Aaqqissuussaaneq uatsinnut naleqqutinngilaq
Qilaatersortartoq oqaluttuartartorlu Hivshu R. Peary Nuummi inersuarmi inunnik ulikkaartumi ileqquvut naleqartitavullu pillugit oqalugiarpoq. Qanoq ililluta siuaasatta anersaavi piffinni nutaaliaasuni paasissavavut?
- Inuuleramali aatsaavissuaq taamatut oqalugiartumik misigisaqarpunga, unnummi isiginnaartut ilaat oqarpoq.
Ilinniarfissuup eqaarsaartarfitoqaaniippugut. Taanna inunnik ulikkaarpoq Hivshu Robert Pearyp Issittumi ileqqut naleqartitallu pillugit oqalugiarneranik tusarnaarianik. Inuit 50-it missaanniittut takkussimapput aamma oqalugiarneq Facebookikkut toqqaannartumik aallakaatinneqarpoq, sineriammilu tamarmit taassuminnga isiginnaartut 250-it missaanniipput.
Aviisi AG taama allappoq.
- Taamatut oqallinnermik eqeersitsisumik inuunera tamaat ujartuisimavunga, isiginnaartut ilaat alla oqarpoq.
Hivshu Robert Peary atuakkiortuuvoq, qilaatersortartoq oqaluttuanillu oqaluttuartartoq. 1956-imi inuusimavoq, nunatsinni nunaqarfiit avannarlersaannit tamannalu ilutigalugu nunarsuarmi inoqarfiit avannarlersaasa ilaannit Savissimimmeersuuvoq. Unnuk manna Inuit ileqqui, naleqatitartaat kulturiallu atuakkiaanit sisamaasunit tunngaveqartut oqalugiaatigissavai.
Inersuarmi silaannaq oqippasippoq. Tikilluaqqusaasutullu misigisimanarpoq.
- Manna oqaluffiunngilaq, ilisisoqanngilaq. Tamatta inuuvugut, Hivshu oqaluttuarluni aallartippoq imatullu nangilluni:
- Anersaat eqqartoraangatsigit arlaannut piviusuunngitsunut attuumassuteqartittalersimavavut. Ullumikkut siuaasatsinnut tunngatillugu eqqarsartariaatsip taassuma akerlia atorparput.
Aviisimi AG-mi atuarnerusinnaavutit. Aviisi uani pissarsiariuk:
