Aarhusimi Kalaallit Illuat nutaamik pisortartaalersoq
Tanja Nielsen 49-nik ukiulik Aarhusimi Kalaallit Illuani pisortatut atorfinitsinneqarsimavoq, maajillu aallaqqaataani sulilissalluni.
Jørn Holbech kræfteqarluni napparsimanerminik pissuteqartumik suliffiminit tunuarniarluni aalajangermat, Tanja Nielsen Aarhusmi Kalaallit Illuanni pisortanngussaaq.
Aarhusimi Kalaallit Illuanni siulersuisut siulittaasuat Aage Rais, atorfinitsitsineq pillugu tusagassiorfinnut nalunaaruteqarnermi oqarpoq:
- Tanja Nielsen Royal Arctic Linep siulersuisuini ukiuni arfineq-pingasuni sulisimanermigut suliassaminik ilisimasaqarluarpoq, suliffeqarfinnillu aamma tapiissuteqartartunik ilisimasaqarluarluni. Naatsorsuutigaarput suliffeqarfitsinni pisariaqartinneqartumik aaqqqissuussaassutsimik aqutsinermillu pilersitsiumaartoq. Siulersuisuni pingaartissimavarput, ullumikkut Kalaallit Nunaannut naapertuuttumik ineriartortitassatullu periarfissanik takunnissinnaasumik, taamalu Kalaallit Nunaata Region Midtjyllandillu imminnut attaveqatigiinnerat tunngavigalugu suleqateqarsinnaasumik pisortassarsinissarput. Taamaammat nuannaarutigisupilussuuarput danskinik kalaallinillu ataatsimoortitsisinnaasumik pisortassarsisinnaagatta.
Siulersuisuni ilaasortaasimasoq
Tanja Nielsen Kalaallit Nunaanni inunngorlunilu alliartorsimasoq, nammineq piumassutsiminik illunut pulaartartuuvoq, pulaartartullu siulersuisuinililaasortaasimalluni.
- Aarhusimi Kalaallit Illuat pingaarutilinnik suliaqartarpoq, suliarisartagaalu pingaartitaraakka. Kalaallit ilinniartut Danmarkimik naapitsigaangamik misigisartagaat ilisarilluarsinnaavakka, misigisartagaannillu oqilissaassiniarlutik kalaallit illuani sulisut suliaqarluartareerput. Tamatuma siuttuuffiginissaa qilanaaraara. Inersuaq kulturikkut sammisassaqarfiusussaq kusanarluinnartoq, kalaallit peqatigiiffiisa sammisassaqartitsisartullu tamarmik ataatsimoorfigisinnaasatut amigaatigisimasaat atorneqarnissamut piariiliivippoq, Tanja Nielsen tusagassiorfinnut nalunaaruteqarnermi oqarpoq.
- Periusissiaq nutaaq piffissanngorpat atuisut, sulisut, tapiissuteqartartut, siulersuisut soqutigisallillu suleqatigalugit atuutsinneqarlernissaa qilanaaraara, Tanja Nielsen USA-miittumi Fairbanksimi University of Alaskami Aarhus Universitetimilu kemikeritut ilinniagaqartoq ilisimatitsivoq.
Pisortanngortussaq DAVA-mi, Danmarkimi imermut tunngatillugu ingerlatseqatigiiffiit peqatigiiffianni suilsimavoq, aamma VTU-Fondenimi aningaasaateqarfimmik aqutsisuusimalluni, Danmarkimi ingeniørinut siunnersuisartuusimavoq kiisalu Kalaallit Nunaanni kuultisiorfimmi siullermi avatangiisinut tunngasutigut pisortaasimalluni.