Aaqqissuisuuneq innersuussivoq: TV2 immaqa politiinut suliassanngortinneqassaaq
Qineqqusaarnerup nalaani TV2-p eqqunngitsumik unnerluussutai qulaajarniarlugit IA-p Naalakkersuisullu siulittaasuata politiit akulerutsinnialerpai. Inummik ajortisaanerineq, qinersinerup inerneranut sunniuteqartussaasimasoq
Múte B. Egede qanittukkut ersarissumik nalunaaruteqarpoq tv-eeqarfik naalagaaffimmit pigineqartoq TV2 Tusagassiornermi Aalajangiisartunut maalaarutiginiarlugu. Isumaliutini taanna maanna unitsiinnarpaa. Tusagassiuinermi Aalajangiisartuni TV2-mit allanik nutaanik, ilisimaneqariinngitsunik, saqqummertoqarnavianngilaq.
TV2-mili qullersat eqqissiallassanngillat. Pisimasoq puigorneqarnavianngilaq. Taarsiullugu Múte B. Egedep qallunaat tv-eeqarfiat politiinut suliassanngortinniarpaa, eqqartuussissuserisumillu misissuisoqassasoq piumasariniarlugu.
Taamatut naalakkersuisut siulittaasuat AG-mut paasissutissiivoq.
TV2-mi nutaarsiassaqartitsinermut pisortap Ulla Porsip utoqqatsissutai Múte B. Egedep naammaginngilluinnarpai. Taassuma pappiaqqat paasissutissat avataaneersut, qinersinissaq ullunik sisamanik sioqqullugu, apriilip aappaani, TV2-p allaaserisaanut tunngaviusut, suminngaanneernersut oqaatigiumanngilaa.
Qineqqusaarnermi uranimik piiaanissaq illersorlugu akerleralugulu politikkikkut sakkortuumik oqallinneqaleruttornerani. Allaaserisami Múte B. Egede ajortisaarneqarpoq politikeritut tatigisassaanngitsutut, ilaatigut politikkikkut aalajangeeqataasarsimasoq, nammineq aningaasarsiornikkut ilaqutigisassaminik. Aamma naammaginngilaa Ulla Porsip TV2-p isiginnaartartunut aaqqissuisua, Lars Bennike, kajumissaarmagu taassuminnga tusagassiornerup ingerlarnga misissoqqullugu: TV2-p TV2 misissuiffigissagaa.
– Naapertuilluartumik pineqarusuppunga, Múte B. Egede oqarpoq nangillunilu:
– TV2-p oqaluttuaa uppernarsaatissaqanngitsoq – allaaserisap saqqummiunneqannginnerani oqaaseqarfigissallugu periarfissaqarfigisimanngisara, kingornalu pasilliinerit akerlilerniarlugut TV2-mi akissuteqaruminaatsitsisimallunga – suli ajornartorsiutaavoq erloqinartoq. Allaaserisami kukkusumik paasissutissiissutut qinersineq sunnersimasinnaagaluarpaat immaqalu sunnersimallugu.
– Eqqortuliornerunngisaannarpoq nukiit ilisimaneqanngitsut oqartussaaqataanikkut qinersineq sunnerpassuk. Taamaattumik pisimasoq iternga tikillugu misissortikkusuppara. Pingaaruteqarpoq oqartussaaqataanermik naleqartitavut illersussagivut. Eqqartuussissuserisumik misissuinikkut pisimasumi TV2-p inissisimanera qulaajarneqassaaq, taannalu immaqa eqqartuussivikkoortitsinissami tunngaviussalluni. Politiit misissuinerisigut eqqunngitsumik pasillerneqarninnik pinngitsuutinneqassaanga, maannalu eqqartuussivikkoortitsinissamut tunngavissarsiorlunga paasissutissanik katersuilersimavunga, Múte B. Egede nassuiaavoq, taassumalu allakkiaq 11-nik quppernilik, TV2-mi allaaserisamut tunngaviusoq, tigumiarpaa.
Oqaluttuaq tamanna saqqummiunneqarpoq ulloq taanna, AG-p qinersisartumik isumasiuineq tunngavigalugu allaaserinnimmat IA siuariassasoq ilaasortaatitani sisamanik ilallugit, qularnanngitsumillu naalakkersuisunngortitsisussanngussasoq. Qinersisartunit nuannarineqarneq tamanna ullualunnguit qaangiuttut ajugaanermik kinguneqarpoq, uranimullu akerliusoq IA, Múte B. Egede siuttoralugu, naalakkersuisunngortitsivoq.
Salluliorneq nakutitseriarnerlu
Múte B. Egede nutaamik taamatut nalunaaruteqarpoq qallunaat aviisiata Berlingske Tidendep allakkiap imarisaata ilai qitiusut qanittukkut saqqummiummagit, tassanilu takuneqarsinnaavoq allakkiamik nassiussisut ilisimaneqanngitsut qanoq isillutik akiliisinnaajunnaarnermik iluaquteqarniarneq, pissaanermik atornerluineq pinerlussimanermillu pasilliinerit uppernarsaatissaqanngitsut atorlugit TV2 uukapaatinniarsimagaat qineqqusaarnermi paasissutissat tamakkua ingerlateqqeqqullugit.
Allatut oqaatigalugu IA-p siulittaasua qineqqusaarnermilu uranimut akerliusut nuimanersaat ajortisaarniarneqarsimavoq. Allakkiaq, saqqummiussaminik ima tunngavilersorluarpasitsigimmat maanna nutaarsiassanut aaqqissuisuujunnaarsimasup Ulla Østergaardip tusagassiortut arlallit qinnuigisimallugit paasissutissat tamakkua suliarinerat ingerlateqqeqqullugu, soorluttaaq taassuma naggataatigut aalajangersimagaa allaaserisaq kukkuneqaqisoq saqqummiunneqassasoq, taannalu sukkasuumik nunatsinni nettimi inuit naapittarfiisigut siammarterneqapallappoq.
Taamaasiortoqarpoq aali naqitanik tusagassiortut aaqqissuinermi qullersanut mianersoqqusiniarsimagaluartut, Transparency Greenlandillu pasilliinerit atasinnaanngissuseqarnerannik mianersoqqusisimagaluartoq.
Allaaserinnittoq allakkiakkut nassuiaavoq suna pissutigalugu Kalaallit Nunaanni tusagassiorfiit saaffigineqarsimannginnersoq, pissutaavorlugooq ”nunatsinni qangatut isorinnittumik itisiliisumillu tusagassiorfeqanngimmat”. Piviusorli tassaavoq aviisip Sermitsiap siusinnerusukkut tamanna pillugu allaaserisaqarsimammat, inerniliillunilu pasilliinerit tamakkua tunngavissaqanngitsut. Allakkiap tatiginassusia qularnanngitsumik tunuartinneqarsimassagaluarpoq Kalaallit Nunaanni tusagassiorfinnut saaffiginnittoqarsimasuuppat, tamatumalu takutippaa allakkiaq sooq TV2-mut nassiunneqarsimanersoq/tunniunneqarsimanersoq.
Múte B. Egede kisimiinngilaq. Siumup TV2 kajumissaarsimavaa nassiussisoq oqaatigeqqullugu, Atassutillu kissaatigaa misissuisoqassasoq paasiniarlugu pissaanillit nunat allamiut, politikkikkut akerlerisat imaluunniit qineqqusaarnermi sammineqartorujussuit ilaat – Greenland Mineralsip Kuannersuarni urani saniatigut tunisassiaralugu aatsitassarsiornermik suliniutaa – piaaraluni eqqunngitsunik paasissutissiinermut attuumassuteqarnersut.
AG-p Jørn Skov Nielsen, Greenland Mineralsip nunatsinni saniatigut selskabiata pisortaa, oqaaseqartinniarsimagaluarpaa iluatsinngitsumilli. Ingerlatsivilli taanna australiamiunit-kiinamiunit pigineqartoq Berlingske Tidendemut allakkatigut akissuteqarpoq ”TV2-mi pisimasumi Greenland Minerals attuumassuteqanngitsoq”.
Erloqinartoq
Pisimasoq pissutigalugu piffissami kingullermi aamma qallunaat partiivi arlallit akuleruttalersimapput, ilaatigut Enhedslisten aamma SF, taannalu tusagassiortut aviisianni Jounalistenimi tunuarsimaanngilaq. SF-ip Kalaallit Nunaat pillugu oqaaseqartartuata Karsten Høngep TV2 kajumissaarpaa oqaluttuamut salluliuummut paasisaqarfitsik saqqummiuteqqullugu, naalagaaffiit imminnut attuumassuteqarnerat pineqarmat.
– Paasisariaqarparput kina taamaaliorsimanersoq, takuniassagatsigu suna pineqarnersoq. Danmark Kalaallit Nunaallu naalagaaffeeraannaapput, politikkikkullu aningaasarsiornikkulluunniit soqutigisat annertuut pineqarmata ilisimasariaqarparput soqutigisat suut pineqarnersut, Karsten Hønge oqarpoq, taannalu isumaqarpoq pisimasup qulaajarneqarnissaanut politiit immaqalu isertortumik paasiniaasarfiit akulerutsinneqartariaqartut.
Paasissutissanik eqqunngitsunik nassiussisoq TV2 ikiortigalugu kinaassuserneqarnavianngilaq, taassuminnga nalunaarusiortoq suna pissutigalugu taamaasiornerminut nassuiaasinnaagaluartoq aammalu pisimasumut uissuumminartumut qulaajaaqataasinnaagaluartoq.
– Pisimasoq erloqinartorujussuartut isigaarput. Kukkorujussuarsimavugut. Oqaluttuap saqqummiutinnginnerani pitsaassusia qulakkeersimanngilarput. Tamanna arlaleriarlunga utoqqatsissutigisimavara, tamatumani ilanngullugu Múte B. Egede nammineq saaffigalugu utoqqatserfigalugu. Paasissutissiisunilli illersuissaatitaaneq saneqqunneqarnavianngilaq. Taanna (paasissutissiisumik illersuisinnaatitaaneq) sakkukillisarneqarsinnaanngilaq, Ulla Pors oqarpoq, innersuussutigalugu TV2 siusinnerusukkut paasissutissiisumik illersuinermik suliassami Højesteretimi ajugaasimasoq.
Lars Bennike, TV2-p isiginnaartartunut aaqqissuisua, aamma misissuinermut iluaqutaangaarnavianngilaq.
– Qullersat aalajangiusimavaat paasissutissiisoq uannut oqaatiginaviarnagu. Uanga samminiagassarilerpara kukkunerit taamaattut siunissami qanoq isilluta pinngitsoortissinnaanerivut, Lars Bennike oqarpoq, taassumalu ilisimanngilaa nutaarsiassanut aaqqissuisuusimasoq Ulla Østergaard TV2-mi anereersimagami misissuinermi peqataanissaminut pisussaaffeqarnersoq, tusagassiornermilu oqaluttuap mamianartuliap, suli arlalinnik qulaajarneqanngitsunik apeqqutitallip, qulaajarneqarneranut peqataalluni.
Ataaserli qularnanngilaq. Qulaajaaniarnermik suliaq suli naammassineqanngilaq. Kinguneqartussaavoq. Múte B. Egede qanoq pisoqarnissaanik ilimasaarivoq. TV2-milu qullersat aamma qularivallaassanngilaat siunissami akunnerminni qanoq pisoqassanersoq. Allakkiaq TV2-mut nassiunneqarsimasoq tusagassiorfinnit allanit sammineqalereersimavoq.
Apeqqutaavoq eqqunngitsunik paasissutissiisoq qanoq amerlatigisut ilisimaneraat. Tamanna ippingiatortitsivoq. Aamma Folketingimi. Tassani Folketingimut ilaasortap Jens Rohdep maanna kulturimut ministeri aperaa oqaatigisinnaaneraa TV2-mi qullersat ilaqarnersut eqqunngitsuliornermut peqataasimasunik imaluunniit tamakkua Múte B. Egedemut eqqunngitsunik pasilliinerup ingerlarnganut ilisimasaqarsimanersut.