Aaqqissuisuuneq innersuussivoq: Sermersuumi periuserineqartoq sunniuteqartorujussuusoq
Inatsisileritooq Kalaallit Nunaanni kommuninik Nakkutilliisoqarfimmik atuakkami nutaami isornartorsiuivoq.
Nuummi Sulinermik Inuussutissarsiuteqartut Peqatigiiffiata NSIP-ip Nuummi inissiat pitsaasut peqqinnartullu, SIK-p isumaqatigiissutaa malillugu akissarsiaqartunit akilerneqarsinnaasumik ineqarnermut akiliutitallit, pillugit isumasioqatigiissitsinerani peqataasut allatut eqqarsarnissamik ilisimatinneqarput.
Arfininngornermi siunnersuutinik nassaarsiorpalaartunik saqqummiussuisoqarpoq, immikkoortunik marlunnik inissianik ineqarnermullu akiliutinik naapeqatigiissitsisussanik. Ataaserli ernummatigineqartuarpoq: Sermersuumi periuserineqartoq assigalugu Kalaallit Nunaanni kommuninik Nakkutilliisoqarfimmut suliassanngunnginnissarput mianersuutigisiuk.
Kommuneqarfik Sermersooq Nuummi inissianik attartortitsisartunut namminersortunut inissiarpassuarnik ineqarnermut akiliutitalinnik qaffasissunik attartornissamik 2010-kkunni isumaqatigiissusiorpoq, tamatumalu kingorna inissiat illoqarfimmi innuttaasunut ineqarnermut akiliutinik akikinnerusunik akiligassartalerlugit attartorteqqinneqarlutik. Periaatsimit tamatumannga ilaqutariit 416-it inissaqartinneqalerput, kisianni kommuni ineqarnermut akiliutit taakkua marluk assigiinngissutaannik nalimmassaanermigut aningaasaqarnikkut imminut annaasaqartussanngortilluni.
– Taamaattoqarsinnaanngilarlu, Kalaallit Nunaanni kommuninut Nakkutilliisoqarfimmit oqaatigineqarpoq, tassanngalu kommunimi suleriaaserineqartoq kommuninut piginnaatitsinermut malittarisassat innersuussutigalugit novembarimi 2020-mi atorunnaarsinneqarluni. (Kommuninut piginnaatitsissut inatsisaananilu nalunaarutaanngilaq, kisiannili kommunit ingerlatsinerannut malittarisassaalluni allassimanngitsoq).
Naalakkersuisut nakkutigissavaat kommunalbestyrelsit ingerlatsinerminni inatsimmi matumani malittarisassat malinneraat, § 47, stk. 1
Kommunit aqunneqarnerat pillugu Inatsisartut inatsisaat nr. 29, 17. november 2017-imeersoq.
Kommunimit Nakkutilliisoqarfik Inatsisartut Ombudsmandiannut naammagittaalliuutitigineqarsimavoq, kommunimillu aalajangiineq eqqartuussivinnut suliassanngortinneqarsinnaavoq.
Taakkua arlaannaannilluunniit pisoqanngilaq.
Kommuneqarfik Sermersooq piffissamik najummassimanartorsiorfiusumik aqqusaagaqarpoq, tamatumanilu borgmesteri kommunaldirektørilu allanik taarserneqarlutik. Aqutsisunit nutaanit borgmesterimit Avaaraq S. Olsenimit aamma kommunaldirektørimit Ole Jakobsenimit pereersut alarallarneqarlutik nutaamik aallartitsisoqarpoq, ullumikkullu ilaqutariinnut 416-inut, Sermersuumi periuserineqartoq tunngavigalugu initaarsimasunut, siunissaq aninissamik pilersaarut aqqutigalugu qulaajaavigineqarluni. Ullumikkulli ilisimalereersimavarput Nakkutilliisoqarfik taama aalajangiisimagaluartoq attartortut arlaannaalluunniit anisitaanavianngitsoq.
Kommuni naleqqussaavoq, taamaattumik Sermersuumi periuserineqartoq inatsisinnik unioqqutitsinnginnerunersoq unioqqutitsinerunersorluunniit suli nalunarpoq.
Taamaattumik inissianik niuerfimmi tatisimaneqartumi ineqarnermullu akiliutinik akisuunik akiliuteqartitsiviusartumi innuttaasunik inissaqartitsiniarnermini kommuni qanoq annertutigisumi iliuuseqarsinnaanersoq aamma suli nalunarpoq.
Inatsisileritooq: Inatsisinut naapertuukkunanngilaq
Inatsisileritooq Morten Engberg Københavnimi Folketingets Ombudsmandimi immikkoortortaqarfimmi pisortaavoq, Ilisimatusarfimmilu kommunini inatsisitigut ingerlatsinermut tunngasuni ilinniartitsisarsimalluni.
Taassuma atuagaq ilinniut »Kommunestyret i Grønland« (Kalaallit Nunaanni kommunit aqutsinerat), Djøf Forlagimit saqqummersinneqartoq, saqqummerseqqammerpaa.
Morten Engbergip atuakkami Sermersuumi periuserineqartoq inatsisinut naapertuunnersoq isummerfiginngilaa, kisiannili Nakkutilliisoqarfik suliamik ingerlatsinera pillugu ilaatigut sakkortuumik isornartorsiortarlugu.
Aalajangiinerup suleriaaserineqartullu assigiinngissutaat tamatumani pineqarpoq.
Nakkutilliisoqarfimmit kommunit aqunneqarnerat pillugu inatsit 2017-imeersoq naapertoerlugu kommunalbestyrelsimit, aningaasaqarnermut ataatsimititaliamit imaluunniit ataatsimiititaliamit aalajangiunneqartoq atorunnaarsinneqarsinnaavoq, kisianni inatsimmit Nakkutilliisoqarfik suleriaatsimik, kommunimit suliassani amerlasuuni malinneqarsimasumik, atorunnaarsitsinissamut periarfissinneqanngilaq.
Sermersuumilu periuserineqartoq 2015-imiilli attartukkat 416-it isumaqatigiissutiginissaannut atorneqarsimavoq.
– Nakkutilliisoqarfiup kommunimi attartornissamik isumaqatigiissutinik atorunnaarsitsinissamik aalajangiinera inatsisinut naapertuukkunanngilaq, Morten Engberg inerniliivoq.
Ingerlatsineq kusananngitsoq
Morten Engbergip Sermersuumi periuserineqartoq pillugu suliamik misissuataarineranit illua’tungeriinnit marlunnit ingerlatsineq kusananngitsoq kukkuluttornernik imaqartoq qulaarneqarpoq.
Kommuneqarfik Sermersuup aallaqqaammut Nakkutilliisoqarfimmit suliamik allagaatinik piumasaqarneq tusaanngitsuusaarneqarpoq. Nakkutilliisoqarfik akissuteqarluni kommunip allaffianut takkulluni nakkutilliiartorpoq, maannali kommunimit periaaserineqalersoq tassaalerluni Nakkutilliisoqarfiup pappialarpassuarnik tuniorarlugu ipitinnissaa – amerlanertigut pappialanik, suliamut attuumassuteqanngitsunik. Nakkutilliisoqarfiup kommunip allaffia allagaatinik 70.000-inik nassataqarluni qimappaa.
Tamanna apeqqutinik marlunnik pilersitsivoq:
- Naalakkersuisut paasissutissanik allagaatinillu tamanik tunniussisoqarnissaanik piumasaqarsinnaavoq.
- Inatsisartut Ombudsmandiata, nakkutilliiartorluni ornigussinnaasup, akerlianik Naalakkersuisut aamma Nakkutilliisoqarfik assingusumik piginnaatitaaffeqanngillat.
– Kommunimit Naalakkersuisut allagaatinik kissaatigineqartunik tigusinissaat akornuserneqarpat tamanna inatsisinik unioqqutitsineruvoq, kisianni ilimagineqarsinnaanngilaq, Naalakkersuisut imaluunniit Nakkutilliisoqarfiup kommunimi ornigullutik nakkutilliiartorsinnaanerat, tamanna siumoortumik isumaqatigiissutigineqareersimanngippat, Morten Engberg oqarpoq.
Suliap kigaalaarunneqarnissaa pinngitsoorniarlugu paasissutissat allagaatillu piumasarineqartut qaqugukkut kingusinnerpaamik kommunimit tunniunneqarnissaat pillugu Naalakkersuisut piffissaliussamik aalajangersaasinnaapput.
Tamatuma akerlianik Naalakkersuisut aamma suliamik kigaalaarusseqqusaanngillat, kisianni Nakkutilliisoqarfiup Sermersuumik periuserineqartumik novembarimi 2020-mit atorunnaarsitsineranit 2021-mi inaarutaasumik aalajangiisoqarnissaanut ukioq ilivitsoq ingerlasimavoq.
Morten Engberg atuakkiamini kukkunermik allamik, politikerit atiisitigut taaneqartut isornartorsiorneqarnerannut tunngasumik, tikkuagaqarpoq:
Taamani borgmesteriusup Charlotte Ludvigsenip Aningaasaqarnermut Ataatsimiititaliap akuersissutiginninnissaa qulakkeeqqarsimanagu attartornissamut isumaqatigiissutinik pilersitsisimanera Nakkutilliisoqarfiup isornartoqartittorujussuuaa, kisianni Nakkutilliisoqarfik kommunalbestyrelsimut ilaasortanik ataasiakkaanik, aamma borgmesterimik, isornartorsiuinissamut piginnaatitaaffeqanngilaq.
Nakkutilliisoqarfiup siulittaasuata Sólja í Ólavsstovup Morten Engbergip isornartorsiuinera isummerfigerusunngilaa.
– Nakkutilliisoqarfik atuakkamik ilinniummik »Kommunestyret i Grønland«-imik, ilaatigut Nakkutilliisoqarfiup aalajangiinerisa oqaaseqaataasalu isornartorsiorneqarfigisaannik, saqqummiussivigineqarsimanngilaq aamma atuakkamik taassuminnga atuarsimanngilaq. Nakkutilliisoqarfik inatsiseqarnikkut siunnersoqarnerminik taamani sulilu ullumik tamakkiisumik tatiginnippoq, Sólja í Ólavsstovu naatsuliorluni oqarpoq.
Kisianni inatsisilerineq eqqoqqissaartumik ilisimatuussusiunngilaq.
Nakkutilliisoqarfiup inatsiseqarnikkut siunnersortaa tassaasimavoq eqqartuussissuserisut suliffeqarfiat Poul Schmith, naalagaaffiup aamma eqqartuussissuserisorisaa, kommunilli siunnersortaanit Nakkutilliisoqarfiup aalajangiinera assingusumik akerlilerneqarsimalluni. Illuatungeriinnut taakkununnga marlunnut eqqartuussissuserisumik kukkunersiuisumillu ikiorteqarnermut tamarmik immikkut inerniliissuteqartunut akiligassat tamarmiusut 2 millioner koruuniupput.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...
