Aasaanerani angallattut suliumajunnaartoqarneranik eqqugaaratarsinnaasut
Aasaanerani angallattoqarnissaa sioqqullugu Air Greenlandimi sulisut ilaasa aammaarlutik suliumajunnaarsinnaapput. Suliumajunnaarneq juunip 23-anni aallartinneqarsinnaavoq, aammalu piviusunngussaguni Danmarkip Kalaallillu Nunaata akornanni timmisartuussinernut tamanut eqquisussaalluni.
Dansk Metal suliumajunnaarnissamut ilimasaarutip aappaannik nassiussaqarpoq, 23. juni sioqqullugu isumaqatigiissuteqartoqarsimanngippat suliumajunnaarnerup aallartinneqarsinnaaneranik tamanna isumaqarpoq.
Air Greenlandimit tusagassiuutinut nalunaarummi taama oqartoqarpoq.
Air Greenland aamma Dansk Metal piffissami sivisunerusumi Isumaqatigiissitsiniartarfimmut apuunneqartumik isumaqatiginninniareerlutik isumaqatigiissuteqarput. Dansk Metalip poorskikkunni angallattoqarnissaa sioqqullugu suliumajunnaarnissamik ilimasaaruteqareernerata kingorna pivoq.
Tassani illuatungeriit 2023-imi naapeqqinniarlutik isumaqatigiipput, Dansk Metal-ip Air Greenlandimi ilaasortaasa, tassalu Timmisartuni Mekanikerit kisimik akissarsiaat isumaqatiginninniarfigineqartussaallutik.
Dansk Metalimiit akissarsianut qaffaatissatut siunnersuutit, Air Greenlandimit saqqummiunneqartut itigartinneqarput, timmisartortitseqatigiiffik allappoq.
- Naleqqutinngitsumik akissarsiat qaffannissaat piumasarigaat
Air Greenlandimiit isumaqatiginninniarnernut pisortaasup, sulisoqarnermut pisortaanerup Mads Barlach Christensenip Dansk Metalimiit ilimasaarineq uggoraa, taassuma oqarnera naapertorlugu sulisut pineqartut atugarissaareernerat pissutigalugu.
- Suleqatigiinni immikkoortut pitsaalluinnartunik akissarsiaqareersut matumani eqqartorpagut. Akissarsiaat qallerlugit akissarsianut qaffaatissat pitsaasorujussuit, kalaallit suliffeqarneranni sulisut eqimattakkaat allat pissarsiaannit qaffasinnerusut neqeroorutigaagut. Isumaqarpugut neqeroorutini Dansk Metalip ilaasortai ilaatigut Kalaallit Nunaanni aningaasat nalikillinerannut naleqqiullugu ukiunut arlalinnut qulakkeeriffigigivut, tamannalu ukiuni tulliuttuni sulisunut aamma Air Greenlandimut eqqissititsissasoq. Sulisunut eqimattanut taakkununnga pitsaasunik atugassaqartitsinissaq eqqissisimatitsinissarlu, taamaalillutalu tamatta siunissamut piareersimallualernissarput uatsinnut pingaaruteqarsimavoq, taanna oqarpoq, nangillunilu:
- Dansk Metalip piumasaatut aningaasanik, Dansk Metalip piumasaatut akissarsiat qaffaqqinnissaannut atugassanik aallerfissarput ataasiinnaavoq – tassaappullu bilitsit akii, atuisunit akilerneqartussat.
Dansk Metal ukiup ataatsip ingerlanerani akissarsiat qaffaatissaannik, allanik suliaqartut ukiut pingasuniit sisamat ingerlanerini anguneqartartut amerlaqataannik piumasaqartut, isumaqatiginninniarnermut pisortaq ilisimatitsivoq.
Illuatungeriit aggersarneqarput
Siorna Air Greenlandimi arlaleriarluni saqitsaattoqaleraluarpoq.
Aallaqqaammut Dansk Metalilu aamma aappassaanik aasaanerani sulinngiffeqarfik sioqqullugu saqisut isumaqatigiissutaat isumaqatigiissutigineqarsinnaasimanngilaq.
Air Greenlandip maanna Isumaqatigiissitsiniartarfimmiit aggersaassut utaqqivaa, taassumalu illuatungeriit suliumajunnaarnerup aallartinnginnerani aaqqiissutissamik nassaarnissamut isumaqatiginninniartinniarlugit aggersassagai naatsorsuutigineqarpoq.
- Nalunngilarput suliumajunnaarneq piviusunngussappat inuiaqatigiinni suliassaqarfiit annertuut sunnerneqartussaasut. Dansk Metalimiit piffissaq, atuisut amerlasuut sulinngiffeqarlutik angalanissaminnik pilersaarusiorfigisaat eqqorneqarpoq, aammalu angajoqqaarpassuit meeqqatik efterskolereerlutik ilinniareerlutillu angerlarpata takunissaannut qilanaarput. Dansk Metal suliumajunnaarnissamik ilisimasaarummik nassiussinermini piffissamik eqquinerluttorujussuuvoq, sulisoqarnermut pisortaq isumaqarpoq.
Billetinut piumasaqaatit oqilisarneqartut
Taamaattumik billetinut piumasaqaatitsinnik Air Greenland oqilisaalluni, aammalu atuisut suliumajunnaartoqaraluarpat suliumajunnaartoqanngikkaluarpalluunniit qanoq iliorsinnaanerinik erseqqissaalluni sulianik aallartitsereerpoq.
- Kisiannili erseqqissaatigineqassaaq, suli Dansk Metalimut isumaqatigiissuteqarnissarput, taamaalillutalu suliumajunnaarnissamik pinngitsoortitsinissarput neriuutigaarput, HR-imi Pisortaaneq erseqqissaavoq.
Air Greenland piaartumik paasissutissanik amerlanerusunik nalunaaruteqarumaarpoq.