Aaqqissuisuuneq innersuussivoq: Siumumi siulittaasortaarneq Inatsisartunut qinersinermik malitseqartariaqarpoq
Nunatta aqunneqarnerata siulersorneqarnera inuiaqatigiinnut tamatsinnut attuumassuteqarpoq – Siumup ataatsimeersuarnerani aallartinanut 71-siinnaanngitsunut. Taamaattumik piaartumik Inatsisartunut qinersisoqartariaqarpoq. Inuttaasut ilisimaannassanngilaat kikkut nunarput aqunneraat – innuttaasulli aalajangiiffigisariaqarpaat. Asii Chemnitz Narup taama isummersorluni allappoq.
Siulliullugu Erik Jensen Siumumi siulittaasunngorneranut pilluaqquniarpara. Suliassat pissanganartut, annertoqisut unammillernartullu utaqqipput. Tulliullugulu Kim Kielsen qutsavigissavara demokrati sullillugu sulisimaneranut.
Siumulli iluani pisut qaavini unammilligassat aamma apeqqutit suli akineqanngitsut arlaqarput. Akissutissarsineqarsinnaappullu Inatsisartunut piaartumik qinersisitsisoqarneratigut. Apeqqutit unammilligassallu isuaniit aallarteriartigit:
- Erik Jensen Siumumi siulittaasuuppat, Naalakkersuisunili siulittaasuunani, taava kina nunatsinni aqutsisuijusimassava? Assersuutigalugu kommunit kina oqaloqatigisassavaat? Erik Jenseni imaluunniit Kim Kielsen? Nunatsinni innuttaasut isummerfigisimanerlugu ilisimanerluguluunniit Erik Jensenip politikkikkut nunatsinnut angorusutai? Kingullermik qinersisoqarmat erseqqippoq Kim Kielsen siuttuusoq, amerlanerussuteqarunilu Naalakkersuisunut siulittaasunngussasoq. Kisianni imaassinnaanngilaq, Siumup ataatsimeersuarneranut aallartitat affaasa missaat tapersersoraat, Erik Jensenip nunatsinnut suniarnera, aalajangerlugulu ukiuni tullerni arlalinni nunatsinnut aquttuunissaa – imaluunniit qanoq isumaqarpisi?.
- Uagulli ilisimalluarparput Erik Jensen aamma Kim Kielsen annertuunik isumaqatigiinngissuteqartarsimasut – ima annertutigisunik allaat Erik Jensen Naalakkersuisuniit tunuarluni, kingornatigullu Kim Kielsen siulittaasussatut unammillerlugu. Naalakkersuisut siunnerfissaat suussapppat, isumaqatigiinngissutit taama ilisimaarineqartigitillugit? Una tunngaviliuttariaqarparput, apeqqutini pingaarutilinni arlalinni Erik Jensen Kim Kielseniminngaanniit allatut isumaqartoq. Tamatuma ilisimanissaa uagut innuttaasutut piumasaqaatigisariaqarparput – qinersinikkullu isummerfigalugu.
Siulittaasussatut qineqqusaartut pingajuat, Vivian Motzfeldt, Siumumi pisaaneqarniunnermi ajorsarpoq – maannali partiimi politikkikkut siulittaasumut tulliulerluni. Inatsisartunut ilaasortaavoq, Inatsisartunullu siulittaasuulluni. Siumup iluani tamanna qanoq sunniuteqassanersoq pingaaruteqaannarani – pingaarnerusoq unaavoq: Siumumi pissaaneqarniuttut pingasuusut tamarmillu siulittaasoorusuttut inissinnerat politikkikkut ingerlatsinikkullu qanoq kinguneqassava? Isumaqarpunga Nunatsinni innuttaasut tamarmik piumasarisariaqaraat politikkikkut isummat siunertallu sorliit anguneqarniarnersut ilisimassallugit, ilisimasariaqarpaallu kina oqartussaanerpaanersoq. Tamanna Siumup kisimi ilumini susassariinnagarilinngilaa. Weekendimi Siumup ataatsimeersuarnerata kingornatigut Nunatta tamarmi susassarilerpaa.
Siumup aamma aalajangerpaa qinikkap ataatsikkut arlariinnik qinigaaffeqarsinnaanngoqqittoq. Marlunnik ataatsikkut qinigaaffeqartoqarsinnaasoq ingerlatsisarnermut uanga iternga tikillugu akerliusuuvunga. Pissaanermik taama eqiterisarneq ileqquuvoq pitsaanngitsoq, politikkimillu ingerlatsisimaninni misilittagaqarfigeqaara – peqqissaartumik ingerlatissagaanni – assorujussuaq piumasaqaatitaqarpoq, aamma piffissaq eqqarsaatigalugu. Atuuffiit pingaarutillit marluk ataatsikkut ingerlanneqarsinnaanngillat, tamaasalu ajunngitsumik ingerlallugit. Isumaqarpunga uagut innuttaasutut periarfissinneqartariaqartugut nalilersussallugu Siumumit marlunnik qinigaaffinnik ingerlatsisinnaaneq kissaatigineripput.
Naalakkersuisunut siulittaasuunermini Kim Kielsen naalakkersuisunut ilaasortanik taarseraatsitsiuarsimavoq. Maannalu partiip naalakkersuisuutitaqartup qullersai tamarmik taarserneqarput. Innuttaasunik Inatsisartunut qinersitsinikkut naapitsinissamut piffissanngorpoq. Pinngitsoorata qinersisariaqarpugut, politik siunnerfiillu erseqqissumik qinersisartunut saqqummiullugit.
Qinersinissamut piffissaq aamma pingaaruteqarpoq. Kommuninut qinersingajalerpugut. Kommunit, suliassanik annertuunik pikkunakullattunik suliassaqartut, pisariaqartippaat kommuninut qineqqusaarneq kommunini politikkimut sammisoq – nunatsinnut tamarmut politikkimik ipisinneqassanngitsoq. Taamaattumik Inatsisartunut piaartumik qinersisariaqarpugut – upernaarussamut utaqqinata, taamaattoqassappat kommuninut qineqqusaarneq akornusersorluinnarneqassammat.
Aamma Inatsisartut aalajangernerat ukiuunerani februarimi ataatsimiittoqassasoq unitsiinnarneqartariaqanngilaq, qinersisoqartussanngornera peqqutigalugu. Akerlianilli februarimi Inatsisartut ataatsimiinnissaannut Inatsisartortaassat inissereersimasariaqarput. Taamaanngippat piffissaq asiuteqqinneqaannaqqissaaq, nunatsinni politikkikkut susoqarfiunngitsumik.
Arlaannatsinnulluunniit iluaqutaanavianngilaq taaguutaannarnik naalakkersuisoqarutta, asuli allaffissuinnartunik, nunatta politikkikkut qanoq siulersorneqarnissaanik innuttaasunut oqariartornissaminnut Siumup piffissaasorilernissaata tungaanut. Naalakkersuisuugallartutut inissisimasut pisariaqartinngilavut – inuttaasunulli nunamullu iluaqutissanik sulerusuttut pisariaqartippavut.
Siumup iluani isumaqatigiinngissutit amerlaqaat nunatsinnut tamarmut qilusoortitsillutik uninngasitsisut – maannali demokrati atorlugu partiip iluani siulersuisussanik nutaanik toqqaasoqarpoq. Maanna qinerisartut aperineqartariaqalerput, uagut innuttaasutut isummerfiginiassagatsigu Siumup siulittaasortaaqqammersup nunarput tamaat siuttuuffigissaneraa – imaluunniit nukiit allat nutaat Nunatsinni siuttunngortinneqassanersut.