Skip to main content

Aarit: Sipaarutiginiakkat 12 mio. koruuniniit 72 mio. koruuninut amerlineqarsimapput

Naalakkersuisut juunip 24-ani ataatsimiissimanerannit imaqarniliatigut ilisimatitsissutigineqarpoq, 12 millioner koruunit nalingaanut sipaarniartoqarniartoq, aningaasaqarnermut ataatsimiititaliamit akuereqquneqartunik. Paasinarsivorli sipaarutiginiakkat 72 millioner koruuningajalluinnaasut.

Sipaarniarneq Kalalalit Nunaanni inuiaqatigiit atugarissaarnerannut, Isumaginnittoqarfik sipaarniarnermit eqqugaanerpaasoq pillugu ilanngutassiami nalunaarutigineqartumit eqquinerussaaq.

Paasinarsivormi, Naalakkersuisut aningaasaqarnermut ataatsimiititaliamut qinnutigisimagaat 2020-mut Aningaasanut Inatsisip misissorneqarneranut atatillugu ingerlatsinermut tapiissutissanullu aningaasaliissutit 71.739.000 koruuninik ilanngarneqassasut. Coronap tuniluunnerani inuussutissarsiuteqartunut ikiorsiissuteqarnermi, akiligassat killilersimaarneqarnissaat siunertaralugu millionerpassuarnik nassaarniartoqarpoq.

Sipaarniarfigineqarniartut

Aningaasaqarnermut Ataatsimiititaliamit Naalakkersuisut sipaaruteqarniarnerat imaaliinnarluni akuersissutigineqarnianngilaq, ilaatigut sipaaruteqarfiginiarneqarput uku:

6,0 mio. kr., aalisarnermik ineriartortitsinermut immikkoortitanit

9,1 mio kr., ilaasunik angallassinermut tapiissutinit

2,0 mio. kr., napparsimasunik angallassigasuarnernit

3,0 mio. kr., atornerluisunik katsorsaanernit

1,5 mio. kr., meeqqanut inuusuttunullu immikkut ittumik suliniuteqarnernit

Illuutinik ingerlatsineq Aserfallatsaaliinerlu ilaanngaaffigineqarnerpaallutik 10 millioner koruuninik sipaarniarfigineqassapput, naaka ilisimaneqaraluartoq illuutitoqqat, nungullarsimaqisut oqoqartullu aserfallatsaalineqarnissaat kinguaattooqqasupilussuaq . Kontut ilanngaaffigineqarniartut amerlapput, ilinniartitaanermut susassaqarfik amma millionilikkaanik annaasaqartussaavoq.

- Ataatsimiitialiap suliassat suliarineranni, konto pingaarnerni ataasiakaani atuinikinneruffissatut naatsorsuuteqarnermut tunngaviusut itinerusumik nassuiaasiortoqarsimannginnera amigaatigivaa. Ataatsimiititaliamit taamaammat Naalakkersuisut piumaffigineqarsimapput, konto pingaarnerit sipaarniarfigineqartut tamaasa pillugit itiginerusumik nassuiaasiortoqassasoq. Itisiliinermut ilaatinneqaqquneqarsimapput sipaarniarnerit inuiaqatigiinnut kingunerisinnaasaat, aamma susassaqarfimmut sipaarniarfiusumut kinguniusinnaasut, Aningaasaqarnermut Ataatsimiititaliaq Naalakkersuisunut allassimavoq.

Ataatsimiititaliamit assersuutigalugu tupigineqarsimavoq, atornerluisunik katsorsaasarnermut atatillugu tre millioner koruuninik ilanngaasoqarniarnera, imaqarniliami Sermitsiaq.AG-mit takuneqarsimasumi allassimavoq.

Atugarissaartuuneq pisariaqanngitsumik eqqugaassasoq

- Sulianut COVID-19-ip malitsigsaanik ataatsimiititaliamit suliarineqartunut tunngatillugit, ataatsimiitialiaq isumaqarpoq pingaartumik peqqinnissaqarfik atugarissaartuunerlu pisariaqanngitsumik eqqorneqassanngitsut. Ataatsimiititaliamit kissaatigineqaroq, innuttaasunut aningaasaliissutinik taamak ittunik appaaniaraanni, erseqqissumik itisiliisumillu tunngavilersuisoqartassasoq, aningaasaqarnermummi ataatsimiititaliamit takorusunneqarnerungaluarpoq, inuiaqatigiinni sanngiinnerusut sipaarniarfiginagit sinnersorteqarneq sipaarniarfigineqassasoq.

Aamma ataatsimiititaliamit isumaqatigineqanngilaq, inuussutissarsiornermik siuarsaanissamik siunertarineqartut, soorlu aatsitassarsiorneq aalisarnerlu ilanngaaffigineqarnissaat.

Aningaasaqarnermut Ataatsimiititaliap ilanngullugu oqaatigaa, Illuutinik ingerlatsinermut Aserfallatsaaliinissamullu aningaasaliissutit, pingaartumik sineriammi atorneqartussatut aalajangiunneqarsimasut, appaaffigineqarnissaannik kissaateqarneq erseqqinnerusumik tunngavilersorneqassasoq.

Aningaasaqarnermut Akileraartarnermullu Ataatsimiititaliap taamaalilluni alajangiiffigisassani kinguartikkaa, imaqarniliami allassimavoq.

Sipaarniarnermut pilersaarut 12 milliuunit koruuninik aningaasartaqartoq sipaarniarnermut pilersaarutip 73 milliuunit koruuninik aningaasartaqartumut tapiliussatut isigineqassanersoq pillugu uppernarsaasinnaasumik pissarsisinnaasimanngilagut. Sipaarniarnermulli pilersaarut 85 milliuunit koruuninik aningaasartaqartussatut inissinniarneqarsorineqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER