Aasiaat ammariartuaarnermi oqiliallappoq
Nunatsinni nutaanik tunillatsittoqarsimanngitsoq Nunatta Nakorsaaneqarfiata kisitsisaatai ataasinngornermi takutippaat. Taassuma saniatigut Aasianni tuniluuttoqareersorlu Kommune Qeqertalik ammariartuaalerpoq. - Oqiliallannarpoq, kisianni suli mianersussaagut, borgmesteri Ane Hansen oqarpoq.
Nuna tamakkerlugu tunillatsittoqarsimanngitsoq nun.gl-imi kisitsisit kingulliit takutippaat. Maanna tunillatseqqasut katillugit 44-iupput, 35-it Qeqqata Kommuniani tunillatsissimapput. Avannaata Kommuniani ataaseq, Qeqertalimmi pingasut, Sermersuumi tallimat Kommune Kujallermilu tunillatsissimasoqanngilaq.
Innuttasunut Ane Hansen qujavoq
Aasianni Upernavimmilu qanermut assiaqutit, katersuussinnaanerit angallannermilu killilersuutit Naalakkersuisut sapaatip akunnerata siuliani atorunnaarsippaat. Sisimiunilu suli maleruaqqusat atuukkallassapput. Maleruaqqusat sumi atuutsinneqarnersut nun.gl-imi atuarneqarsinnaalernikuupput, una toorlugu atuarsinnaavatit.
Aasianni corona delta takkummalli tuniluuttoqarnissaa pinaveersaartinniarlugu maleruaqqusat sakkortuut innuttaasunut atuutsinneqalerput.
- Coronavirusi inuunitsinni ilaalernikuuvoq, taamaammat sungiussimavarput. Ammariartuaarneq oqiliallannarpoq, kisianni suli amerlasuut akiuussutissamik kapitinneqanngillat. Taamaammat suli mianersortariaqarpugut, Ane Hansen Sermitsiaq.AG-imut oqarpoq.
Utoqqaat kiserliorfiat
Kommune Qeqertalimmi kikkut tamarmik isersimaffigisinnaasaat kommunimi suliffeqarfiit assigiinngitsut ammariartuaarnissaat maanna sulissutigileruttorpaat. Aasianni qaammatit imaanaanngitsut atugarineqaraluartut innuttaasut tuniluuttoqannginnissaanut iliuusseqaqataammata Ane Hansen innuttaasunut qujassuteqarpoq.
- Utoqqarnut allaat paasinnilluartorujussuupput, naak kiserliorsinnaaneq initugaluaqisoq, innuttaasut paasinnilluarput tuniluuttoqarnissaanullu pinaveersaartitseqataallutik. Takusinnaavarpummi Sisimiuni annertuumik tuniluuttoqartoq, uagullu kisitsisigut taama isikkoqanngillat. Innuttaasut paasinnilluarsimaneranut qutsavigaagut, Ane Hansen oqarpoq.
Kommunip iluani corona ilinniutaasimaqisoq borgmesterip erseqqissaatigaa. Corona Nunatsinnut takkuteqqaarmat Aasiaat 2020-mi eqqugaasut siulliit ilagaat.