivik containereqarfik siulleq tassani sananeqarsimammat. Peter Olsenilu isumaqarpoq isuma tamanna ullutsinni pilersaarusiornermi malinneqartariaqartoq.

Sangutittariaqarpoq

Ilulissani mittarfik tallineqassaguni avannamut kimmut sangutinneqaqqaartariaqarpoq, tamatuma kingunerissallugu Aasiaat mittarfiata tallineqarnissaaninngaaniit sananeqarnissaa akisunerulertussaassalluni. Aasiaat mittarfiat ajornanngitsuaqqamik tallineqarsinnaavoq, tallineqarnissaanut periarfissat pitsaasuussasut sananeqaqqaarmalli eqqarsaatigineqareersimammata, Peter Olsen oqarpoq.

– Aningaasarpassuit sipaarutissat inissialiornissamut atorneqarsinnaapput, inuiaqatigiinni inissaaleqineq annertoreeqimmat.

Islanditut iliorluta

Nuna sanilerput Island silatusaarnerarpaa mittarfimmi annersaat illoqarfiit annersaasa avataannut inississimammagit.

– Mittarfeqarfissuaq illoqarfiit pingaarnersaasa Reykjavikkip avataaniippoq, takorniariarpassurnit orninneqartartumiit. Tamanna pisinnaavoq angalannikkut periarfissanik pitsaasunik ineriartortitsinikkut Keflavikkip aammalu Reykjavikkip akornanni. Taamatullu aamma pisoqarsinnaavoq Aasiaat Ilulissallu akornanni, politikeri Inatsisartunut ilaasortaq oqarpoq.

Powered by Labrador CMS