Aaqqissuisuuneq innersuussivoq: Sooq ilinniartitsisut tammararpat?
Qeqqata Kommuniani ilinniartitsisut 90-it angullugit amerlassusillit ukiuni kingullerni tallimani soraarsimapput, allamik atorfittaarsimallutik imaluunniit soraarninngorsimallutik. Kisiannili sooq ilinniartitsisut taama taarseraatsigaat?
Qeqqata Kommuniani ilinniartitsisut, ilinniartitsisut inaanni taqussaminnik ullo´qeqqasioqatigiikkaangata nutaamik suleqatitaartarsimasarnerat qaqutigoortuunngilaq. Ilinniartitsisut taarseraattorujussuupput, tamannalu ukiuni arlalinni atuussimavoq. Kisiannili sooq TAAMA amerlatigisut taarseraattarpat?
Tamanna kommunalbestyrelsip ilinniartitaanermut ataatsimiititaliaata akissutissarsiorsimavaa, taamaasiorsimappullu atuarfiit Kilaaseeraq, Minngortunnguup Atuarfia aamma Nalunnguarfiup Atuarfia onlinekkut marloriarlutik misissuiffiginerisigut.
Ilinniartitsisut 147-t, atuarfinni taakkunani pingasuni ullumikkut sulisuusut, apeqqutinik akissuteqarnissaannik qinnuigineqarsimapput; taamatuttaaq ilinniartitsisut 90-it, ukiuni kingullerni tallimani nutaanik unammilligassarsiorlutik imaluunniit soraavillutik atuarfinni taakkunani soraarsimasut aperineqarsimapput. Pineqartunit kingullernit ilinniartitsisut 19-iinnaat sumiissusersineqarsimapput. Akerlianik ilinniartitsisut maanna sulisut affaasa missaat misissuinermut peqataarusussimapput.
Qanorlu akissuteqarpat?
Klassinukartarlusi!
Ajornartorsiutit ilaattut tikkuarneqarpoq atuarfiup pisortaa: Ilinniartitsisut ilarpaalui nammineertinneqarpallaartutut misigisimapput, ujartorpaallu ulluinnarni ersarinnerusumik aqutsineq isumasioqatigiittarnissarlu. Aamma klassini, ilinniartitsisut pissutsinik naammaginninngitsut naapertorlugit atuarfiit pisortaasa klassinut takuniaasarnerat akuttuallaaqimmat.
Kommunip atuarfinnut ataatsimiititaliaata inassuteqaataasa ilaat isornartorsiummut tassungarpiaq sammitinneqarpoq:
– Ilinniartitsisut atugarissaassappata atorfimminniiginnarusullutillu taava pingaaruteqarpoq pisortaminnit pisariaqartumik tapersersorneqartarnissaat isumasioqatigineqartarnissaallu, taamaasilluni suliamikkut ineriartorsinnaassagamik. Tamanna pisinnaavoq sammisaqaqatigiit suleqatigiinnerisigut, aammattaarli pisortat atuartitsinermik malinnaanissaminnut peqataanissaminnullu ammanerulernerisigut, taamaasilluni ilinniartitsisut perorsaanermik periutsitik ineriartortissinnaammatigit, misissuinermit allakkiami allassimavoq.
Tamatuma saniatigut tassani erseqqissarneqarpoq pisortat ulluinnarni suleqatiminnik oqaloqatiginnittarnissaminnut pikkorinnerussasut:
– Ersarippoq oqaloqatigiittarneq imaqartartorujussuusoq, tamannalu ilinniartitsisut suliaminnut kajumissuseqarnerannut atugarissaarnissaannullu nukittorsaaqataasarpoq. Ilinniartitsisut atorfimminnit soraartarnerannut toqqaannartumik pissutaasarpoq misigisimaneq ajoramik pisortaminnit tapersersorneqarlutik peqataatinneqartarlutillu. Taamaattumik ilinniartitsisunik taama attassiuminaatsitsitiginerput pineqartillugu pisortat saneqqutaarneqarsinnaanngillat, misissuisut inerniliipput.
Aamma aqqutissaasinnaavoq sulisut amerlanerusunik ajunngitsorsiassaqartinnerat. Naluneqanngitsutut pisortat ingerlatsiviini tamakkua qaqutigoortuupput, tamakkuali ilinniartitsisunit ujartorneqarput.
– Paarnat akeqanngitsut, akeqanngitsumik timigissartarneq peqatigiinnermillu aaqqissuussinerit amerlanerusut ataqatigiinnermik ataatsimooqatigiinnermillu pitsaanerusumik pilersitsisinnaapput, taamaasillunilu ilinniartitsisut atugarissaarnissaat nukittorsarneqassalluni, ilinniartitsisut oqarput.
Ajornartorsiutilli atuarfinni ataasiakkaani iliuuseqarnerinnakkut qaangerneqarsinnaanngillat. Aamma kommuni aningaasanik atugassiisariaqarpoq, pingaartumillu ilinniartitsisut atugarisaasa pitsanngorsarneqarnissaannut aningaasanik amerlanerusunik aningaasaliissuteqarluni, tamanna pisariaqarmat ilinniartitsisunik avataaneersunik pilerinnilersitsinissamut.
Taamaattumik atuarfinnut ataatsimiititaliaq onlinekkut misissuinerup inerneranik qanittukkut paasissutissinneqarami imatut nalunaarfigineqarpoq:
– Atuarfiit illutaasa avatangiisaasalu pitsaanngitsuunerat ilinniartitsisut soraartarnerannut toqqaannartumik pissutaasarpoq, taamaattumillu ilinniartitsisut attanneqaannarusuppata atuarfiit illutaat pitsanngorsarneqartariaqarput. Ilinniartitsisut pilerissuseqalersinniarlugit aaqqissuussinernik immikkut ittunik neqeroorfigineqartariaqarput. Tamatumani eqqarsaatigineqarsinnaapput ukiunut arlalinnut atorfinitsitsinerit, feeriarnermi akiliunneqarluni angalasinnaanerit bonuseqartitsinermillu aaqqissuussinerit. Ilinniartitsisut pitsaasunik inissaqartinneqassapput, ineqarnikkut ajornartorsiutit pissutigalugit ilinniartitsisut nuussinnaasarmata!
Ilinniartitsisut qimarrannerat unitsinniarlugu Qeqqata Kommuniani politikerit inassuteqaatit ilaat ersarissumik malinnialerpaat. Suliniutinik arlalinnik aallartitsisoqarsimavoq, sulisullu attatiinnarniarlugit suliniutinik assigiinngitsunik pilersaarusiortoqarpoq.
Coaching atortussat ilagaat: 2018-imi atuarfimmi pisortanik pisortaaqqanillu ineriartortitsineq aallartinneqarpoq. Aamma Maniitsumi Kangaamiunilu atuarfiit nutarterneqarnissaannut aningaasanik immikkoortitsisoqarpoq, 2019-imullu missingersuummi Maniitsumi sulisunut nutaanik inissialiornissaq ilanngunneqarsimavoq.
Kiisalu pilersaarutaavoq atugarissaarnermik misissuisimaneq malitseqartinneqassasoq. Tamatuminnga nutaamik misissuineq aasartinnagu ingerlanneqassaaq.
Qeqqata Kommunia ilinniartitsisussaaleqinerujussuarmik eqqorneqartuni kisiartaanngilluinnarpoq. Saqqummiunneqarnikuuvoq Tunumi ilinniartitsisunik atorfinitsitsiniartarnerup ajornakusoornera pissutigalugu ilinniartitsisut pingajorarterutaat ilinniarsimanngitsuusut.
Sapaatip-akunnerani AG saqqummertoq atuaruk – uani ataani linki atorlugu isissutissarsigit: