Tusagassiuutit maskiinatut naassaanngitsumik, qaarsillanngisaannartutut, ingerlasutut ipput.

Ilungersunarpa? Aap.

Nuannerpa? Aap.

Pinngitsuugassaajunnaartarp? Aap.

Ukiuni 40-ni taamaassimavoq.

Sammisat qanorluunniit ittuugaluarpata tusagassiuinermik suliaqarnermit soqutiginarnerusoqanngilat: nutaarsiassat sakkortuut, ilisarititsinerit, oqaluttuat tunuliaqutaat, ilanngutassiuinerit – you name it. Taamaapporlu tusagassiortutut tunniusimalluartutut alapernaatsutut imaluunniit aaqqissuisoqarfimmi aqutsisutut aallarnisaasutut suliaqaraluaruilluunniit. Uannut taamaassimavoq. Innuttaasunik kiffartuussilluni sulineq, persuarsiuutiginnilaassagutta.

Sermersuaq aakkiartorpoq. Kalaallit Nunaat silap pissusiata allanngoriartornerani qitiulluinnarpoq, Issittumilu illersornissakkut nunarsuarmi sumiiffittut pingaaruteqarluinnalersimasutut nutaajulluni. Pissaanilissuit unammilleqatigiipput sakkutooqarnikkullu annertusaallutik.

Kalaallit Nunaat inuiaassuseq aallaavigalugu piorsaaleruttorpoq namminerlu kinaassutsiminik isiginninnialeruttorluni. Siunissami ungasinnerusumik immaqa namminiilivinnissamik.

Kisianni aamma pisut ajorluinnartunik tunuliaquteqarput: imminut toquttartut amerlavallaartut, meeqqat sumiginnagaasut amerlavallaartut inuiattullu tarnikkut ikilerneqaatinik sivisuumik atuussimasunik qaangiiniarnerit, soorluni inuianni allani nunasiaatigineqarsimasuni aamma taamaassimasoq. Inuttut naleqassuseq inissarlu pissarsiareqqinniarlugit tamaviaarutiginninneq. Inuiannguanut tamaviaarutiginninneq ajornakusoortoq, aammali pisariaqartoq.

Naatsumik oqaatigalugu tusagassiortunut suliaminnik pingaartitsilluinnartunut suliassat tulleriiaaginnavipput. Pitsaanerusumik pilersitsiniarluni atorfilittatullu eqqarsariaaseqarneq qimanniarlugu pingaartitsilluinnarneq.

Isertuunneqartut amerlasoorujussuusinnaapput. Tamanna oqaluttuarisaanermit ersarilluinnartumik takutinneqarpoq. Silarsuaq pitsaanerpaajunngilaq. Kisianni tusagassiorneq aqqutigalugu najugaqarfigissallugu pitsaanerusunngortitseqataasinnaavugut. Killissaa tikillugu misissuisoqartassaaq. Attuumassuteqartariaqarpugut. Suliamik pitsaasumik anguniagaqarluni kiffartuussinerup aqqani. Tusagassiornermi itinerusumik isigalugu kisimiilluni ingerlatsinerunngilaq. Sunniivigeqatigiinnerup ilagaa – tamat oqartussaaqataaneranni ingerlatitsisut ilaat.

Pinngortitap inatsiginngilaa

Taamaattumik tusagassiuutit piunerat innarlerneqassanngilaq. Tusagassiuutit pituttorsimanngitsut pinngortitami inatsisaanngillat. Rusland qiviaannariartigu, tassanimi Putinip tusagassiuutit peqqarniitsumik aqutarai, taamalu pissaanilittaasut paasissutissiissutaat naleqqussagaasut taamaallaat innuttaasunut tusarliunneqartarlutik.

Arlaannaannulluunniit attuumassuteqanngitsunik tusagassiuuteqassagaanni tunngavissaq tassaavoq aningaasaqarnikkut isertitaqarnissaq, aaqqissuisoqarfimmi sulisoqarnissamik qulakkeerinnittoq. Ajornanngippat nammineerusunneruvugut. Inuiaqatigiinni Kalaallit Nunaannisut ittuni tamanna immikkut nassaarsiorsinnaanissamik piumasaqarfiuvoq, taakkunanimi namminersortut ingerlatsinerat pisortat aningaasaqarnikkut qalliunerujussuullutik inissisimaffigisaannut sanilliullugu killilerujussuuvoq.

Taamaattumik Namminersorlutik Oqartussat tusagassiuutinut tapiissuteqarnerannik qutsavigineqassapput. Tapiissutilli nunanut avannarlernut sanilliutissagaanni amerlanerujussuusariaqaraluarput. Tusagassiuutinimi assigiinngiiaassutsip qulakkeerneqarnissaa pingaaruteqarluinnartuuvoq. Tamannarpiaq pissutigalugu nunani allani tusagassiuutinut annertunerujussuarmik tapiissuteqartoqartarpoq.

Imaanngitsut tusagassiuutit pituttorsimanngitsut politikerinit nuannarineqartorujussuummata. Kisiannili taama pisoqartarluni tamat oqartussaaqataanerata tusagassiuuterpassuarnit nukittorsarneqartarnera nassuerutigalugu. Tamanut ammasumik oqaloqatigiinnermik assigiinngiiaalersitsillunilu tamatigoortunngortitsivoq, aap, inuiaqatigiinni siuariartornermik annertunerusumik kinguneqartarpoq, ilisimasaqarneq pisussaaffiliisarmat. (Tusagassiuutini) niperpassuit pissutsinik pitsaanerulersitsisarput.

Titarnerit ukua allanneranni aaqqissuisuunertut Atuagagdliutit/Grønlandsposten kingulleq inaarsaleruttorpara, septembarillu 1-ani tusagassiorfimmi Sermitsiaq.AG-mi pisortaanertut suliunnaassallunga qaammatinilu tulliuttuni arfinilinni siunnersortitut atuuffeqassallunga. Unammilligassarpassuaqaraluartoq – minnerunngitsumik techimi suliffeqarfissuarnit Facebookimit Googlemillu – ussassaarutinik niuerfimmit koruuninik millionerpassuarnik, tusagassiuinermut suli annerusumut atugassanngortinneqarsinnaagaluartunik, tigooraasunit – aquttarfimmit aqqassaanga siunissaq pisarnittut upperalugu, aamma piumassuseqaraanni suliaqartoqarujussuarsinnaanera upperalugu.

Piginnaasaqarpugut

Isumalluarnartunut tunngasut iserfigilaariarutsigit, tulluusimaarutigaara tusagassiorfiup annertunngikkaluartunik isumalluuteqarluni tusagassiuinermik qaffasissumik pitsaassuslimmik annertumik naammassisaqartarnera. Saqqummersitsisarnikkut piginnaasavut aqqutigalugit kulturimik malunnaatilimmik tigummiartuuvugut.

Saqqummersinneqartartut tassaapput aviisit naqitat nuna tamakkerlugu saqqummersartut marluk (Sermitsiaq aamma AG), nutaarsiassanik nittartartagaq nukittooq nuannarineqarluartorlu, illoqarfiup aviisia akeqanngitsumik agguaanneqartartoq Nuuk Ugeavis, timmisartuni aviisi Suluk, arnanut atuagassiaq Arnanut, sammisanik paasissutissiissutinillu saqqummersitat ilaatigooriarlunilu atuakkanik saqqummersitat inunnik ilisarititsinernik, assilisanik atuakkianik isumaliutersuutinillu imaqartut.

Tamarmik oqaatsini marluinni. Tusagassiorfik  naatsumik oqaatigalugu piffissami inuiaassutsimik piorsaaffiuleruttortumi kinaassutsimillu nukittuumik isiginninniarfiusumi oqaatsinik inuit ikittuinnaat atugaannik tammatsaaliuinermut tapersiissuteqartartuuvoq pingaarutilik. Tamanna kusanartpoq, allaallu anertikkarnangajalluni, taamaallaallu pisinnaalluni immikkoortuni tamani sulisut pikkorissut pissutaallutik.

Corona ajornartorsiutillu avataaneersut atuussimagaluartut tusagassiorfimmi suliffissat saqqummersitallu tamarmik attanneqarsinnaasimapput. Ukiuni kingullerni arfineq-marlunni tusagassiorfimmik ataavartumik nutarterisimavugut digitalimik imaqarnerulersikkiartuaarlugu nutaanillu isertitaqaleriartuaarluta. Tusagassiorfik siuarsimangaatsiarpoq sulilu annertuunik pisussaqarluni.

Aningaasaqarnikkut patajaassuserput Danmarkimi tusagassiorfiit ilarpassuinit annertuneruvoq, taakkuami piffissami matumani sipaarniarnernit soraarsitsiornernillu eqqugaasimapput. Kalaallit Nunaanni piginnaaneqarpugut. Sulisut tunniusimalluartut isumassarsiallu eqqortut aqqutigalugu angusaqangaatsiartoqarsinnaavoq.

Sunaluunniilli qulakkeerneqarsimanngilaq. Ippassaq nutaaliaasut ullumikkut pisoqalereersimasarput. Tusagassiuinermik suliaqarfimmi ingerlarsortoqarpoq. KNR-ip ussassaarutinik suliffeqarfia immikkut ittumik ajornartorsiortitsisuuvoq. Tusagassiorfik pisortanit aningaasalersorneqartoq ukiumut 90 millioner koruunit missinginik tapiiffigineqartartoq ussassaarutinik neqerooruteqartarpoq tusagassiorfiup Sermitsiaq.AG-p tusagassiuutillu pituttorsimanngitsut allat unammillersinnaanngisaannik akeqartitsilluni.

Tamanna unammilleqatigiinnermik equtitsisuuvoq Namminersorlutillu Oqartussat namminersortut niuerfiannik ineriartortitsinissamik kissaataannut naapertuunnani. Tamanna soorunami allanngortinneqartariaqarpoq. Ajornanngippat ullumi, aqagumut kinguartinnagu. Tamat oqartussaaqataanerat assigiinngiiaassuserlu nukittorsarneqarlik.

Oqartoqartarpoq tusagassiuineq piffissaalluarallartillugu qimakkaanni sunik tamanik kinguneqarsinnaasoq. Uannut 1958-ernisaasumut kingusippoq. Tamatigut tusagassiuinerussaaq. Nammineq piumassuserilluinnakkannik suliunnaaruma inuulluaqqusilluni ilasseqatigiissitsisoqassanngilaq. Kisianni aqqutinni inunnut alutornartorsuarnut naapissimasannut tamanut qujarusuppunga.

Inuit ilaannit rødviinnimik allamilluunniit pitsaasumik nassiussinissaq isumaliutigineqassagaluarpat, taarsiullugu Meeqqat Oqaaseqartartuata suliniarnerata tapiiffigineqarnissaa pingaartissavara. Suliniarnermi taanna annerpaamik nersorneqartariaqarlunilu tapersersorneqartariaqarpoq.

MIO-p kontoata normoraa:  reg.nr. 6471 kontonr. 1171280