Aasaanera tassaavoq eqalunniarfiup nalaa
Kangerlunni eqaluppassuaqalerpoq, maannalu eqaluit kuunni aamma majulereersimallutik.
Ukiup taamaalinerani piffissaq nuannerluinnartoq tassaavoq kusanavissunik eqaloqarfiata nalaa. Eqaluit kuunnut majulereersimapput taamaattumillu kuunni, kangerlunni tatsinilu nassaassaallutik. Taamaattumik maanna inuppassuit qassusersorput, qissattarlutik imaluunniit kuunni assaannarminnik eqalunnik tigusiniartarneq misilerarlugu.
Maleruagassat atuuttut malikkit
Ullumikkut siunissamilu eqaloqarluarsinnaaqqullugu eqalunniarnerlu pissusissamisoortumik ingerlanneqarsinnaaqqullugu maleruagassarpaalussuaqarpoq. Aliikkutaralugu eqalunniartartut
inuussutissarsiutigalugulu eqalunniartartut tamakkua ilisimasariaqarpaat. Taamaattumik innuttaasunut nittartakkami Sullissivimmi tamakkua ajornanngikannersumik nassaarineqarsinnaapput.
Annertungaatsiartumik isumatusaarsinnaaneq malinneqarsinnaavoq,
kisianni sumiiffiit eqqissisimatitaasut pillugit ilaatigut najukkani aalajangersagaqarpoq.
Nalinginnaasumik atuuttumik eqaluit taamaallaat oqummersat qissattarnermut atorneqartartut atorlugit imaluunniit qalut atorlugit imaluunniit qassutit 100 mm sinnerlugit nigartallit atorlugit
piniarneqarsinnaapput.
Qassutitit ilisarnaasikkit alaatsinaallugillu
Qassusersorluni eqalunniarnermi:
- Qassutit takinerpaaffissaat 30 meteriuvoq
- Qassutit piginnittup aqqanik, angallatip aqqanik angallatillu normuanik ilisarnaaserneqarsimassapput
- Qassutit ningisimatinneqartut tamatigut nakkutigineqartussaapput. Eqalunniarfik qimanneqartussanngorpat, qassutinik piginnittup qassutit takissusaat apeqqutaatinnagu qassutit qaqissavai
Qassutinik atuineq
Eqalunniarneq taamaallaat pisinnaavoq piffissami juunip 15-ianit septembarip 25-anut, ullut taaneqartut ilanngullugit.
Tamatuma saniatigut qassusersornermi maleruagassut ukua Sullissivik.gl-imi atuarneqarsinnaasut, malinneqassapput:
- Kuunni taakkulu tasinngortaanni qassusersorluni eqalunniarnerit tamarmik inerteqqutaapput
- Tatsini eqalunniarnermi kuuit tatsimut akuaniit kuuillu aariaanniit 100 miiterinit qaninnerusumut qassuserneq inerteqqutaavoq
- Tatsini qassusersornermi qassutit tatsip sinaaniit akimut ikertussusiata aggornerisa pingajorarterutaat sinnerlugu takissuseqassanngillat
- Kuup akiani illugiinnik kuuk 150 meter-init qaninnerullugu qassusersorneq inerteqqutaavoq
- Qassutit timaatungaat ulinnerani immap angusagaanut attuumasunngorlugit nivinngarneqartassapput
- Qassutit imartap ikertussusiata pingajorarterutaa sinnerlugu takissuseqassanngillat
- Qassutit narlusuumik nunamiit avammoorlugit nivinngarneqassapput. Amerlanaarlugit pisaqarnissaq siunertaralugu qassutit allatut ilusilerlugit nivinngarnissaat inerteqqutaavoq
- Qassutit eqalunniutit qassutinut tullernut minnerpaamik 30 miiterinik akunnilerlugit nivinngarneqartassapput
- Ujaqqanik sapusiat atorlugit eqalunniarsimagaanni eqalunniarfik qimatsinnagu saputit ingerlaarfilerlugit ammarneqassapput
Ukiup ingerlanerani pingaarnerit ilaat
Eqalunniarneq ilaqutariippassuarnut ukiup ingerlanerani pisartut pingaarnerit ilagisarpaat. Aalisakkat kusanartut tamakkua piniarneqarneranni katersuuttoqartarpoq, amerlanertigullu asimi
eqalunnik suliarinnittut amerlasuut takussaasarlutik.
Aalisakkami mamarluartumik pujoorigaanni, tarajorterigaanni, panertitsigaanni, qerititsigaanni imaluunniit nerisassiarinniinnaraanni, tamatigut mamarluinnartuusarput. Aasarisseruttornerani takkusimaartarmat ulloq ilivitsoq kuunni atorlugu eqaluillu ingerlaarnerat isiginnaarlugu aamma
nuannerluinnartuusarpoq.
Angalalluarisi pisaqarluarisilu!
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...