Aaqqissuisuuneq innersuussivoq: Sermitsiaq mittarfiliortiterneq pillugu allaaserisaminut isornartorsiorneqanngilaq
Aviisimi allaaserisat marluk novembarimi saqqummiunneqartut, immikkut ilisimasallip mittarfiliortiternissamik suliniutit pillugit oqaaseqarfigisai, pillugit Kalaallit Airportsimit Naalakkersuisunillu naammagittaalliuutit Tusagassiuinermi Aalajangiisartunit itigartinneqarput. Sermitsiaq tusagassiuinermi ileqqorissaarnissamik sumiginnaasimanngitsoq, aalajangiisartut allapput.
Novembarimi 2022-mi maani aviisimi tyskip ingeniørip aamma mittarfiliornernut immikkut ilisimasallip Kalaallit Airportsimilu suliniutinut pisortaasimasup, Johannes Ehmannip, apeqqarissaarfigineqarnera mittarfiliortiternermillu sakkortuumik isornartorsiuinera ilanngutassiaraarput. Aviisi allaaserisanik marlunnik imaqarpoq ima qulequtalinnik: »Nunat tamalaat akornanni mittarfinnik immikkut ilisimasalik: Nuummi, Ilulissani Qaqortumilu mittarfiit nutaat 6,5 milliarder koruuninik akeqalissapput« aamma »KAIR-imi suliniutinut pisortaasimasoq: Mittarfiit atoruminartussiaanatik akimaniutaanerupput«.
Allaaserisat taakkua marluk ilanngunneqarput aaqqissuisoqarfimmit oqaaseqaammik ilallugit, tassanilu sooq allaaserisat ilanngunnerivut, aamma KAIR-imut Naalakkersuisunullu, saqqummiunneqartunut isumaqataanngitsunut, kisiannili aamma akissuteqanngitsunut, saqqummiunneqarsimanerat, oqaluttuaraarput.
Tusagassiuineq illuinnaasiortoq
Allaaserisat taakkua marluk tunngavigalugit Naalakkersuisut aamma Kalaallit Airports (KAIR) tusagassiuinermi aalajangiisartunut naammagittaalliuuteqarput, isumaqaramik, tusagassiuinermi ileqqorissaarneq sumiginnarneqarsimasoq. Ilaatigut isumaqarput, allaaserisat suliarineqarsimasut »eqqunngitsumik paasissutissiineq, ilimagisat, eqqoriaanerit inuttullu ataasiakkaatut maluginiakkat tunngavigalugit aamma suliamik illuinnaasiortumik, eqqunngitsumik isummiuteriikkanillu malunnaateqartumik suliamik sammisaqarnermik tunngaveqartumik.« Tamatuma saniatigut allaaserisanik tamakkiisunik oqaaseqarfigisassatut saqqummiussivigineqarsimanngillat saqqummiussivigineqaramillu, »apeqqutiliortoqarsimanngilaq isummerfigisassatsinnik. Qinnuigineqaannarpugut allaaserisat tamakkiisumik oqaaseqarfigeqqullugit«. KAIR aamma Naalakkersuisut naapertorlugit tusagassiortoq »Namminersorlutik Oqartussanut KAIR-imullu taamaallaat apeqqusiivoq pingaarnertullu tusarfigisaminut Johannes Ehmannimut apeqqusiinani«.
Tusagassiuinermi Aalajangiisartut naliliinerminni allapput, Sermitsiaq Johannes Ehmannip Kalaallit Airportsimi siornatigut atorfeqarsimaneranik erseqqissaassutiginnissimasoq, aamma isumaqarput, allaaserisat taassuma mittarfiliortiternermik suliniutinut inuttut soqutigisaqarneranik allaaserisat naammattumik paasissutissiisimasut. Tusagassiuinermi Aalajangiisartut nangillutik allapput oqaaseqaatit Johannes Ehmannimeersut sulianit assingusunik misilittagai tunngavigalugit taassuma nammineq isumaatut ilimagisaatullu ersersinneqartut.
»Suliami paasissutissiissutigineqartutut, Tusagassiuinermi Aalajangiisartut tunngavigaat, Kalaallit Airportsip aamma Naalakkersuisut paasissutissanik, mittarfiliortiternermi suliniutinut aningaasartuutinik tamarmiusunik saqqummiussiviusinnaasunik imaluunniit paasissutissanik allani, mittarfiliortiternermi suliniutit pillugit paasissutissanik eqqornerusunik qularnanngitsumik tunniussiviusinnaasimagaluartunik, nassiussisimannginnerat Sermitsiamit Johannes Ehmannsip oqaaseqaataanik saqqummiussivigineqaramik. Tamanna tunngavigalugu aalajangiisartut isummerput, Sermitsiaq tusarfinnik toqqaanera imaluunniit Johannes Ehmannip oqaaseqaataanik saqqummiussinera isornartorsiussallugu tunngavissaqanngitsoq«.
Tusagassiuinermi Aalajangiisartut naapertorlugit ilumoorpoq, allaaserisani oqaaseqaatit arlallit Kalaallit Airportsimut ajuallannartuummat ataqqineqarnermilluunniit ajorseriartitsisinnaammata, kisianni allaaserisat aviisimi ilanngutassiarineqannginnerminni piffissaalluarallartillugu Naalakkersuisunut Kalaallit Airportsimullu saqqummiunneqarsimammata, Naalakkersuisut Kalaallit Airportsilu allaaserisat imarisaasa oqaaseqarfiginissaannut pisariaqartumik periarfissaqarsimapput.
Tusagassiuinermi Aalajangiisartut aamma maluginiarpaat, tusagassiuutit apeqqutinik tigussaasunik apeqqutiliornissamut pisussaaffeqanngitsut oqaaseqaatinik isorinnittunik saqqummiussinermut atatillugu akineqartussanik. Tusagassiuinermi Aalajangiisartut aamma inerniliipput, Sermitsiaq aaqqissuisoqarfimmit oqaaseqaatimini, allaaserisat pineqartut saqqummiunneqarnerinut atatillugu ilanngunneqartuni, Naalakkersuisut Kalaallit Airportsillu Johannes Ehmannip oqaaseqaataanik ilumuunnginneraanerannik ingerlatitseqqiisimasoq.
Tusagassiuinermi Aalajangiisartut naggataatigut inerniliipput, Sermitsiaq allaaserisanik taakkuninnga marlunnik ilanngutassiarinninnermigut tusagassiuinermi ileqqorissaarnissamik sumiginnaasimanngtisoq. Taamatuttaaq Sermitsiap saqqummiussisimaneranik isornartorsiuinissamut Tusagassiuinermi Aalajangiisartut tunngavissaqarsorinngillat
