Skip to main content

Aaqqissuisuuneq innersuussivoq: Transparency Greenland: Mittarfiliorneq tatiginninnginnermik tunngaviliivoq

Mittarfiliortiternissamik aalajangiinerup, innuttaasunik tamanik attuisup, ingerlarnga Transparency Greenlandip ernumanartippaa.

– Suliniut taama angitigisoq, nunami tamarmi kikkut tamarmik akiligassaat, akulerutsitsinerusariaqaraluarpoq, ammanerulluni paasinarnerullunilu, taamatut oqarpoq qanittukkut Transparency Greenlandimi siulittaasutut qinigaaqqeqqammersoq Anita Hoffer, taannalu ullluinnarmi Inissiaatileqatigiiffik INI-mi sulivoq.

Transparency mittarfiliortiternissamik aalajangiinerup ingerlarnga tamaat iternga tikillugu misissussallugu periarfissaqanngilaq, siulittaasulli paasisinnaalluarpaa suliniutip ingerlanneqarnerata tamarmi sukumiinerusumik misissorneqarnissaanik nalinginnaasumik ujartuisoqarpat, tassami sorpassuaqarpoq qulaajarneqartariaqartunik, Transparency naliliivoq.

Sermitsiap tamanna pillugu Transparency saaffigisimavaa, pissutigalugu innuttaasut arlallit suliniut ernumanartoqartillugulu tupigimmassuk.

– Avaataanit isigalugu isumaqanngilagut suliniummi akulerutsitsisoqarsimasoq. Suliniut annertoorujussuuvoq innuttaasunit tamanit akilerneqartussaq, innuttaasunullu tamanut annertuumik sunniuteqartussaq, taamaattumik pingaaruteqarpoq kikkut tamarmik akulerutsinneqarnissaat. Naammanngilaq sumiiffinni mittarfiliorfissani innuttaasut kisimik tusaaniarneqarnissaat, Anita Hoffer oqarpoq.

Suliniutip aalajangiiffigineqarnissaanut mittarfiillu sumiinnissaannut atatillugu illoqarfiup ilaanut pilersaarutit taamaallaat kommunini sanaffigineqartussani tusarniaasoqarsimavoq.

Ammanerunissamik tunngavik

– Pisortat suliniutaat taama annertutigimmat taamalu pingaaruteqartigaluni, qularnanngilaq ammasuunissaq takunnissinnaanissarlu pisariaqartut, Transparency Greenlandip siulittaasua naqissusiivoq.

– Ammanerusoqannginnera tupigusuutigaarput, utoqqatsissutigalugulu aktieselskabiugamik tamanut ammasuunissamik malittarisassanut pisussaaffeqaratik – assersuutigalugu takunnissinnaanermut malittarisassanut.

– Tamannali politikkikkut aalajangigaavoq. Politikerimmi imaluunniit Kalaallit Airportsimik piginnittut aalajangersinnaapput suna tamaat atorlugu ammasuullutillu akulerutsitsissallutik, aammalu innuttaasunit, tusagassiorfinnit politikerinillu allanit apeqqutit akissuteqarfigalugit. Suna isertuussassaagami? – Taamatut aperisoqarsinnaavoq.

Anita Hofferip paasissutissiissutigaa assersuutigalugu A/S Inissiaatileqatigiiffimmut Ini-mut atatillugu aalajangiisoqarsimasoq takunnissinnaasoqassasoq, pisortat ingerlataat allat assigalugit. Tassa imaappoq, politikkikkut aalajangerneqartarpoq aktieselskabimi pigisaminni ammasumik ingerlatsisoqassanersoq.

– Taamaattumik aamma Kalaallit Airports A/S-imi tamatumunnga periarfissaqarpoq, tassa piumappata, Anita Hoffer ilanngullugu oqarpoq.

– Suliniummi taama annertutigisumi, innuttaasunik tamanik inuussutissarsiortunillu aammalu angallannermut politikkimik tamarmik attuisumi, alianarpoq aalajangiisartut takunnissinnaanermik ammasuunermillu annertunerusumik pilersitsinianngimmata taamaasillunilu suliniummi tamarmi innuttaasut akulerutsillugit, misigisimatillugit suliniummut piginneqataallutik. Ammasuunngikkaanni takunnissinnaanermillu pilersitsilluni tamanna toqqissisimannginnermik, tatiginninnginnermik eqqoriaanernillu pilersitsisinnaavoq.

– Taamatut akulerutsitsisoqannginnera politikerinut suliniummullu unammilligassanngorsinnaavoq innuttaasut malinnaasinnaannginnerat pissutigalugu, Anita Hoffer mianersoqqusivoq, taannalu isumaqarpoq politikerit aallaqqaataaniilli aalajangersimassagaluartut suliniut akulerutsitsiffiussasoq. »Ammanerunissamik tunngavik« atorneqarsimasariaqaraluarpoq – tassa malittarisassanit atuuttunit tamanut ammasuunerulluni, Anita Hoffer nassuiaavoq.

– Politikerit KAIR-imut oqarsimasariaqaraluarput suliniut manna taama pingaaruteqartigimmat apeqqutit takkuttut sapinngisamik ammasumik akisassavasi.

– Maanna ulorianartoqarpoq innuttaasut politikerillu akornanni avissaartitsisoqarnissaanut, tamatumalu akigisinnaavaa suliniutip tamavimmi tatigineqarunnaarnera, Transparency Greenlandip siulittaasua naliliivoq.

Suliat avissaartillugit

Ajornartorsiutit ilaat, nettimi inuit naapittarfiini oqaaseqartartut amerlasuut attorsimasaat, tassaavoq suliniutip ingerlanneqarnerani tamarmi Deloittep inissisimasimanera. Deloitte namminersorlutik oqartussanut Kalaallit Airports A/S-imullu kukkunersiuisuuvoq, tamannalu peqatigalugu Deloitte mittarfiliortiternerup inuiaqatigiit aningaasarsiornerannut kinguneqaatissaanik misissuisuusimavoq, politikerit aalajangiinissaannut suliniummullu tamarmut, KAIR-ip ingerlataanut, tunngaviusussamik. Tamanna eqqoriaanerpassuarnik kinguneqarpoq, tassa siunnersuineq kingornalu aalajangiineq tatigisinnaanerivut.

– Suliniut taama annertutigisoq pineqartillugu pingaaruteqartorujussuuvoq unneqqarissumik ingerlatsinissaq, ingerlatarlu ingerlallugu mianersortuunissamik tunngavik malillugu, aammalu iliuusissatut aalajangiussani ammasuullunilu takunnissinnaatitsilluni, Anita Hoffer tikkuaavoq nangillunilu:

– Tassuunakkut ingerlatsivik kukkusumik iliorsimasutut unnerluutinngilarput, ulorianartoqarporli innuttaasut misigisimasut pasinapiluttoqartoq suliniullu tatigiunnaarlugu.

Anita Hoffer: – Suliniut, kikkullu tamarmik akiligaralugu, tamanullu sunniuteqartussaammat, pingaaruteqarpoq kikkut tamarmik akulerutsinneqarnissaat suliniummillu piginneqataasutut misigisimallutik. Aana Nuummi mittarfiup kujammut tallissutissaa, sivinga
Kair

– Siunnersorti, kingorna misissuisuullunilu nakkutilliisuuppat, tamanna qularnermik pilersitsisinnaavoq suliat eqqortumik ingerlanneqarsimanersut. Aamma pineqarpoq suliat killormoortuuppata, misissuisuulluni nakkutilliisuullunilu, kingornalu siunnersuisuulluni. Inissisimaffiit ersarissuussapput nalunaatsuullutillu avissaarsimassallutillu. Tamannami aamma kukkunersiuisut piumasarisarpaat ingerlatsiviup ulluinnarni ingerlanneqarnerani naatsorsuuserineranilu. Kukkunersiuinermik ingerlatsivimmit piumasaqaat tamanna pissusissamisoorluinnarpoq. Pingaaruteqarpoq peqquserlunnerup, qanigisanik salliutitsinerup pissaanermillu atornerluinerup pinngitsoortinnissaat, aammattaarli tamanna pingaaruteqarpoq innuttaasut ingerlatsivimmik isiginninnerannut, minnerunngitsumillu ingerlatsivimmut aalajangiinerullu ingerlanneqarneranut tatiginninnerannut. Suliat akuleriissinneqassanngillat, taamaattoqarpat innuttaasut ingerlatsivik peqquserluttutut tatigineqarsinnaanngitsutulluunniit isigilissavaat. Naggataatigut suliniut innuttaasut tatigiunnaassavaat. Tassa apeqqutaanngilaq sulianik akuleriissitsisoqarsimanersoq, apeqqutaavorli innuttaasut taamatut pisoqarsimasinnaaneranik isiginninnerat.

– Taamaattumik aammaarlugu pineqarpoq takunnissinnaanissaq ammasuunissarlu. Sooq ersarissumik ammasumillu ingerlatsisoqanngila. Taamaasiunngikkaanni pasilliinerit amerliartuinnassapput, Anita Hoffer naliliivoq.

VVM-ip ingerlanneqarnera

Suliap qanoq ingerlanneqarsimaneranut isornartorsiorneqartut pingajuat tassaavoq sanaartorneq sulairinnittussarsiuunneqarmat, VVM-ip ingerlanneqarnera suli naammassinngitsoq. Tamanna isornartorsiorneqangaatsiarsimavoq, oqartoqarluni VVM pisuusaarnerusoq, tusarniaanermilu akissutinik suliarinnittut illaruaatiinnagassaasut.

– Tunngaviatigut taamaasiortoqarsinnaavoq, pissutsit immikkut ittut tamanna pisariaqartissimappassuk. Qularnanngilarlu taamaattoqarsimasoq, tassa politikerinut pingaaruteqarsimammat suliniutip sapinngisamik sukkanerpaamik aallartinneqarnissaa, Transparency Greenlandip siulittaasua oqarpoq.

– Aammaarluguli, suliniut taama pingaaruteqartigisoq annertutigisorlu pineqarmat, amerlasoorpassuarnullu taama sunniuteqartigisoq, suli pingaarnerulerpoq VVM-ip ingerlanneqarnerata malitseqartinneqarnissaa, pisuusaarnerinnartut isigineqaqqunagu, aammalu tusarniaanermik suliarinnissimasut illaruaatigineqartutut misigisimannginniassammata.

– Tamanna aatsaat paasissavarput VVM nalilersoreerutsigu tusarniaanerullu ingerlarnga malitseqartillugu. Taamaattumik tamanna pissanganassaaq, Anita Hoffer oqarpoq.

– Sulialli ingerlarngani tamarmi paasineqarsimanngilaq matumani pineqartoq akulerutsinneqarnissamik ataatsimut pisinnaatitaaffeqarneq, nunami maani pingaarutilik. Ernumanartippara pisinnaatitaaffik tamanna saneqqutaarneqarsimasoq »isiginnittariaaseq« alla, qallunaat »isiginnittariaasiannut« qanittoq, aallaavigalugu pisimasoq. Pingaaruteqarpoq nunami maani innuttaasut pisunut angisuunut piginneqataasutut misigisimanissaat ataqqissagipput, Anita Hoffer tikkuaavoq.

Kalaallit Airports Holdingimi siulersuisunut siulittaasua Jóhannus Egholm Hansen imaluunniit angallannermut naalakkersuisoq Karl Frederik Danielsen mittarfiliortiternissap suliarineqarnera pillugu Transparency Greenland isumaqatiginngilaat. Transparency Greenlandip oqariartuutaanut isornartorsiuinerat Sermitsiami atuarneqarsinnaapput.

Aviisimut Sermitsiamut uani ataani isissutissarsigit:

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER