Aaqqissuisuuneq innersuussivoq: »Tusagassiorfinnik qilersorsimanngitsunik saassussineq«

Naalakkersuisut aamma Demokraatit suliffeqarfiit nutaarsiassatutaallakaatitassianut akiliisinnaalernissaat akueriniaraluarmatigik,arajutsisassaanngitsumik Inatsisartuni ikinnerussuteqarput

Nutaarsiassat sponsoreqassappat sponsoreqassanngillalluunniit?

Coronap ajornartorsiutaanera pissutigalugu nunarsuarmi sumi tamaani tusagassiorfiit namminersortut tatineqarput. Ussassaarutitigut isertitat ikiliartorput. Sipaaruteqartoqartariaqarpoq.

Kalaallit Nunaanni aamma taamaappoq.

Maanili oqaluuserineqanngilaq tusagassiorfiit namminersortut, attuumassuteqanngitsut atugarliortullu qanoq iliuuseqarfigineqarsinnaanersut, akerlianilli oqaluuserineqarpoq landskarsimit aningaasalersukkap KNR-p isertitai qanoq isilluni amerlisarneqarsinnaanersut.

Aaqqissuisuuneq innersuussivoq

Allaaserisaq una aviisimit AG-mit tigusaavoq, aaqqissuisuunermit Christian Schulttz Lorentzenmit toqqarneqarluni.

Taamaalillutit nittartakkami atuartartutut aviisimi allaaserisamik, nalinginnaasumik aningaasanik akeqartartumik atuarsinnaallutit. Neriuppugut allaaserisaq aviisit allaanerunerannik aamma tusagassiutini akeqanngitsuni issuakkatut nutaarsiassaannaannginnerannik takutitsiumaartoq. Aviisit pitsaassusaat annertooq itisiliinernit aamma tunuliaqutinik aamma minnerunngitsumik inuit pillugit allaaserilluakkanik pissuteqarput.

Neriuppugut misiliummik pisartagaqalernissannut isumassarsiorfigisinnaagit, taamaalillutik inuiaqatigiit ineriartornerannut malinnaalluarsinnaanerussagavit.

Aviisimut neqeroorummik pissarsigit – 38 39 40 sianerfigiuk imaluunniit mail adm@sermitsiaq.gl allaffigalugu

Tamanna qanittukkut Inatsisartuni oqaluuserineqarpoq, Demokraatinit siunnersuutigineqarmat KNR-mi nutaarsiassat piffissamilu atuuttumi pisunik aallakaatitassiat, sponsorinit aningaasaliiffigineqartarnissaat ammaanneqassasoq. Siunnersuut kulturimut akisussaasumit, Naalakkersuisunut ilaasortamit Katti Frederiksenimit, taperserneqarpoq, taanna isumaqarluni sponsoreqarneq ajunngitsuusoq, sponsorip kinaanera taaneqartarpat.

Naalakkersuisunngorlaaq Katti Frederiksen tupaallannaraluartumik kalerrinneqarsimanngilaq siunnersuut – nangaanartoqartitsisoqaraluartoq – itigartinneqarluinnassasoq, tassa partiit annerpaat marluk siunnersuut akerlilermassuk.

IA-p oqaaseqartuata siunnersuut sakkortuumik oqaaseqarfiga:
– Nutaarsiassat piffissamilu atuuttumi pisunik aallakaatitassiat sponsorinit aningaasalerneqartut ilisarnaatigaat tamakkua sponsorisuminnut iluarinartuussammata sponsoriminnillu narrujuummisitsissanatik. Sponsorip soqutigisai sammineqarlutik, sammisat aallakaatitassiallu ilumoortuunissaat pivallaarnagu; suut tamarmik sponsorip siunertaanik kissaatigisaanillu tunngaveqarput, IA-p oqaaseqartua Peter Olsen oqallinnermi oqarpoq – nangipporlu:
– Aamma ullaaq tusagassiortut peqatigiiffiannit mailerfigitippunga, tassanilu allassimavoq nutaarsiassanik aallakaatitassiat sponsoreqarnissaat tusagassiortut nuannarinngikkaat.

Peter Olsenip siunnersuut taavaa »tusagassiorfinnik qilersorsimanngitsunik saassussinertut«.

»Tunissut«

Demokraatineersup Nivi Olsenip IA-p nangaassuteqarnera paasisinnaanngilaa. Taassuma takorloorpaa sponsorinit aningaasaliisoqartalersuuppat KNR-p aallakaatitassia nuannernerulerlutillu siammasinnerulissasut.

– Sponsorinit tapiissuteqartarneq ammaanneqartuuppat radiomik naalaarneq tv-millu isiginnaarneq nuannernerujussuanngorlunilu pissanganarnerujussuanngorsinnaavoq. Imaassinnaavoq nunamut allamut angalanissamut aningaasaliisoqartoq, taava aallakaatitanik, ullumikkut takusartakkatsinnit allaanerusunik misigisaqartalissagaluarpugut, taanna oqarpoq.

– Isumaqarpunga radio tv-lu soqutiginarnerulissasut, Nivi Olsen, Demokraatineersoq, oqarpoq.

Tamanna peqatigalugu Nivi Olsenip erseqqissarpaa KNR-p ingerlatsinini pimoorullugu, aaqqissuussinikkullu malittarisassat, atornerluinissamik pinngitsoortitsisut, aallaavigalugit aaqqissuuttariaqaraa.

– Sponsorit aallakaatitassiat imarisaannut akuleruttassanngillat. Tatigisariaqarparput tusagassiortut inuiaqatigiit soqutigisaat aallaavigalugit sulissasut. Isumaqarpunga sponsorit namminersortut sorpassuarnik naalersitsissasut. Parteeqataa Justus Hansen ilaliivoq.


– Takusinnaanngilara sooq landskarsi tamatigut akiliisartuussanersoq. Pissutsit tamakkua allaanerusumik isumaliutigilertariaqarpavut, taanna oqarpoq.

Tusagassiorfiit ajortisarpaat

Atassutip siulittaasuata Aqqalu Jerimiassenip oqaaseqarami pissaanillit tusagassiorfinnik qilersorsimanngitsunik ajortisaarisarnerat isornartorsiorpaa.


– Uteqattaarneqartartorujussuuvoq tusagassiorfiit salluliortut. Tussagassiorfinnik tatiginninneq apeqqusertuaannarutsigu taava oqartussaaqataassuseqarnerput ajoquteqarsimassaaq. Tamanna nakeriallannarpoq, tassami tamakkua isorinnittumik apeqqusiineq ajorpata tamanna oqartussaaqataanermik innarleeqataassaaq. Tusagassiorfiit namminneq tusagassiornermi ileqqorissaarnissamut malittarisassaqarput, tamakkualu malinnissaat ataqqinaatissatut isigaat, innuttaasunit tatigineqassagunik, Aqqalu Jerimiassen oqarpoq.

Siumup oqaaseqartua Erik Jensen oqallinnermi akunnernik arlalinnik sivisussusilimmi ataasiaannarluni oqaaseqarpoq. Akerlianik ersarilluinnartumik oqaaseqarpoq.


– KNR ukiumut 68 millioner koruuninik aningaasaliiffigineqartarpoq, tamatumalu saniatigut kontomit allamit saniatigut 25 millioner koruuninik pisarluni. Pingaaruteqarpoq nuna tamakkerlugu tv-kut aallakaatitsiviup uppernartuunissaa qilersorsimanngitsuunissaalu, aammalu stationeqarfiup tatigineqarnissaa. Siunnersuut tapersinngilarput. Itigartinneqarnissaa inassutigaarput.

Justus Hansen naggatissaa tikillugu tamaviaaraluarpoq, naggataatigulli tunniutiinnartariaqarluni.


– Siunnersuut akuerineqartuuppat nuannissagaluaqaaq, taava aallakaatitassiat nuannersut, assersuutigalugu Qaanaamit silap pissusiata allanngoriartornera, tamassumalu tassani inunnut qanoq sunniuteqarnera pillugu aallakaatitassiaq, takusalissagaluaratsigit. Danmarkimit tv-kut aallakaatitassiat takusartakkavut amerlavallaaqaat, taanna oqarpoq.

Aningaasaqarnikkut tatineqartoq

Siunnersuutip itigartinneqarnera Demokraatit uggornartikkaat, tusagassiorfiit namminersortut tamanna eqqissiallaatigaat. Nutaarsiassaqartitsivimmi Sermitsiaq.AG-mi pisortaanerup Christian Schultz-Lorentzenip maluginiarpaa, Demokraatit siunnersuummik saqqummiussigamik oqarmkata KNR sponsorinit tapiiffigineqartaleraluarpat tamanna tusagassiorfiit namminersortut aningaasaqarnerannut sunniuteqarnavianngitsoq.

– Maanna pissusiviusut imaapput, annonciliisartut ussassaarutinik assigiinngitsunik pisinissaminnut aningaasanik aalajangersimasunik atugassaqartarlutik. Ingerlatsiviup kattuffiulluunniit aningaasat taakkua KNR-imi, ukiumut 70 millioner koruunit missaannik aningaasalerneqartareersumi, tv-kut aallakaatitassiami sponsoritut atorpagit, taava tusagassiorfinni namminersortuni ussassaaruteqarnissaminut akissaarutissaaq. Taamaattumik siunnersuut akuerineqarsimasuuppat tamanna tusagassiorfinnut namminersortunut, Nutaarsiassaqartitsivik Sermitsiaq.AG piffissami matumani aningaasaqarnikkut tatineqartoq ilanngullugu, annertuumik sunniuteqassagaluarpoq.

Pisortaaneq Christian Schultz-Lorentzen.

Ataatsimut isigalugu ajoraluartumik tusagassiorfiit eqqarsaatigalugit pisortat ingerlataat politikerit allisarusunneruvaat, inuussutissarsiortut namminersortut atasinnaanerminnut tunngavissaat qulakkeerniarnagu, Christian Schultz-Lorentzen oqarpoq.

– Isiginnaartartunulli pitsaasuussanngila assersuutigalugu aallakaatitassianik nunanit allaneersunik KNR-kut isiginnaarsinnaassagunik?

– Ilumut taamaalluinnarpoq. Kissaatiginartipparput KNR-p pitsaassuseq qaffatsinniarlugu periarfissaasa pitsaanerulernissaat. TV-kut aallakaatitassiorneq akisuujuvoq. Politikerilli piumagunik stationeqarfimmut aningaasaliissutitik qaffassinnaavaat. Pissutsit imaattut atorusuppavut, KNR nutaarsiassanik unammillertassallutigu – ussassaarutinut aningaasaniunngitsoq. Tamanna aamma isiginnaartartut naalaartartullu soqutigisarinngilaat, Christian Schultz-Lorentzen akivoq.

– Tusagassiorfiit namminersortut aningaasaqarnerannut coronamik ajornartorsiuteqarneq qanoq sunniuteqarsimava?

– Erloqinartorujussuarmik sunniuteqarsimavoq. Nutaarsiassaqartitsivik Sermitsiaq.AG siornamut sanilliullugu manna tikillugu kaaviiaartitamigut koruunininik millioninik arlalinnik annaasaqarsimavoq. Tamanna nutaarsiassaqartitsiviup isertitaanut ingerlaannaq toqqaannartumillu malugineqarsinnaavoq.

Namminersortutut ingerlatsisutut akit allanngorarnerannit ajornartorsiutinillu taamaattunit sunnertiasuararsuuvugut. Tamaviaarlutali sorsuppugut, allallu tamaasa assigalugit neriuutigaarput akiuussutissaq qanittukkut takkukkumaartoq, pissutsit pitsaanerulissammata isumalluarnerlu atugaaqqilerluni.

Pingaaruteqarpoq nukittuunik tusagassiorfeqarnissarput. Minnerunngitsumik piffissami, nutaarsiassat salloqittaatit tusatsiakkallu inuiaqatigiinnut aserorsaataasut inuit nettimi naapittarfiini takussaaleruttorfianni. Tusagassiorfiilli tatiginartut ingerlannerat aningaasanik akeqarpoq, Christian Schultz-Lorentzen oqarpoq.

Powered by Labrador CMS