Aasaanerani taamaallaat Ilulissanut toqqaannartumik timmisartoqartassaaq

Naak Ilulissani mittarfissuartaartoqarniaraluartoq ukiup ilaani sivikitsuaraannarmi toqqaannartumik tikinneqartarnissaa Air Greenlandip naatsorsuutigaa

Mittarfiit nutaat piareerneqaraluarpataluunniit Danmarkimiit Ilulissanut angalasut amerlanersaat Kangerlussuaq aqqusaarnagu Nuuk aqqusaartalissavaat.

Tallimanngormammi ataatsimeersuarnermi Air Greenlandip pisortaanerata Jacob Nitterip paasissutissiaraa, maanna angalasartut tunngavigalugit qaammammut marloriarluni pingasoriarluniluunniit toqqaannartumik Ilulissanukartoqartanissaa naatsorsuutigalugu.

Angallanermut akit

Taamatullu paasissutissiisoqarsimanera tunngavigalugu angalanermut akinut sunniuteqassanersoq Inuit Ataqatigiinniit apeqqutigineqarpoq.

- Paasissutissat taakkua tunngavigalugit paaserusunnarpoq tamanna angallannermut akinut qanoq sunniuteqassanersoq, tamannami erseqqissumik inuiaqatigiit aningaasaqarnerannut sunniutissanik nalilersuinermi takuneqarsinnaanngilaq, IA-p siulittaasua Sara Olsvis ataasinngormat oqallittoqarnerani oqarpoq.

Angalanermi piffissaq

Aningaasaqarnermullu Siunnersuisoqatigiit ilanngullugu tikkuarpaat, Nuuk aqqusaarneqartaleraluarpat inuiaqatigiit aningaasaqarnerannut iluaqutissartaqartoq. Tassanimi sivikinnerusumik angalanerit iluanaaruteqarfiunerusussatut naatsorsorneqarsimapput.

- Allatamittaaq ilanngunneqarpoq periarfissaq, ukiukkut Ilulissanut toqqaannartunik timmisartoqartannginnissaa. Tamanna isumaqassaaq, ilaasut amerlassusaanni taakkunani angalanerup sivikillinnginnissaanik, tamannalu misissuinermi eqqarsaatigineqanngilaq, siunnersuisoqatigiit allapput.

Angalanermi piffissanik naatsorsuisimanerit eqqarsaatigalugit siunnersuisoqatigiinnit aamma tigulluarneqanngilaq.

- Angalanermi piffissanik misissuinermi takutinneqarpoq, aallartarnerit akulikissusaat 14 ullumikkumut sanilliullugu allannguuteqassanngitsut. Taamaattoqassagunanngilarli. Ilaasut amerlassusaat eqqarsaatigalugu Nuummut aamma Ilulissanut taakkunanngalu sapaatip akunneranut aallartarnerit amerlassusaat, ullumikkut Kangerlussuarmut taassumanngalu aallartarnerit nalissai naatsorsuutigineqarsinnaanngilaq, tamatumunnga pissutaavoq ilaasut sumiiffinnut marlunnut ataasiinnaanngitsumut siammassammata.

Powered by Labrador CMS