Skip to main content

Aaqqissuisuuneq innersuussivoq: Tunngaviusumik Inatsisissaq pillugu isumalioqatigiissitaq suleqqilersoq

Suliaq kinguaattooqqasorujussuuvoq, isumalioqatigiissitarlu sivitsuiffigineqarnissamik qinnuteqarsimavoq.

Tunngaviusumik Inatsisissaq pillugu Isumalioqatigiissitap siulittaasuata Ineqi Kielsenip politikkikkut ilaasortat arfinillit aalajangeeqataasinnaanatillu peqataatitat tallimat sisamanngornermi ulloq naallugu ataatsimiinnissamut aggersarpai, Kalaallit Nunaata namminersortup tunngaviusumik inatsisissaanut missingiummik suliaqarnerup ingerlariaqqinnissaa pilersaarusiorniarlugu.

Ataatsimiinneq aviisip aaqqissuunneqarnerata naammassereernerata kingorna ingerlanneqarpoq, ataaserli aalajangersimalluinnarpoq: Isumalioqatigiissitaq siulittaasup akissarsiaqartinneqarnissaa atorfimmullu atatillugu ineqartinneqarnissaa pillugu uteqqiattumik qassiiliuutaasimasut kiisalu nutaamik aallartittoqaleruttornerata nalaani coronap ajornartorsiortitsinerata inuiaqatigiinnik matusinera pissutigalugit kinguaattooqqasorujussuuvoq.

Aaqqissuisuuneq innersuussivoq: Isumalioqatigiissitaq piffissalersuinermut pilersaarutaaqqaarsimasoq naapertorlugu tunngaviusumik inatsisissamut missingiummik Naalakkersuisunut juunip 21-ani 2021-mi Inuiattut Ullorsiornermi tunniussisussaavoq
 

Ilanngutassiaq manna aviisimit Sermiatsiamit aaneqarpoq, aaqqissuisuunermillu Poul Krarupimit toqqarneqarsimalluniAllaaserisaq una aviisimit Sermitsiamit tigusaavoq, aaqqissuisuunermit Poul Krarupimit toqqarneqarluni.

Taamaalillutit nittartakkami atuartartutut aviisimi allaaserisamik, nalinginnaasumik aningaasanik akeqartartumik atuarsinnaallutit. Neriuppugut allaaserisaq aviisit allaanerunerannik aamma tusagassiutini akeqanngitsuni issuakkatut  nutaarsiassaannaannginnerannik takutitsiumaartoq. Aviisit pitsaassusaat annertooq itisiliinernit aamma tunuliaqutinik aamma minnerunngitsumik inuit pillugit allaaserilluakkanik pissuteqarput.

Neriuppugut misiliummik pisartagaqalernissannut isumassarsiorfigisinnaagit, taamaalillutik inuiaqatigiit ineriartornerannut malinnaalluarsinnaanerussagavit.

Aviisimut neqeroorummik pissarsigit – 38 39 40 sianerfigiuk imaluunniit mail adm@sermitsiaq.gl allaffigalugu

Naalakkersuisut Siumup inassuteqarneratigut 26-nik ukiulik Ineqi Kielsen siulittaasutut nutaatut februaarip 6-ani toqqarpaat, taannalu ukiap tungaanut pingasunik tigussaasunik suliassinneqarpoq: 1) Paasititsiniaanissamik innuttaasut akuutinneqarfigisaannik, 2) tunngaviusumik inatsisissaq pillugu ataatsimeersuartitsinissamik kiisalu 3) Kalaallit Nunaata tunngaviusumik inatsisissaanut missingiummik oqaaseqaatitalersorneqartumik siullermik.

– Isumalioqatigiissitami ataatsimiinnissamut aggersaasimagaluarpunga, kisianni coronap ajornartorsiortitsinerata kinguneranik angalanerit tamarmik unitsinneqarput allattoqarfimmilu sulisut angerlarsimaffimminnni sulisussanngortinneqarlutik, Ineqi Kielsen Sermitsiamut oqarpoq.

Isumalioqatigiissitaq piffissalersuinermut pilersaarutaaqqaarsimasoq naapertorlugu tunngaviusumik inatsisissamut missingiummik Naalakkersuisunut juunip 21-ani 2021-mi Inuiattut Ullorsiornermi tunniussisussaavoq.

Tamanna pissaaq qaammatit 13-it qaangiuppata.

– Sulinitta 2021-p naanerata tungaanut sivitsornissaanik qinnuteqarsimavugut. Naalakkersuisut akuersipput, kisianni Inatsisartuni Tunngaviusumik Inatsisissaq pillugu Ataatsimititaliap akissuteqarnissaa utaqqivarput. Neriuppunga qinnuteqaaterput akuerineqassasoq, suliassami isumalioqatigiissitap tunngaviusumik inatsisissaata allanneqarnissaa pineqarnani innuttaasut tamarmiusut tunngaviusumik inatsisissaata allanneqarnissa pineqarmat, Ineqi Kielsen oqarpoq.

Ukiaru angalalissasut

Piffissalersuinermut pilersaarutaaqqaarsimasoq naapertorlugu isumalioqatigiissitap sulinerani 2020 qaffasinnerpaaffiusussaagaluarpoq, tamanut ammasumik tusarniaanerit sinerissamilu innuttaasunik ataatsimiititsinerit aqqutigalugit tunngaviusumik inatsisissaq pillugu oqallinnermi innuttaasut akuutinneqarfigisaat.

Tamanna pisimanngilaq.

– Innuttaasut Tunngaviusumik Inatsisissaq pillugu Isumalioqatigiissitamik naapeqateqarnissartik qaqugu naatsorsuutigisinnaavaat?

– Angalanitta ukiarumiit aallartissinnaanissaa neriuutigaarput, Ineqi Kielsen oqarpoq.

Ineqi Kielsen siulittaasuuffimmi nutaajusoq tunngaviusumik inatsisissaq pillugu isumalioqatigiissitap allattoqarfia politikkikkut aaqqiagiinngissuteqartoqaraluartoq ukiuni pingasuni sulisimavoq.

– Allattoqarfiup sulineranik isorinnittoqarpa?

– Aap, aamma uanga siulittaasunngunngikkallarama. Pikkorissunik sulisoqarpugut, kisianni sulinitsinnut qaffasissunik aamma piumasaqaateqarpunga. Siulittaasutut suliassara tassaavoq suliassat allassimaffianni oqaasertaliussanik malinninnissaq, aningaasanullu inatsimmi ukiut tamaasa aningaasanik millionilikkuutaanik immikkoortitsisoqarsimavoq. Suliassaq aningaasaqarnerluunniit isumalioqatigiissitap sulineranut unikaallatsitsisuunngillat. Aallartissimavugut, kisianni tamatuma sukkanerusumik ingerlanissaa kissaatigisinnaagaluarpara, Ineqi Kielsen oqarpoq.

Tunngaviusumik inatsissamik suliaqartut

Tunngaviusumik Inatsisissaq pillugu Isumalioqatigiissitaq arfineq-marlunnik ilaasortaqarpoq, partiinit arfineq-marlunnit qinigaaffimmi matumani Inatsisartuni qinigaatitaqartunit toqqarneqartunik.

Ineqi Kielsen, Siumut, siulittaasuuvoq, Kuupik V. Kleistilu, Inuit Ataqatigiit, siulittaasumut tullersortaalluni, taakkualu Nivi Olsen, Demokraatit, peqatigalugu, tassallutik siulittaasoqarfik. 

Ilaasortat sinneri tassaapput Aleqa Hammond, Nunatta Qitornai, Per Rosing-Petersen, Partii Naleraq, aamma Panínguaq M. Kruse, Atassut.

Suleqatigiissitsisut ilaasortaatitartik, Anita Hoffer, isumalioqatigiissitamit novembarimi tunuartippaat isumalioqatigiissitamut ilaasortat, Inatsisartunut aamma ilaasortaasut, aningaasarsiaqartinneqarnissaannik qassiiliuutiginnittoqareersorlu.

– Neriuppunga Suleqatigiissitsisut isumalioqatigiissitamut uteqqissasut, ataatsimut tunngaviusumik inatsisissarput pillugu siamasinnerpaamik suleqatigiinneq pilersinneqarsinnaaqqullugu, Ineqi Kielsen Sermitsiamut oqarpoq.

Isumalioqatigiissitamut peqataasut aalajangeeqataasinnaanngitsut tallimat toqqarneqarsimapput: Nunatta Katersugaasiviata Allagaateqarfiatalu pisortaa Daniel Thorleifsen, Ilisimatusarfimmi adjunkti Rosannguaq Rossen, Bruxellesimi sinniisoqarfiup pisortaa Mininnguaq Kleist, Københavnimi sinniiisoqarfiup pisortaa Lida Skifte Lennert og Islandimilu tunngaviusumik inatsisit pillugit immikkut ilisimasalik Skúli Magnússon.

Tunngaviusumik inatsisissaq akimmisaarutitalik

Inatsisartut tunngaviusumik inatsisissaq pillugu isumalioqatigiissitamik pilersitsereerlutik inuiaassutsimut erinarsuut atorlugu erinarsulerneranniit piffissaq sivisoorujussuarmik ingerlareersimasutut misigisimanarpoq.

Kisianni tamanna ataasinngornermi novembarip 21-ani 2016-imi tassa pivoq. 

Suleriaqqinnissarli ukiunik pingasunik sivisussuseqartussatut pilersaarutigineqartoq politikkikkut aaqqiagiinnginnernik ukiumullu aningaasarsiaqartitaanissamik atorfimmullu atatillugu ineqartitaanissamik piumasaqaatinit akerleriissutaasunit akimmisaartinneqarpoq.

Siulittaasoq siulleq Vivian Motzfeldt tullialuunniit Doris J. Jensen, Siumumeersut, anngutinngitsoorput.

Taamaanneranilu piffissaq ingerlavoq.

Ineqi Kielsen, Siumut, Tunngaviusumik Inatsisissaq pillugu Isumalioqatigiissitap oqaluttuarisaanerani sivikitsumi siulittaasut pingajussaraat, taannalu siuliminut sanilliuilluni ulluni ataatsimiiffiusuni Inatsisartunut ilaasortaanngitsut, kisianni Namminersorlutik Oqartussat sinnerlugit ataatsimiitaliani, aalajangiisartuni sinniisuuffinnilu suliassiissutinik isumaginnittut aningaasarsiaqartitaasarnerannik inatsit naapertorlugu aningaasarsiaqatitaanissamik naammagisimaarinnilluarpoq.

– Atorfik ataqqinartoq ataqqinaataasorlu pineqarpoq. Naalakkersuisunit isumalioqatigiissitami sulinermut Kalaallit Nunaata siunissaanut tunngaviusumik pingaaruteqalersussamut siulittaasuuffimmik tatiginnillutik uannut tunniussisimanerat tulluusimaarutigaara, Ineqi Kielsen Sermitsiamut oqarpoq.

Kajumissuseqarneq suliaqarnermut tunngaviuvoq.

– Unnuit sapaatip-akunnerisalu naanerisa amerlanerpaartaat paasissutissanut tunngasut iserfiginiarnissaannut atortarpakka. Atuagassarpassuaqarpoq, kisianni inuuvunga alapernaatsoq. Tamanna iluatinnaatilerujussuuvoq, soqutiginaatilerujussuaq pineqarmat, Ineqi Kielsen oqarpoq.

Allattoqarfiup pisortaa nutaaq

Ineqi Kielsenip isumalioqatigiissitap siulittaasuatut suliassaasa siulliit ilaat tassaavoq Johan Lund Olsen taarserlugu allattoqarfiup pisortassanik nutaamik nassaarniarnissaq. Johan Lund Olsen juulimi 2017-imi Isumaginninnermut Naalakkersuisoqarfimmi nakkutilliisut pisortaattut atorfimmit Tunngaviusumik Inatsisissaq pillugu Isumalioqatigiissitamut pivoq. 

Johan lund Olsenip ukiuni pingasuni sulinngiffeqarnera naasussaavoq, naalakkersuisoqarfimmullu uteqqinnissani toqqarsimallugu.

Atorfiup inuttarsiuunneqarneranut allagarsiussami inatsisilerinikkut oqaatsitigullu piginnaasaqarluartuunissaq pingaartilluinnarneqarpoq. Tunngaviusumik inatsit tunngavimmigut ullormik atorunnaarfissaqartanngilaq, taamaammallu oqaatsit sivisoorujussuarmik atasinnaassuseqartut atorlugit allanneqarsimasussaalluni.

Tunngaviusumik inatsissamik suliaqarneq politikkikkut mianernartorujussuuvoq. Immikkut piumasaqaatitut atorfiup inuttassarsiuunneqarneranut allagarsiussami aamma allassimavoq, atorfik politikkimut eqeersimaarluni maannakkut suliaqarnermut qanittukkulluunniit suliaqarsimanermut ataatsimoortinneqarsinnaanngitsoq.

Qinnuteqarnissamut killigititaq tassaavoq maajip ulluisa 21-at – sapaatip-akunnerani tullermi Qilaliarfik.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER