Aarhusimi Kalaallit Illuutaata allilerneqarnissaanut akit qaffannerat aporfiusoq

Aarhusimi Kalaallit Illuutaata allineqarnissaa, illumik nunarsuup sinneranut ammasumik aamma kalaallinut Aarhusimiittunut nunap immikkoortuatalu sinneranut ammartumik takorluugaannaaratarsinnaalerpoq.

Sanaartornissamut akuersissut inissereerpoq, titartarneqareerlunilu siorna aningaasaliissutit 12 millionit koruuninik akilimmik allilerinissaq inissimmata suna tamarmi ajunngitsutut isikkoqarpoq. Kisianni sanaartugassanik niuerfinni akit qaffarujussuarnerisa pilersaarutit atuutsinngitsoorsinnaavai.

- Atuartitsinermut naalakkersuisoqarfimmut 2,5 millionit koruuninik qinnuteqarnikuuvugut, taakkuuppullu sanaartugassanik suliarinnittartut akit qaffanneranni akitsuutitigisimasaat, Aarhusimi Kalaallit Illuutaanni pisortaq, Jørn Holbech, Sermitsiaq.AG-mut oqarpoq.

Nukinginnartoq

Aningaasaliissutillu pissarsiarinissaat nukinginnarpoq, tassami sanaartornissamut akuersissut ukioq ataasiinnaq atuuppoq.

Illu arlalinnut atorneqarsinnaasoq

Inunnik isumaginninnikkut suliaqarnermini

Ilinniarnermik siunnersuinarmi

Kollegiatut

Kulturi aamma paasissutissiineq – Illup kalaallinut qallunaanullu atuisuminut neqeroorutai allarpassuit ilanngullugit. Assersuutigalugu illup pisiniarfia Kalaallit Nunaanneersunik nerisassanik aamma eqqumiitsulianik nioqquteqartoq. Kalaallit peqatigiiffii killeqanngitsumik unnukkut weekendinilu isersinnaasut.

Suliniummut uku aningaasaleereernikuupput:

  • 6 mio. kr. A.P. Møller fonden
  • 3,5 mio. kr. Aarhus Kommune
  • 2,5 mio. kr. Kalaallit Illuutaat

- A.P. Møller-fonden aamma tunuaratarsinnaavoq, naak suliaq ingerlagallartillugu suliniummik tapersersuinissaat neriuutigigaluariga, Jørn Holbech oqarpoq, taanna allilerinissamut nukippassuarnik atuisimavoq, tassani illorsuaaraq qaqortoq Aarhusip aqqusernini akimanersaat ilaanniittoq iseruminarninngortinniarneqarpoq, ima oqariartuuteqartillugu: iserit misigisaqarlutillu.

Aarhus Kommunep illu pigaa, taanna 1906-mit ukiuni 16-ni ningiutut atuarfiuvoq, kingornalu Diakonitut atuarfinngorluni, kommunillu 1976-imi illu Kalaallit Nunaannut atukkiuppaa.

Amerlanerit peqataasinnaapput

Annertuumik allineqarneratigut Kalaallit Illuutaat inunnut amerlanerujussuarnut kulturikkut aaqqissuussinissamik periarfissaqalissaaq, illumi sulisut sulinerat ajoqusinngikkaluarlugu. Sulisut ullumikkut inersuarmut ataatsimoorussamut atasumik allaffeqarput.

Kalaallit Aarhusimiittut ukiut ingerlanerini amerliartorrsimapput, tamatumalu illup kulturikkut sapinngisamik amerlanerpaanik aaqqissuussamut qaaqqusiniarneranut aporfeqartarluni.

Powered by Labrador CMS