Aasaanerani erngup aqqutai aqqutigalugit imeqartitsineq Nukissiorfiup unitsikkaa
Qasigiannguani innuttaasut aasaanerani erngup aqqutai aqqutigalugit imeqartinneqartarnerat unitsinneqarpoq, imertaassuarnilli pajuttuisarneq maannakkutut ingerlaannassaaq. Inatsisitigut piumasaqaataasoq naammassiniarlugu aasaanerani erngup aqqutai atorneqartussaajunnaarput. Politikeri aaqqiissutissamik ujartuivoq.
Qasigiannguani innuttaasut aasaanerani erngup aqqutaatigut imermik pilersorneqarsinnaasut, ukioq mannamiit imermik pajuttuinikkut pilersorneqaannarnissaq naatsorsuutigisariaqassavaat.
Taama allannguisoqarpoq Nukissiorfiit Danmarkimi Miljøministeriep ataani erngup imerneqartussap isumannaatsuutinnissaata uppernarsarneqarnissaanut (Dokumenteret Drikkevandssikkerhed) piumasaqaammik malinnissagami. Erngullu aqqutai aasakkut atorneqartartut inatsisitigut piumasaqaatinik naammassinninngillat.
Dokumenteret drikkevandssikkerhed (DDS) periusiuvoq erngup pitsaassusaanik qulakkeerinninnermut atorneqartartoq, erngup pitsaassusaata misissorneqartarnerata avataatigut imeq imerneqartussaq isumannaatsooqqullugu.
- Aasaanerani erngup aqqutai aammattaaq taaneqartartoq "aasaanerani imeqartitsinermut aqqutit", slangit plastikkit oqorsarneqanngitsut aqqutigalugit ingerlatinneqartarpoq taakkualu nunamut assaallugit aamma nunap qaavatigut ingerlasarput. Aasaanerani slangit kissatsinneqartarput tamannalu pissutigalugu imeq kissaatiginanngitsumik bakteriaqalersinnaasarpoq, Nukissiorfiit Qasigiannguani innuttaasunut paasissutissiillutik allagarsiivimmut nivinngaasimapput.
Innuttaasup naammaginngikkaa
Nukissiorfiit Qasigiannguani Pilersuisup allagarsiiviani nivinngakkaminni ilanngullugu ilisimatitsissutigaaat Nukissiorfiit DDS-imi inatsisitigut piumasaqaatinik malinnissangamik aasaanerani imeqartitsinermut aqqutit 1. januar 2023 aallarnerfigalugu atorunnaarsittariaqaraat.
Illoqarfimmi politikeri, Aqqa Samuelsen (S), isumaqarpoq siumoortumik piareersaateqarsimanani imeqartitsinermik allannguineq ilaqutariinnut arlalinnut eqquisoq.
Taassuma paaserusuppaa aasaanerani erngup aqqutai aqqutigalugit imeqartitsisisarnerup inatsisinik piumasaqaataasunik malinnittussanngorlugu siumoortumik sooq iluarsiivigineqarsimannginnersoq.
Nukissiorfiit Qasigiannguani innuttaasunut ilisimatitsipput imertaassuarnik pajuttuisarnikkut imermik pissarsisarnissaq suli periarfissaassasoq, soorlu tamanna maanna atuuttuusoq.